తాళ్ళపాక పదసాహిత్యం/రెండవ సంపుటం/రేకు 194

by తాళ్ళపాక అన్నమాచార్యులు

రేకు: 0194-01 కన్నడగౌళ సం: 02-480 అధ్యాత్మ

పల్లవి:

ఎవ్వరి నేమనఁగల నెంతబలువుఁడ నేను
నవ్వుచు నీవే యిఁక నన్ను మన్నించవయ్యా

చ. 1:

కామక్రోధములకు కాణాచికాఁపను
ఆమని యింద్రియముల కడిబంటను
దీమనపు టాసలకు తీరని లగ్గస్థుఁడను (?)
యీ మరఁగువాఁడ నిన్ను నెట్టు గొలిచేనయ్యా

చ. 2:

పాయని సంసారానకు బడివనివాఁడను
కాయపుభోగాల వూడిగపువాఁడను
పాయపు మదములకు పంగెమైనవాఁడను (?)
యీయెడ నీవాఁడ నని యెట్టు గొలిచేనయ్యా

చ. 3:

సరిఁ గర్మములకెల్ల చనవరి బొడుకను
పొరలే జన్మముల యప్పులవాఁడను
అరయ శ్రీవేంకటేశ అంతలో నన్నేలితివి
యిరవై ఇట్టుండకున్న నెట్టు గొలిచేనయ్యా

రేకు: 0194-02 దేసాక్షి సం: 02-481 అధ్యాత్మ

పల్లవి:

ఎఱుఁగువా రెరుఁగుదు రీయర్థము
యెఱఁగనివారి కిది యెఱఁగనియ్యదు

చ. 1:

మొదలఁ గలుగువాఁడే ముందరనుఁ గలవాఁడు
అదన నాతఁడే పరమాత్ముఁడు
యెదుటఁ గలిగినదే ఇన్నిటాఁ గలిగినది
పదపడి యిదియే ప్రపంచము

చ. 2:

చెడనిదానికి మరి చేటెన్నఁడును లేదు
జడిగొన్న దిదియే సుజ్ఞానమార్గము
వుడివోఁ గల దెన్నఁడు వుడివోఁ గలిగినదీ
కడగడనే తిరుగు కర్మమార్గము

చ. 3:

యెంచి తొల్లి నడిచేవే ఇపుడును నడచేవి
మంచి శ్రీవేంకటేశ్వరు మహిమ లివి
అంచ నిపుడు గానని వల్లనాఁడుఁ గాననివే
మంచువంటి విషయపు మాయావాదములు

రేకు: 0194-03 లలిత సం: 02-482 వైష్ణవ భక్తి

పల్లవి:

కేశవదాసినైతి గెలిచితి నన్నిటాను
యీ శరీరపు నేరా లిఁకనేలా వెదక

చ. 1:

నిచ్చలుఁ గోరికలియ్య నీనామమే చాలు
తెచ్చి పునీతుఁ జేయ నీతీర్థమే చాలు
పచ్చిపాపా లణఁచ నీప్రసాదమే చాలు
యెచ్చుకొందు వుపాయాలు ఇఁకనేల వెదక

చ. 2:

ఘనునిఁ జేయఁగను నీకైంకర్యమే చాలు
మొనసి రక్షించను నీముద్రలే చాలు
మనిపి కావఁగఁ దిరుమణిలాంఛనమే చాలు
యెనసెను దిక్కుదెస ఇఁకనేల వెదక

చ. 3:

నెలవైన సుఖమియ్య నీధ్యానమే చాలు
అల దాపుదండకు నీయర్చనే చాలు
యిలపై శ్రీవేంకటేశ యిన్నిటా మాకుఁ గలవు
యెలమి నితరములు యిఁకనేల వెదక

రేకు: 0194-04 దేసాళం సం: 02-483 నృసింహ

పల్లవి:

కైవల్యమునకంటే కైంకర్య మెక్కుడు
శ్రీవిభుఁడ నీవు మాకుఁ జిక్కేమర్మ మిదివో

చ. 1:

చేపట్టి నీశిరసు పూజించే అహమికకంటే
నీపాదాలు పూజించే నేను మొక్కుడు
మాపుదాఁకా నినుఁగొల్చి మందెమేళమౌకంటే
దాపగు నీదాసుల శేషత్వ మెక్కుడు

చ. 2:

హరి నీపస్రాదజీవినై గర్వించుటకంటే
నరయ నీదాసులలెంకౌ టెక్కుడు
వెరవున నీచెవిలో విన్నపాలు సేయుకంటే
ధర నీవూడిగకాండ్లఁ దలఁపించు టెక్కుడు

చ. 3:

జట్టి మిమ్ము ధ్యానించి సాయుజ్య మందుటకంటే
అట్టె నీనామఫలమందు టెక్కుడు
ఇట్టె శ్రీవేంకటేశ యేలితి విందువంకనే
తిట్టపు మాగురు నుపదేశ మెక్కుడు

రేకు: 0194-05 శ్రీరాగం సం: 02-484 శరణాగతి

పల్లవి:

నావల్ల నీ కేమున్నది నారాయణ నీవు నన్ను
కావించి రక్షించే వుపకార మింతే కాక

చ. 1:

సొమ్ము దినఁబుట్టినట్టి సోమరిబం టేలికకు
ఇమ్ముల నందుకుఁ బ్రతి యేమి సేసీని
చిమ్ముచు నాతఁడు నేమించిన పనివాటలలో
వుమ్మడిఁ జేసేటి వట్టివూడిగాలే కాక

చ. 2:

ఆసపడి వచ్చినట్టి అతిథి బలురాజుకు
రాసిసేసి యేమిచ్చిన రతికెక్కీని
బేసబెల్లితనమున ప్రియాన నిచ్చకమాడి
మూసి దైన్యపుఁ జేతుల మొక్కు లింతే కాక

చ. 3:

శరణాగతుఁడ నీకెచ్చట శ్రీవేంకటేశుఁడ
దొరనై యేమిట సరిఁదూఁగఁగలను
ధరలోన నీవు దయదలఁచి నన్నేలుకోఁగా
పరగు నీమఱఁగున బదుకుదుఁ గాక

రేకు: 0194-06 రామక్రియ సం: 02-485 వైష్ణవ భక్తి

పల్లవి:

అదె శిరశ్చక్రము లేనట్టి దేవర లేదు
యిదె హరిముద్రాంకిత మిందే తెలియరో

చ. 1:

ఆనాయుధో సో అసురా అదేవా యని
వినోదముగ బుగ్వేదము దెలిపెడి
సనాతనము విష్ణుచక్రధారణకును
అనాది ప్రమాణ మందే తెలియరో

చ. 2:

యెచ్చ యింద్రే యని "యచ్చ సూర్యే" యని
అచ్చుగ తుద కెక్కె(క్క?) నదే పొగడీ శ్రుతి
ముచ్చట గోవిందుని ముద్రాధారణకు
అచ్చమయిన ప్రమాణ మందే తెలియరో

చ. 3:

మును "నేమినా తప్తముద్రాం ధారయే" త్తని
వెనువెంట శ్రుతి యదె వెల్లవిరి సేసీని
మొనసి శ్రీవేంకటేశు ముద్రాధారణకు
అనువుగఁ బ్రమాణ మందే తెలియరో