తాళ్ళపాక పదసాహిత్యం/మొదటి సంపుటం/రేకు 43

by తాళ్ళపాక అన్నమాచార్యులు

రేకు: 0043-01 థన్నాశి సం: 01-261 కృస్ణ

పల్లవి:ఆదిమునుల సిద్ధాంజనము
       యేదెసఁ జూచిన నిదివో వీఁడే

చ.1: నగిన సెలవిఁ బడు నాలుగుజగములు
      మొగమునఁ జూపే మోహనము
      నిగిడి యశోదకు నిధానంబై
      పొగడొందీ గృహమున నిదె వీఁడే

చ.2: కనుదెరచిన నలుగడ నమృతము లటు
      అనువునఁ గురసీ నపారము
      వనితలు నందవ్రజమునఁ జెలఁగఁగ
      మనికికి నిరవై మలసీ వీఁడే

చ.3: పరమునకునుఁ దాఁ బరమై వెలసిన-
      పరిపూర్ణ పరాత్పరుఁడు
      సరుస రుక్మిణికి సత్యభామకును
      వరుఁడగు వేంకటవరదుఁడు వీఁడే

రేకు: 0043-02 సామంతం సం: 01-262 భక్తీ

పల్లవి: నారాయణ నీనాముము బుద్ధిఁ
        జేరినాఁ జాలు సిరులేమి బాఁతి

చ.1: ననుపైన శ్రీవిష్ణునామము పేరు-
      కొనఁగానే తేఁకువ మీరఁగా
      ఘనమైన పుణ్యాలు గలుగఁగా తమ-
      కనయముఁ బరమది యేమిబాఁతి

చ.2: నలువైన శ్రీహరినామము మతిఁ
      దలఁచిననాబంధము లూడఁగా
      యెలమి దీనిఁ బఠియించినా యీ-
      కలుషములేల కలుగు నెవ్వరికి

చ.3: వేంకటపతి నామవిభవము కర్మ
       పంకములెల్లఁ బరిమార్చఁగా
       బింకమై తలఁపెడి ప్రియులకుఁ యెందు-
       నింక నీ సుఖమిది యేమిబ్రాఁతి

రేకు: 0043-03 ఆహిరి సం: 01-263 వైరాగ్య చింత

పల్లవి: మోహము విడుచుటే మోక్షమది
       దేహ మెఱుఁటే తెలివీనదే

చ.1:ననిచిన తనజన్మముఁ గర్మముఁ దన-
      పనియు నెఱుగుటే పరమ మది
      తనకు విధినిషేధములుఁ బుణ్యముల-
      ఘనత యెఱుగుటే కలిమి యది

చ.2:తఱిఁదఱి బ్రేమపుతల్లిదండ్రులను
      యెఱఁ గనిదే కులహీన తది
      చఱులఁ బొరలి యాచారధర్మములు
      మఱచినదే తనమలిన మది

చ.3:కమ్మరఁ గమ్మరఁ గామభోగములు
      నమ్మి తిరుగుటే నరక మది
      నెమ్మది వేంకటనిలయునిదాసుల-
      సొమ్ముయి నిలుచుట సుకృత మది

రేకు: 0043-04 ముఖారిసం: 01-264 సంస్కృత కీత్తనలు

పల్లవి:శ్రీశోయం సుస్థిరో యం
       కౌశికమఖరక్షకోయం

చ.1:నిగమనిథినిర్మలోయం
      జగన్మోహనసతీపతి-
      విగతభయోయం విజయసఖోయం
      భృగుమునినా సంప్రీతోయం

చ.2:సకలపతి శ్శాశ్వతోయం
      శుకముఖమునిజనసులభోయం
      ప్రకటబహళశోభనాధికోయం
      వికచరుక్మిణీవీక్షణోయం

చ.3:సరసపోయం పరిసరప్రియోయం
      తిరువేంకటాధిపోయం
      చిరంతనోయం చిదాత్మకోయం
      శరణాగతవత్సలోయం

రేకు: 0౦43-05 శుద్దవసంతం సం; 01-265 సంస్కృత కీర్తనలు

పల్లవి:కిం కరిష్యామి కిం కరోమి బహుళ-
      శంకాసమాధానజాడ్యం వహామి

చ.1:నారాయణం జగన్నాధం త్రిలోకైక-
      పారాయణం భక్తపావనం
      దూరీకరోమ్యహం దురితదూరేణ సం-
      సారసాగరమగ్నచంచలత్వేన

చ.2:తిరువేంకటచలాధీశ్వరం కరిరాజ-
      వరదం శరణాగతవత్సలం
      పరమపురుషం కృపాభరణం న భజామి
      మరణభవదేహభిమానం వహామి

రేకు: 0043-06 శ్రీరాగం సం: 01-266 వేంకటగానం

పల్లవి:ఆపన్నులపాలి దైవమాతఁడే గతిఁదక్క
       యే పొద్దును భజియించంగ నితరుఁడు మరి కలఁడా

చ.1:నిరుపాధిక నిజబంధుఁడు నిరతి శయానందుఁడు
      కరి వరదుఁ డితఁడే గాక ఘనుఁడధికుఁడు గలఁడా

చ.2:సంతత గుణ సంపన్నుఁడు సాధులకుఁ బ్రసన్నుఁడు
      అంతర్యామితఁడే కాక అధికుఁడు మది కలఁడా

చ.3:పరమాత్ముఁడు పరమపురుషుఁడు పరికింపఁగఁ గృపాలుఁడు
      తిరువేంకట విభుఁడే కాక దేవుఁడు మరి కలఁడా

రేకు: 0043-07 కురంజి సం: 91-267 నామ సంకీర్తన

పల్లవి:మందరథర మధుసూదన
       నందగోపనందనా

చ.1:నరసింహ గోవింద నవనీతానంద
      హరిముకుంద నయనారవింద
      కరివరద గరుడగమనరూప
      గురుచాపా యదుకులదీపా

చ.2:భవదూర భయహర పరిపూర్జామృత
      భవనపాలన సురపాలన
      భువనభూషణ పరపురుష పురాతన
      నవభోగా కరుణాయోగా

చ.3;పంకజాసననుత భవ్యనిర్మలపాద-
      పంకజ పరమ పరాత్పర
      వేంకటశైలనివేశ శు-
      భంకరా క్షేమంకరా