పుట:తరికొండ నృసింహశతకము (తరికొండ వేంగమాంబ).pdf/39

ఉ.⁠

ఉబ్బుచుఁ దేరతేరకును, నూరక లేనటువంటి యాసలన్ బెబ్బులిచేతఁ జిక్కి, తనుభేదము లెన్నుచు నున్నదాన; నా మబ్బును పద్మమిత్రుగతి మందఁగ సంహరణంబుఁజేసి, నన్ గొబ్బునఁ గావవయ్య! తరిగొండ నృసింహ! దయాపయోనిధీ!

⁠ 26

భావం:

దయాసముద్రుడవయిన శ్రీతరిగొండ లక్ష్మీనరసింహదేవా! మాటిమాటికిని నా మనస్సులో అంకురించి తలయెత్తే ఆశలనే పెద్దపులికి చిక్కియున్నాను; అలా చిక్కియుండి, నావారు, పెరవారు- అనే భేదభావనతో ప్రవర్తిస్తూవున్నాను. ఈ భేదభావన అనే మబ్బును, సూర్యుడు మేఘాన్ని తొలగించినట్లుగా, పూర్తిగా నశింపజేసి, (అందరిలో నీవే ఉన్నాడవనెడి) నిజమైన భావనను కలిగించి, వేగమే నన్ను కాపాడుమా! తండ్రీ!