తాళ్ళపాక పదసాహిత్యం/మొదటి సంపుటం/రేకు 80

by తాళ్ళపాక అన్నమాచార్యులు

రేకు: 0౦80-01 ఆహిరి సం: 01-382 వైరాగ్య చింత


పల్లవి:
దేవ నీమాయతిమిర మెట్టిదో నా-
భావము చూచి గొబ్బనఁ గానవే

చ.1:
వెడదుఃఖమపుడెల్లా వేరుచుండుదుఁగాని
తడవి విరతిఁబొంది తలఁగలేను
ఆడియాసలఁ దిరిగి అలుయుచుండుదుఁగాని
మడి దొసకుల నివి మానలేను

చ.2:
హేయము స్తీసుఖమని యెఱుఁగుచుండుదుఁగాని
పాయపుమదముచేతఁ బాయలేను
పాయనిపాపాలు చూచి భయమందుచుందుఁగాని
వోయయ్య యివి సేయకుండలేను

చ.3:
కలకాల మిన్నియును గందు విందుఁగాని మఱి
యెలమి నొక్కటనైన యెచ్చరలేను
బలిమి శ్రీవేంకటేశ బంధముక్తునిఁజేసి
తలఁపులో నెలకొని దయఁజూడవయ్యా

రేకు: 0080-02 పాడి సం: 01-383 శరణాగతి


పల్లవి:
అభయమభయమో హరి నీకు
విభుఁడ వింతటికి వెర విఁక నేది

చ.1:
జడిగొని మదిలో శాంతము నిలువదు
కడుఁగడు దుస్సంగతి వలన
యిడుమలేని సుఖ మించుక గానము
అడియాసల నా యలమటవలన

చ.2:
తలఁపులోన నీతత్వము నిలువదు
పలు లంపటముల భ్రమవలన
కలిగిన విజ్ఞాన గతియును దాఁగెను
వెలి విషయపు పిరివీకుల వలన

చ.3:
పక్కనఁ బాపపు బంధము లూడెను
చిక్కక నినుఁ దలఁచిన వలన
చిక్కులు వాసెను శ్రీవేంకటపతి
నిక్కము నా కిదె నీకృప వలన

రేకు: 0080-03 బౌళి సం: 01-384 శరణాగతి


పల్లవి:
కొందరి కివి సమ్మతియైతే కొందరి కవి గావు
యిందరిలోపల నీవెడమాయలు యేగతిఁ దెలిసెద నేనయ్యా

చ.1:
దూరము కర్మమునకు జ్ఞానము తోడనే వొండకటికిని
దూరము పరమునకు బ్రపంచము తొలుత విరుద్ధంబు;
దూరము విరతికి సంసారము; తుదమొదలే లేదు;
యీరీతుల నీ వెడమాయలు యేగతిఁ దెలిసెద నేనయ్యా

చ.2:
కూడదు దేహమునకు నాత్మకు గోత్రవిరోధం; బెన్నఁడును
కూడదు కోపమునకు శాంతము గుణావగుణములను;
కూడదు బంధమునకు మోక్షము కోరికలే కట్లుగాన;
యేడ గొలఁదిగా శ్రీహరిమాయలు యేగతిఁ దెలిసెద నేనయ్యా

చ.3:
శ్రీ వేంకటపతి నన్నీ గతిఁ జిక్కించితి వీజగమునను;
భావింపఁగరాదు నీమహిమ బహుముఖములయర్దముగాన,;
యేవిధమును నేఁటికి నాకిఁక యెందెందని తగిలెద నేను
దైవికమగు నీదాసానుదాస్యము దక్కినదే నాకు

రేకు: 0080-04 పాడి సం; 0౦1-385 భగవద్గీత కీర్తనలు


పల్లవి:
అంతయు నీవే హరి పుండరీకాక్ష
చెంత నాకు నీవే శ్రీరఘురామా

చ.1:
కులమును నీవే గోవిందుఁడా నా-
కలిమియు నీవే కరుణానిధి,
తలఁపును నీవే ధరణీధరా ,నా-
నెలవును నీవే నీరజనాభా

చ.2:
తనువును నీవే దామోదరా, నా-
మనికియు నీవే మధుసూదనా
వినికియు నీవే విట్టలుఁడా,నా-
వెనకముందు నీవే విష్ణుదేవుఁడా

చ.3:
పుట్టుగు నీవే పురుషొత్తమా కొన
నట్ట నడుము నీవే నారాయణా,
యిట్టి శ్రీవేంకటేశ్వరుఁడా నాకు
నెట్టన గతి యింక నీవే నీవే

రేకు:౦080-05 బౌళి సం: 01-386 వైష్ణవ భక్తి


పల్లవి:
అన్నిటా నీ వంతర్యామివి అవుట ధర్మమే అయినాను
యెన్నఁగ నీవొక్కఁడవే గతియని యెంచికొలుచుటే ప్రపన్నసంగతి

చ.1:
యేకాంతంబున నుండినపతిని యెనసిరమించుటే సతిధర్మంబు
లోకమురచ్చలోనుండినపతి లోఁగొని పైకొని రానట్లు
యీ కొలఁదులనే సర్వదేవతలయిన్ని రూపులై నీ వున్నప్పుడు
కై కొని నిను బహుముఖములఁగొలుచుట గాదు పతివ్రత వ్రత ధర్మంబు

చ.2:
పూనిన బ్రాహ్మణుల లోపలనే నినుఁ బూజించుట వేదోక్తధర్మము
శ్వానకుక్కుటాదులోపల నిను సరిఁ బూజించఁగరానట్లు,
యీనియమములనె ప్రాకృతజనులను యీశ్వర నీశరణాగత జనులను
కానక, వొక్కట సరిగాఁజూచుట కాదఁ వివేకధర్మంబు

చ.3:
శ్రీ వేంకటపతిగురువనుమతినే నేవే నాకును శిష్యధర్మము
ఆవలనీవల నితరమార్గములు యాత్మలోన రుచిగానట్లు
భావింపఁగ సకలప్రపంచమును బ్రహ్మం సత్యజ్ఞానమనంతము
కైవశమై యిన్నిటా వెనుతగులు కాదవివేకధర్మంబు

రేకు: 0080-06 ఆహిరి సం: 01-387 అధ్యాత్మ


పల్లవి:
కోరు వంచరో కోటారు
ఆరసి మనసా అంతరాత్మకు

చ.1:
కొండలపొడవులు కోరికకుప్పలు
పండినపంటలు భవము లివి
నిండినరాసులు నిజకర్మంబులు
అండనె యివె మాయారంభములు

చ.2:
వెలిధాన్యంబులు విషయపురాసులు
పాలివారేటివూరుపుగములు
కలుషపుమదమున కావుగప్పినవి
అలవిమీర మాయారంభములు

చ.3:
బడి నింద్రియములబంతులు నురిపి
కడురతుల దండగట్టలతో
యెడనెడ శ్రీవేంకటేశుమహిమ లవే
ఆడియాలపుమాయారంభములు