తాళ్ళపాక పదసాహిత్యం/మొదటి సంపుటం/రేకు 40
రేకు: 0౦40-01 సామంతం సం; 01-243 అథ్యాత్మ
పల్లవి:నిగమనిగమాంత వర్ణిత మనోహర రూప
నగరాజధరుఁడ శ్రీనారాయణా
చ.1:దీపించు వైరాగ్య దివ్యసౌఖ్యం బియ్య-
నోపకకదా నన్ను నొడఁబరుపుచు
పైపైనె సంసారబంథములఁ గట్టేవు
నాపలుకు చెల్లునా నారాయణా
చ.2:చీకాకు పడిన నాచిత్తశాంతము సేయ-
లేకకా నీవు బహులీల నన్ను
కాకుసేసెదవు బహుకర్మములఁ బడువారు
నాకొలఁదివారలా నారాయణా
చ.3:వివిధనిర్భంధముల వెడలఁద్రోయక నన్ను
భవసాగరములఁ దడఁబడఁ జేతురా
దివిజేంద్రవంద్య శ్రీతిరువేంకటాద్రీశ
నవనీతచోర శ్రీనారాయణా
రేకు: 0040-02 కాంబోదిసం: 01-244 అంత్యప్రాస
పల్లవి:తెల్లవారనియ్యరో తెరువు యీ-
పల్లదపుదొంగలెల్లఁ బారాడుతెరువు
చ.1:దొంతరపూవులతోఁట తూరుపుఁ దెరువు
చింతపూవుఁ దేనెలచెమ్మ తెరువు
సంతులేని సతియింటిచాయ తెరువు
యింతలోనె చలిఁబడి యెండదాఁకే తెరువు
చ.2:పాముపుట్ట గొంటిమీఁది పడుమటితెరువు
చీమకదొంతరలోనిచిన్న తెరువు
గాములుగాచుక యుండే గాలి తెరువు
యేమిటా నెక్కడవుత నెరఁగనితెరువు
చ.3:అన్ని దిక్కులునుఁ దానేయైవున్న తెరువు
పన్నీటి కాలువలబాట తెరువు
కన్నుల వేంకటపతిఁ గన్న తెరువు
మిన్నునేలఁగూడినమీఁది తెరవు
రేకు: 0040-03 శ్రీరాగం సం; 01-245 నామ సంకీర్తన
పల్లవి:నమో నారాయణాయ నమః
సమధికానందాయ సర్వేశ్వరాయ
చ.1:ధరణీసతీఘనస్తనశైలపరిరంభ-
పరిమళశ్రమజలప్రమదాయ
సరసిజనివాసినీసరసప్రణామయుత-
చరణాయ తే నమో సకలాత్మకాయ
చ.2:సత్యభామాముఖాంచనపత్రవల్లికా-
నిత్యరచనక్రియానిపుణాయ
కాత్యాయనీస్తోత్రకామాయ తే నమో
ప్రత్యక్షనిజపరబ్రహ్మరూపాయ
చ.3:దేవతాధిపమకుటదివ్యరత్నాంశుసం-
భావితామలపాదపంకజా య
కైవల్యకామినీకాంతాయ తే నమో
శ్రీవేంకటాచల శ్రీనివాసాయ
పల్లవి: పాపినైననాపాలఁ గలిగి తోవ
చూపుమన్న నెందుఁ జూపరు
చ. 1: ధృతిదూలి జగమెల్లఁ దొరిగి వేసరితి
యితరాలయముల కేఁగియేఁగి వేసరితి
గతమాలి పరులపైఁ గనలి వేసరితి
మతిమాలి కులవిద్య మాని వేసరితి
చ. 2: విసిగి యాచారంబు విడిచి వేసరితి
పసచెడి ప్రియములు పలికి వేసరితి
కొసరి ద్రవ్యముపైఁ గోరి వేసరితి
కసుగంది లోలోనె కాఁగి వేసరితి
చ. 3: కోవిదులగువారిఁ గొలిచి వేసరితి
దైవములందరిఁ దడవి వేసరితి
శ్రీవేంకటేశునిసేవ మాని వట్టి-
సేవలన్నియు నేఁ జేసి వేసరితి
రేకు: 0౦40-05 శ్రీరాగం సం: 01-247 వైరాగ్య చింత
పల్లవి: సకలశాస్త్రజ్ఞానసంపన్నుఁడట చిత్త-
మొకటికినిఁ జొరదు విథియోగమౌఁగాదో
చ.1: దొరతనంబట కలిమి దోడుగాదట మంచి-
తరుణులట మోహమట దైన్యంబట
విరహమట దారిద్య్రవివశుఁడౌానట చూడ
నరయ నిది కర్మఫలమౌనో కాదో
చ.2: రాజసన్మానమట రవణహీనత్వమట
తేజమట నలువంకఁ దిరిపెంబట
వాజివాహనములట వాఁడి లేదట తొంటి-
పూజఫలమిది వెలితిభోగమౌఁగాదో
చ.3:యిలయెల్ల నేలునట ఇంట లేదట మిగుల
బలిమిగలదట సదా పరిభవమట
చెలువలర వేడుకల శ్రీవేంకటేశ్వరుని
గొలువనేరనివెనకఁ గొరంతలౌఁగాదో
రేకు: 0040-06 ముఖారి సం: 01-248 వైరాగ్య చింత
పల్లవి: సొరిది సంసారంబు సుఖమా యిందరికి
వెరవెఱంగక వగల వేఁగేరు గాక
చ.1: దేహములు దలఁప సుస్థిరములా ప్రాణులకు-
నూహింప లోభ మట్లుండుఁ గాక
మోహంబుచే వెనకముందెఱుఁగలేక తమ-
దేహసుఖములు మరిగి తిరిగేరుగాక
చ.2: నెలకొన్నద్రవ్యములు నిలుచునా యెవ్వరికి
అలవి నిలుపఁగరాని యాస గాక
బలువైన వట్టి విభ్రాంతిచే దగులువడి
తెలిసియును దెలియ కిటు తిరిగేరు గాక
చ.3:నెఱయువిభవములెల్ల నిజములా యిందరికి
కొఱమాలినట్టి తమగుణముగాక
యెఱుకతోఁ దిరువేంకటేశుఁ గొలువఁగలేక
తెఱఁగుమాలిన బుద్ధిఁ దిరిగేరుగాక