తాళ్ళపాక పదసాహిత్యం/మొదటి సంపుటం/రేకు 44

by తాళ్ళపాక అన్నమాచార్యులు

రేకు: 0044-01 లలిత సం: 01-268 వైరాగ్య చింత

పల్లవి:ఈ దేహవికారమునకు నేదియుఁ గడపల గానము
       మోదమెరంగని మోహము ముందర గననీదు

చ.1:నిత్యానిత్యవివేకము నీరసునకు నొనగూడదు
      సత్యాలాపవిచారము జరగదు లోభికిని
      హత్యావిరహితకర్మము అంటదు క్రూరాత్మునకును
      ప్రత్యక్షంబగుపాపము పాయదు కష్టునకు

చ.2:సతతానందవికాసము సంధించదు తామసునకు
      గతకల్మషభావము దొరకదు వ్యసనికిని
      జితకాముఁడు దా నవుటకు సిద్దింపదు దుష్కర్మికి
      అతులితగంభీరగుణం బలవడ దథమునకు

చ.3:శ్రీవేంకటగిరివల్లభు సేవా తాత్పరభావము -
      ద్రోవ మహలంపటులకు తోఁపదు తలఁపునకు
      దేవోత్తముఁగడు నీతని దివ్యామృతమగు నామము
      సేవింపఁగ నితరులకును చిత్తం బొడఁబడదు

రేకు: 0౦44-02 శుద్దవసంతం సం; 01-269 నామ సంకీర్తన

పల్లవి:నమో నారాయణాయ నారాయణాయ సగుణబ్రహ్మణే
       సర్వపారాయణాయ శోభనమూర్తయే నమో

చ.1:నిత్యాయ విబుధసంస్తుత్యాయ నిత్యాధి-
      పత్యాయ మునిగణ ప్రత్యయాయ
      సత్యయ పత్యక్షాయ సన్మానససాం-
      గత్యాయ జగదవనకృత్యాయ తేనమో

చ.2:అక్రమోద్దతబాహువిక్రమాతిక్రాంత
      శుక్రశిష్యోన్యూలనక్రమాయ
      శక్రాదిగీర్వాణవక్రభయభంగని-
      ర్వక్రాయ నిహతారిచక్రాయ తేనమో

చ.3:అక్షరాయాతినిరపేక్షాయ పుండరీ-
      కాక్షాయ శ్రీవత్సలక్షణాయ
      అక్షీణవిజ్ఞానదక్షయోగీంద్రసం-
      రక్షానుకంపాకటాక్షాయ తేనమో

చ.4:కరిరాజవరదాయ కౌస్తుభాభరణాయ
      మురవైరిణే జగన్మోహనాయ
      తరుణేందుకోటీరతరుణీ మనస్స్తో త్ర-
      పరితోషచిత్తాయ పరమాయ తే నమో

చ.5:పాత్రదానోత్సవప్రథిత వేంకటరాయ
      థాత్రీశకామితార్థప్రదాయ
      గోత్రభిన్మణిరుచిరగాత్రాయ రవిచంద్ర-
      నేత్రాయ శేషాద్రినిలయాయ తే నమో నారయణాయ

రేకు: 0044-03 కన్నడగౌళ సం: ౦01-270 వైరాగ్య చింత

పల్లవి:నీమహత్త్వంబు లోనికిఁ వెలుపలికిఁ గప్పి
       కామింప నిట్టిదని కానరా దటుగాన

చ.1:నిండి యిన్నిటిలోన నీవు గలవని భ్రాంతి-
      నుండుదువుగాని నీ వొకటియునుఁ గావు
      దండిగలగిరి ప్రతిద్వని దోచుఁగాని యది
      కొండలోపల లేదు కొండయునుఁ గాదు

చ.2:బలసి యిన్నిటిలోపలనుఁ జైతన్యమై
      మెలఁగుదువుగాని యేమిట నీవు లేవు
      పలుదెరఁగులైన దర్పణమునందొక నీడ
      వొలయుఁగా కందు దలపోయు నది లేదు

చ.3:వుడుగ కన్నిటిలోన నుండుటయు లేదు నీ-
      వుడివోయి యందుండ కుండుటయు లేదు
      చెడనితేజముగాన శ్రీవేంకటేశ నీ-
      పొడవు పరిపూ ర్ణమై పొలుపాందుఁగాన

రేకు: 0౦44-04 మాళవి సం: 01-271 శరణాగతి

పల్లవి:అది నాయపరాధ మిది నాయపరాధ
       మదియు నిదియు నాయపరాధము

చ.1:నెరయ రూపములెల్ల నీరూపమేకా
      నరయని యది నాయపరాథము
      పరిపూర్జుఁడగు నిన్నుఁ బరిచ్చిన్నునిఁగా-
      నరయుట యది నాయపరాధము

చ.2:జీవాత్మునిఁగాఁ జింతింపఁ దలఁచుట
      యావంక నది నాయపరాధము
      సేవించి నిను నాత్మఁ జింతింపకుండుట
      ఆవల నిది నాయపరాధము

చ.3:యీడెరఁగక వేంకటేశుఁడ నినుఁ గొని-
      యాడుట యది నాయపరాధము
      యేడఁ జూచిన నాయెదుర నుండఁగ నిన్ను
      నాడ నీడ వెదకుటపరాధము

రేకు: ౦౦44-05 కన్నడగౌళ సం: 01-272 వేంకటగానం

పల్లవి:సతతవిరక్తుఁడు సంసారి గాఁడు
       రతిసమ్మదుఁడు విరక్తుఁడు నితఁడె

చ.1:నిత్యుఁడైనవాఁడు నిఖిలలోకములఁ
      బ్రత్యక్షవిభవ సంపన్నుఁడు గాఁడు
      నిత్యుఁడు నితఁడే నిరుపమానుఁడైన
      ప్రత్యక్షవిభవ సంపన్నుఁ డితఁడె

చ.2:యోగియైనవాఁడు వొనర నేకాలము
      భోగియై భోగిపై భోగింపలేఁడు
      యోగియు నితఁడే వుడుగక భోగిపై
     భోగించునటువంటి పురుషుండు నితఁడె

చ.3:దేవుడైనవాఁడుఁ దెలుప లోకముల
      దేవతారాధ్యుఁడై దీపింపలేఁడు
      దేవుఁడు నితఁడే దివిజవంద్యుఁడైన
      శ్రీవేంకటగిరిదేవుండితఁడె