ఈ పుట అచ్చుదిద్దబడ్డది
రేకు: 0046-2 లలిత సంపుటం: 06-026
పల్లవి:
ఎందరి వలపిఁచెనో యంటనింట
చిందుల పాటలు వింట సిరులు చేకొంట
చ. 1:
తుంగభద్ర యేటికాడ తోరమైనకొండనీడ
రంగుమీరి పైఁడి గోడ రాతిమేడ
అంగడి నున్నాఁడు చూడ నదివో పెడతల
చుంగుల పించెపు గూడ చుట్టు బాగతోడ
చ. 2:
పండరంగినుండి వచ్చి పామరుల నెల్ల మెచ్చి
యెండలేని నీడలోన యెచ్చి యెచ్చి
వెండి బైఁడిఁదడంబడ విభవాలఁ బ్రొద్దు వుచ్చి
కొండనుచు వరములు కోరిక లిచ్చి
చ. 3:
చక్కని యావిట్ఠలుండై జవ్వనానఁ జెలువుండై
ప్రక్క నున్న సతి తోడఁ బ్రబలుండై
మక్కువ వేంకటగిరి మాయధారి దేవుండై
యెక్కడా నెదురులేక యీడ నున్నాఁడిడివో