పుట:చిత్రభారతము (చరికొండ ధర్మన).pdf/174

తే.⁠

సత్యభామ విరోధి యాశ్చర్య మందఁ బోర నంతటఁ దెలిసి యప్పుండరీక నయనుఁ డుద్దండచక్రంబున సురవైరి శిరము ఖండించె దివిజులు చెంగలింప.

⁠ 82

క.⁠

తదనంతరంబ తత్సం పదతోడుత నతనియాఁక మగువగముల నిం పొదవఁ గొని కుండలంబుల నదితికి నీయంగఁ జనియె నమరావతికిన్.

⁠ 83

తే.⁠

వచ్చి సతితోడ నదితికి వందనంబుఁ జేసి కుండలయుగళ మిచ్చిన యనంత రంబు నే నిల్ప నాకపురంబులోన మూఁడుదినములు నిల్చె నమ్మురహరుండు.

⁠ 84

తే.⁠

అంత నొకనాఁడు పౌలోమి యరిగి సత్య భామఁ దో డ్తెచ్చి భూషణాంబరము లొసఁగి మచ్చికలతోడఁ దేనియ పిచ్చిలంగ నుచితసంభాషణము లాడుచున్నవేళ.

⁠ 85

క.⁠

బృందారకుఁ డొక్కఁడు దా నందనవనపారిజాతనవ్యకుసుమరా జిం దెచ్చి మద్వధూటికి నందిచ్చిన సత్యభామ కందొకటయినన్.

⁠ 86

తే.⁠

ఇడక యా లేమప్రేమ నుపేక్ష సేయఁ దానె కబరీభరంబునఁ దాల్చె దివ్య గంధలుబ్ధభ్రమద్భృంగగణవిచిత్ర ఝుంకృతులు దిక్కులను బ్రతిస్వనము లీన.

⁠ 87