ఈ పుట అచ్చుదిద్దబడ్డది
రేకు: 0045-4 శుద్దవసంతం సంపుటం: 06-022
పల్లవి:
ఎంతమాయల వాఁడెంచి చూడఁగ వీఁడు
ఇంతి యీతని రూప మెవ్వరెఱుఁగుదురు
చ. 1:
తెలుపు జలములలోన తెప్పవలెఁదేలీనే
తలఁకి పాతాళమున దాఁగియుండీనే
కెలసి తన కన్నులను కెంపువగాఁ జేసీనే
నెలఁత భీకరముగా నేఁడు నవ్వీనే
చ. 2:
ఒరపుగా భూదాన మొకరిఁదా నడిగీనే
తరుణి భూమొక్కరికి ధారవోసీనే
మరలి పద్మజుని మనుమనినైనఁ జంపీనే
పరచుఁదనమున వృధా పాలుమాలీనే
చ. 3:
పలుమారు తన సిగ్గు బయటఁ బడవేసీనే
కలికితనమునఁ దాను గడవఁబాసీనే
వెలఁది వేంకటగిరి విభుఁడు నా కౌఁగిట
తొలఁగక చెమటలఁ దొప్పఁదోఁచీనే