ఈ పుట ఆమోదించబడ్డది
రేకు: 0079-01 రామక్రియ సం: 01-376 వైరాగ్య చింత
పల్లవి:
నీయాజ్ఞ దలమోచి నీ దేహధారి నైతి
యీయేడ గోవిందుఁడ నే నీడేరేదెట్లో
చ.1:
తనువు వేసరినాను తలఁపు వేసరదు
ధనముగడించెడితరితీపున
చెనకి మగఁడు విడిచిన మామ విడువని-
పనియాయ హరి నాబదుకుజాడ యెట్లో
చ.2:
పాయము ముదిసిననాను భావము ముదియదు
వేయైనా సంసారవిషయాలను
వోయయ్య కలివోసినావుట్లదిక్కు చూచేది
మాయదాయ నిఁక నామనసుజాడెట్లో
చ.3:
కడలేనినావిధులు కన్నులారఁ జూచి నీవు
నడుమ శ్రీవేంకటేశ నన్ను నేలితి
నొడుగులు దప్పినాను నోముఫలము దప్పని-
అడియాల మబ్బె నాకు నానతిచ్చి తెట్లో