ఈ పుట ఆమోదించబడ్డది
రేకు: 0096-03 ముఖారి సం; 01-479 వైష్ణవ భక్తి
పల్లవి:
కంటే సులభ మిది కానక యుంటే దుర్లభ:
మింటిలోననే వున్న దిహముఁ బరమును
చ.1:
హరిదాసులు మెట్టినక్కడే పరమపద-
మరయ నిందుకంటె నవల లేదు
తిరమై వీరి పాదతీర్థమే విరజానది
సొరిది నన్ని చోట్లు చూచినట్టే వున్నది
చ.2:
మిచ్చక వైష్ణవుల మాటలెల్లా వేదములు
యిచ్చల నిందుకంటే నింక లేదు
అచ్చట వీరిప్రసా ద మమృతపానములు
అచ్చమై తెలిసేవారి కఱచేత నున్నది
చ.3:
చెలఁగి ప్రపన్నుల సేవే విజ్ఞానము
ఫల మిందుకంటే మఱి పైపై లేదు
తలఁప శ్రీవేంకటేశుదాసులే యాతనిరూపు-
లెలమి నెదుట నున్నా రెఱిఁగినవారికి
