తాళ్ళపాక పదసాహిత్యం/రెండవ సంపుటం/రేకు 134

by తాళ్ళపాక అన్నమాచార్యులు

రేకు: 0134-01 రామక్రియ సం: 02-137 వైరాగ్య చింత

పల్లవి: వెలుపల మఱవక లోపల లేదు వెలుపలఁ గలిగిన లోపల మఱచు
చలమును నిదియే ఘడియ ఘడియకును సాధించిన సుఖమటు దోఁచు

చ. 1: వెలుపలి వెలుఁగే చూడఁగ లోపలి వెడ చీఁకటి గాననియట్లు
అలరి ప్రపంచజ్ఞానికిఁదనలో నాత్మజ్ఞానము గనరాదు
పలుమరు చీఁకటి చూడఁగఁ జూడఁగ బయలే వెలుఁగై తోఁచినయట్లు
అలయక తనలోచూపు చూచినను అంతరంగమున హరిఁ గనును

చ. 2: జాగరమే కడుఁ జేయఁగఁ జేయఁగ సతతము నిద్దుర రానట్లు
చేగల నింద్రియములలోఁ దిరిగిన చిత్తవికారము లయపడదు
యీగతి నిద్దురవోఁగాఁ బోఁగా నిలలో సుద్దులు యెఱఁగనియట్టు
యోగపు టేకాంతంబును దన మనసొగి మరవఁగ మరవఁగ హరిఁ గనును

చ. 3: దేహపు టాకాశపు నిట్టూర్పులు బాహిరపు బయట నడగినయట్లు
ఆహ జీవుని జననమరణములు అందే పొడముచు నందడఁగు
వూహల శ్రీవేంకటపతి వాయువు కొగి నాకాశము వొక్క సూత్రము
ఆహా ప్రాణాపానవాయువులు ఆతుమ నిలుపుటే హరిఁ గనుట

రేకు: 0134-02 గుజ్జరి సం: 02-138 వైరాగ్య చింత

పల్లవి: ఇందరిలో నే మెందుఁబోలుదుము యిందరిఁ బోలిన జీవులమే
కందువ వీరలఁ దలఁచి చిత్తమిది కలఁగెడి దైవమ కావఁగదే

చ. 1: యెందరొకో జరాదుఃఖము లేచి యనుభవించేటివారు
యెందరొకో దరిద్రదుఃఖము లెఁసగి యలమటించేటివారు
యెందరొకో బంధనతాడనహీనదెసల నుండెడివారు
యెందరొకో దాసదాస్యవిధి నెడయరాక చెఱలయినవారు

చ. 2: యెందరొకో మరణదెసలచే నిల సంయోగవియోగదుఃఖితులు
యెందరొకో జన్మరోగముల నెక్కువ భయమందేటివారు
యెందరొకో రాజుల చోరుల హింసలకు లోన యినవారు
యెందరొకో పొడమిన జీవుల కెక్కడ నెక్కడ నేపాటో

చ. 3: యెందరొకో యీదుఃఖనివృత్తికి యెడసి మిమ్ముఁ గొలిచినవారు
యెందరొకో సంపదలకు లోనై యేతాయాతనఁ బడువారు
యెందరొకో శ్రీవేంకటేశ యిపు డెక్కువ నీశరణము చొచ్చి
యిందును నందును సుఖులై లోకుల నిందరిఁ జూచుచు నవ్వెడివారు

రేకు: 0134-03 గుండక్రియ సం: 02-139 అధ్యాత్మ

పల్లవి: నిన్నూ నన్నూనెంచుకోని నేరమి గాక
పన్నిన సూర్యునికాంతి ప్రతిసూర్యుడౌనా

చ. 1: జలధిలోపలి మీను జలధి దా నౌనా
జలములాధారమైన జంతువు గాక
నెలవై నీలోనివాడఁ నీవే నే నౌదునా
పొలసి నీయ్యాధరువుబొమ్మ నింతే కాక

చ. 2: రాజువద్దనున్న బంటు రాజే తా నౌనా
రాజసపు చనవరి రచనే కాక
సాజమై నిన్నుఁ గొలిచి సరిగద్దె నుందునా
వోజతో నిన్ను సేవించి వుందునింతే కాక

చ. 3: ము త్తెపుఁజిప్పల నీరు మున్నీటివలె నుండునా
ముత్తెములై బలిసి లో మొనపుఁ గాక
నిత్తెపు శ్రీవేంకటేశ నీశరణాగతులము
మొత్తపు లోకుల మాముక్తులము గాక

రేకు: 0134-04 మాళవి సం: 02-140 ఉపమానములు

పల్లవి: ఇందుకుఁ జింతించనేల యీశ్వరుని మాయ లివి
యెందుకు మూలము హరి యీతనిఁ జింతించరే

చ. 1: అల నారికడపుఁ గాయకు నీరు వచ్చినయట్టు
తలఁచి రాఁగల మేలు తన్నుఁ దానే వచ్చురే
లలి నేనుగుదిన్న వెలఁగపంటి బేసము-
వలెనే పోఁగలవెల్ల వడిఁ దానే పోవురే

చ. 2: నిండిన యద్దములోన నీడ వొడచూపినట్టు
దండియైన పుట్టుగులు తన్నుఁ దానే వచ్చురే
పండిన పండ్లు తొడమఁబాసి వూడినయట్టు
అండనే మరణములు అందరికి సరిరే

చ. 3: పెనురాతిపై గడవ పెట్టగాఁ గుదురై నట్టు
తనుఁదానే చింతింపఁ దలఁపు నిలుచురే
ఘనుఁడు శ్రీవేంకటేశుఁ గని శరణన్నఁ జాలు
వెనక పాపాలు మంచు విచ్చినట్టు విచ్చురే

రేకు: 0134-05 పాడి సం: 02-141 వైరాగ్య చింత

పల్లవి: చూచే చూపొకటి సూటిగుఱి యొకటి
తాచి రెండు నొకటైతే దైవమే సుండీ

చ. 1: యేనుగఁ దలఁచితే యేనుగై పొడచూపు
మాను దలఁచిన నట్టే మానై పొడచూపు
పూని పెద్దకొండ దలపోయఁ గొండై పొడచూపు
తానే మనోగోచరుఁడు దైవమే సుండీ

చ. 2: బట్టబయలు దలఁచ బయలై పొడచూపు
అట్టె యంబుధి దలఁచ నంబుధియై పొడచూపు
పట్టణము దలఁచిన పట్టణమై పొడచూపు
తట్టి మనోగోచరుఁడు దైవమే సుండీ

చ. 3: శ్రీవేంకటాద్రిమీఁది శ్రీపతి దలఁచితేను
శ్రీవేంకటాద్రిమీఁది శ్రీపతై పొడచూపు
భావమే జీవాత్మ ప్రత్యక్షము పరమాత్మ
తావు మనోగోచరుఁడు దైవమే సుండీ