ఈ పుట అచ్చుదిద్దబడ్డది
రేకు: 0044-6 ఆహిరి సంపుటం: 06-018
పల్లవి:
విన్నవించఁగరాదు విచ్చేయు మనరాదు
అన్ని విన్నపములు అవియె యివియు
చ. 1:
తూఁగు మంచముమీఁద తొయ్యలి పవ్వళించి
వ్రేఁగైన తురు మరవీడఁగాను
కాఁగిన మేనితో కన్నుఁ దమ్ముల నీ
రాఁగియాడిన మాట లవియె యివియు
చ. 2:
గొప్పలయిన చనుఁగొండలా పైపైనె
చిప్పిలు చెమ్మట చిందఁగాను
చెప్పక చెప్పుచు చెలి తడంబాటుతో
నప్పుడాడిన మాట లవియె యివియు
చ. 3:
నీవి చెఱఁగు జారి నెలఁత నీ కౌఁగిట
కావిక న్నులతోడఁ గరఁగుచును
శ్రీ వేంకటేశ్వర చెలరేఁగి నివ్వెర
గై వెనుకఁదలంచె నవియె యివియు
