తాళ్ళపాక పదసాహిత్యం/మొదటి సంపుటం/రేకు 39

by తాళ్ళపాక అన్నమాచార్యులు

రేకు: 0039-01 శంకరాభరణం సం: 01-237 వేంకటేశ్వరౌషధము

పల్లవి:కొనరో కొనరో మీరు కూరిమిమందు
       వునికిమనికి కెల్ల నొక్కటే మందు

చ.1:ధ్రువుండు గొనినమందు తొల్లియుఁ బ్రహ్లాదుఁడు
      చవిగాఁ గొనినమందు చల్లనిమందు
      భవరోగములు వీడిపారఁగఁ బెద్దలు మున్ను
      జవకట్టికొనిన నిచ్చలమైనమందు

చ.2:నిలచి నారదుఁడు గొనినమందు జనకుఁడు
      గెలుపుతోఁ గొని బ్రదికిన యామందు
      మొలచి నాలుగుయుగములరాజులు ఘనులు
      కలకాలముగొని కడగన్నమందు

చ.3:అజునకుఁ బరమాయువై యొసగినమందు
      నిజమై లోకములెల్ల నిండినమందు
      త్రిజగములు నెఱఁగ తిరువేంకటాద్రిపై
      ద్వజమెత్తెఁ గోనేటిదరినున్నమందు

రేకు: 0039-02 సామంతం సం: 01-238 వైరాగ్య చింత

పల్లవి:పాయపుమదముల బంధమా మము
       జీయని యిఁకఁ గృపసేయఁగదో

చ.1:ధనథాన్యములై తనులంపటమై
      పనిగొంటివి నను బంధమా
      దినదినంబు ననుతీదీపులం బెను-
      గనివైతివి యిక గావఁగదో

చ.2:సతులై సుతులై చలమై కులమై
      పతివైతివి వోబంధమా
      రతిఁ బెరరేఁపుల రంతులయేఁపుల
      గతిమాలితి విఁక గావఁగదో

చ.3:పంటై పాఁడై బలుసంపదలై
      బంటుగ నేలితి బంధమా
      కంటి మిదివో వేంకటగిరిపై మా-
      వెంటరాక తెగి విడువఁగదో

రేకు: 0039-03 సామంతం సం; 01-239 వైరాగ్య చింత

పల్లవి:కటకటా యిటుచేసెఁ గర్మబాధ
       యెటువంటివారికిని నెడయ దీబాధ

చ.1:దినదినముఁ బ్రాణులకు దీపనమువే బాధ
      తనుపోషణములు కందర్పబాధ
      మనసుశాంతికి సదా మమకారములబాధ
      తనివోనికోర్కులకు దైవగతిబాధ

చ.2:వెడయాసచూపులకు వేడుకలవే బాధ
      కడువేడ్కలకు వియోగములబాధ
      తొడవైనయెఱుకలకు దురితబుద్దులబాధ
      జడియుఁబరచింతలకు సంసారబాధ

చ.3:ఆరిది నిశ్చయమతికి ననుమానములబాధ
      సరిలేని జీవులకు జన్మబాధ
      తిరువేంకటాచలాధిపునిఁ గని మని కొలుచు-
      వెరవుచేతనె కాని వీడ దీబాధ

రేకు: 0039-04 శ్రీరాగం సం: 01-240 ఉపమానములు

పల్లవి:ముచ్చుఁగన్న తల్లి చేరి మూలకు నొదిగినట్టు
       తెచ్చిన సంబళ మెల్లఁ దీరుఁబో లోలోనె

చ.1:దప్పముచెడినవాని తరుణి కాఁగిటఁ జేరి
      అప్పటప్పటికి నుస్సు రనినయట్టు
      వొప్పయిన హరిభక్తి వొల్లనివాని యింటి-
      కుప్పలైన సంపదలు కుళ్లుఁబో లోలోనె

చ.2:ఆఁకలి చెడినవాని అన్నము కంచములోన
      వోఁకిలింపుచు నేల నొలికినట్టు
      తేఁకువైన హరిభక్తి తెరువుగానని వాని-
      వేఁకపు సిరులు కొంపవెళ్లుఁబో లోలోనె

చ.3:వొడలుమాసినవాని వొనరుఁజుట్టములెల్ల
      బడిబడినే వుండి పాసినయట్టు
      యెడయక తిరువేంకటేశుఁ దలఁచనివాని-
      ఆడరుబుద్ధులు పగలౌఁబో లోలోననె

రేకు: 0039-05 శ్రీరాగం సం: 01-241 అధ్యాత్మ

పల్లవి: అంగడి నెవ్వరు నంటకురో యీ -
         దొంగలఁ గూడిన ద్రోహులను

చ.1: దోసము దోసము తొలరో శ్రీహరి -
       దాసానదాసుల దగ్గరక
       ఆసలనాసల హరినెఱఁగక చెడి
       వీసర పోయిన వెఱ్ఱులను

చ.2: పాపము పాపము పాయరో కర్మపుఁ-
       దాపపువారము దగ్గరక
       చేపట్టి వేదపు శ్రీహరికథలు
       యేపొద్దు వినని హీనులము

చ.3: పంకము పంకము పైకొనిరాకురో
      కొంకుఁగొసరులకూళలము
      వేంకటగిరిపై విభునిపుణ్యకథ
      లంకెల వినని యన్యులము

రేకు: 0039-06 బౌళి-జంపెతాళం సం: 01-242 ఉపమానములు

పల్లవి:సాగియునా మఱియు ముచ్చుకుఁ బండువెన్నెలలు
       పగవానివలెనె లోపల దాఁగుఁగాక

చ.1:దక్కునా పేదకును తరముగానిధనంబు
      చిక్కి యెవ్వరికై నఁ జేరుఁగాక
      వెక్కసంబైన గోవిందునిఁ దలఁపు బుద్ధి
      తక్కిన పరులకెల్లఁ దలఁపేల కలుగు

చ.2:అరగునా దుర్భలున కరుదైన యన్నంబు
      కరుచబుద్ధులను సరమిగొనుఁగాక
      తొరలునా హరివినుతి దుష్టునకు నది నోరఁ
      దొరలెనా యతనినే దూషించుఁగాక

చ.3:చెల్లునా యమృతంబు సేవించ నధమునకు
      వొల్లనని నేలపై నొలుకుఁగాక
      వెళ్లి గొనుమందునకు వేంకటేశుస్మరణ
      చల్లనౌనా మనసు శఠియించుఁగాక