పుట:ఆముక్తమాల్యద.pdf/186

⁠

జందుర కావిజీ బమరఁ జల్లని రేయిటి తట్టుపు న్గళు ల్విందులఁ దేల నూనెముడి వెండ్రుకలున్ దడి తావు లీనఁగన్.

⁠ 90

తే.⁠

బోటి గట్టిన చెంగల్వ పూవుటెత్తుఁ దరు పరిణ తోరుకదళమంజరియుఁ గొనుడుఁ బోయి గుడి నంబి విజనంబుఁ జేయఁ జొచ్చి మ్రొక్కి వేదికఁ బలువన్నె మ్రుగ్గు వెట్టి.

⁠ 91

తే.⁠

కపిలగవి సర్పిఁ బృథు దీపకళికఁ దీర్చి ద్వయముతో వక్షమునఁ గల్వదండ సేర్చి యగరుధూపంబు లిడి శర్కరాజ్యయుక్త హృదయకదళీఫలాళి నైవేద్య మొసఁగి.

⁠ 92

క.⁠

ఖండిత పూగీ నాగర ఖండంబులు ఘన శశాంక ఖండంబులచే [1]హిండితమగు తాంబూల మ ఖండస్థిరభక్తి నొసఁగి కదలి చెలులతోన్.

⁠ 93

తే.⁠

చెలువ గర్భగృహ ప్రదక్షిణముఁ జేసి వినతయై మౌళి శఠకోపమును ధరించి చరణతీర్థముఁ గొని తత్ప్రసాదలబ్ధ మైన మాల్యముఁ దాల్చి గేహమున కరుగు.

⁠ 94

క.⁠

ప్రతిదినము నిట్లు చని య చ్యుతపూజ యొనర్చి వచ్చి సుదతి వియోగ చ్యుతధైర్య యగుచు నయ్యదు పతిగుణములు ద్రవిడభాషఁ బాడుచునుండున్.

⁠ 95

తే.⁠

మొదల నాముక్తమాల్యద మదనతాప తరణి పెనువెట్ట వేఁగిన దక్షిణాశ మత్కృతోష్మకుఁ దుదముట్ట మాఁడు ననుచుఁ దొలఁగె నన నుత్తరాశకు, దొలఁగెఁ దరణి.

⁠ 96

1. హిండితములు గావించి య