ఈ పుట అచ్చుదిద్దబడ్డది
రేకు: 0044-2 ఆహిరి సంపుటం: 06-014
పల్లవి:
తొడరు నటువలెనే దొర కోపము
అడియాలమిటు సేసె నబ్బెఁగా బలిమి
చ. 1:
తనుఁబాసినంతనే తరుణిఁ గడునేఁపెనని
వనజారి మీఁదఁ బ్రియవరుఁడు గూడి
కనలి కొనగోళ్లఁ దునుక లుసేసి జవరాలి
చను జక్కవలకొసగెఁ జాలదా బలిమి
చ. 2:
కలికి కోమలికి చిలుకలు గండుఁ గోవిలలు
పలుకులనె వేఁచెనని ప్రాణ విభుండు
కెలపుఁ బలుకుల సన్నగిలఁ జేసి యలబలము
తలిరు మోవినె యేఁచె దక్కెఁగా బలిమి
చ. 3:
మతినుండి చిత్తజుఁడు మగువ గారించెనని
పతి వేంకటేశ్వరుఁడు పడతిఁ గదిసి
ప్రతిలేని మనసెల్లఁ బరవశము చేసి మరు
నతివ కన్నుల నించె నదియపో బలిమి