తాళ్ళపాక పదసాహిత్యం/మొదటి సంపుటం/రేకు 31
రేకు: 0031-01 ఆహిరి సం: 01-188 వైరాగ్య చింత
పల్లవి:పారకుమీ వోమనసా పంతము విడువకు మీమనసా
పారిన నీవే బడగయ్యెదవు చేరువ నాఁడే చెప్పనె మనసా
చ.1:చింతించకుమీ శివునివైరిచే చిక్కువడకుమీ వోమనసా
కంతువారకము వయసుఁ బ్రాయములు కావటికుండలు వోమనసా
యెంతే మేలుఁగీ డేకాలము ఎప్పుడు నుండదు వోమనసా
సంతరించుకో వానిని మనసున సంతోషముగా వోమనసా
చ.2:యెన్నికలే తలపోయకుమీ యేమరకుండుమి వోమనసా
కన్న విన్న వారిలో నెప్పుడు కాకుపడకుమీ వోమనసా
పున్నమమాసలు పుడమిలో బదుకులు పోయివచ్చేవి వోమనసా
మిన్నో నేలనిమన్న దినములో మీఁదుచూడకుమి వోమనసా
చ.3:కన్నులసంగాతము సేయకుమీ కళవళించకుమి వోమనసా
వన్నెలమాటలు చెవులఁబెట్టక వాసివిడువకుమి వోమనసా
మున్నిఁటిసురలు బ్రహ్మదులకై నను ముక్తి సాధనము వోమనసా
వెన్నుని వేంకటగిరిఁ దలఁచుము వేసారకుమీ వోమనసా
రేకు: 031-2 ముఖారిసం: 01-189 వైరాగ్య చింత
పల్లవి:ఏల పొరలేవులేవే యింతలోనిపనికి
మాలయింటితోలుకప్పు మాయ లిటువంటివి
చ.1:చిక్కులతమకముల చీఁకటిగప్పిననాఁడు
యెక్కువ వాసనలౌ హేయపుమేను
వెక్కసపు ప్రియమది విరిగితే రోఁతలౌ
లక్కపూఁతకపురు లీలాగు లిటువంటివి
చ.2:మించినచిత్తములో మేలుగలిగిననాఁడు
యంచరానిచవులౌ నెంగలిమోవి
పెంచుకంటే కష్టమౌ ప్రియముదీరిననాఁడు
చంచలపు చిత్తములచంద మిటువంటిది
చ.3:వెల్లి గొనుసురతపువేళ మరపులయింపు
కొల్లలాడుటౌ కొనగోరితాఁకులు
నల్లితిండౌ మరి మీఁద మరగితే రోఁతలౌ
వుల్లమిచ్చే వేంకటేశువొద్ది కిటువంటిది
రేకు: 0031-03 ముఖారిసం: 01-190 వైరాగ్య చింత
పల్లవి:ఎట్టు దరించీ నిదె యీజీవుఁడు
బట్టబయలుగాఁ బరచీ నొకటి
చ.1:చెడనిమట్టిలోఁ జేసినముద్దే
నడుమ ముంచుకొన్నది వొకటి
తడియనినీరై తడివొడమింపుచు
వడిసీని వేపుర వడితో నొకటి
చ.2:పాయనితనుదీపనములుగా నటు
చేయుచు మది వేఁచీ నొకటి
కాయపుచుట్టరికమ్ములు చేయుచు
రేయుఁబగలు విహరించీ నొకటి
చ.3:యిన్నియుఁదానే యేచి కపటములు
పన్నీ నిదె లోపల నొకటి
వెన్నెలచూపుల వేంకటేశ నిను
యెన్నికతోఁ గడు నెదిరీ నొకటి
రేకు: 0031-04 ముఖారిసం: 01-191 దశావతారములు
పల్లవి:బ్రహ్మ గడిగిన పాదము
బ్రహ్మము దానె నీపాదము
చ.1:చెలఁగి వసుధ గొలిచిన నీపాదము
బలి తల మోపిన పాదము
తలఁకక గగనము దన్నిన పాదము
బలరిపుఁ గాచిన పాదము
చ.2:కామినిపాపము గడిగిన పాదము
పాముతల నిడిన పాదము
ప్రేమపు శ్రీసతి పిసికెడి పాదము
పామిడి తురగపుఁ పాదము
చ.3:పరమయోగులకుఁ బరిపరి విధముల
పరమొసఁగెడి నీపాదము
తిరువేంకటగిరి తిరమని చూపిన-
పరమపదము నీపాదము
రేకు: 0౦31-05 సామంతం సం; 01-192 వేంకటగానం
పల్లవి:తానే కాకెవ్వరు మాకు దాతయు దైవము తన
లోనఁ బెట్టుకొని మాకు లోనైనవాఁడు
చ.1:చదవించి, కూడవెట్టి, జారకుండ నిల్లుగట్టి
బెదురులేని బుద్ది పిన్ననాఁడే చెప్పి
యెదరి నడిగి, ద్రవ్యమిది గొమ్మనుచు నిచ్చి
పదిలమై తమ్ముఁ బాలించువాఁడు
చ.2:మోహవియోగమ్ము, మొహానురాగమ్ము
దేహవిబాగంబు దెలిపిని కలికి
ఐహికమున వేంకటాధీశుఁడై సర్వ
దేహరక్షకుఁడై తిరుగుచున్నాఁడు
పల్లవి:చెదఱక వెలుఁగే చేను మేయఁగఁజొచ్చె
ఆదలించి తగదు నీ కనువారు వేరీ
చ.1:చిత్త మింద్రియములచేఁ జిక్కి , కడు మద-
మెత్తిన వద్దన నిఁక వేరీ
హత్తినమనసు మోహాదులతోఁ గూడి
తత్తరించిన మాన్పఁదగువారు వేరీ
చ.2: జీవుఁడిన్నిటికిఁ దాఁ జిక్కి పోయినత్రోవఁ
బోవఁజొచ్చిన బుద్ధిపొల మేది
శ్రీవేంకటేశుని చింతాపరతఁ గాని
కావఁగ నాత్మకు గతి దానేది
రేకు: 0031-07 కన్నడగౌళ సం; 01-194 వైరాగ్య చింత
పల్లవి:పోయఁ గాలం బడవికిఁ గాయు వెన్నెలకరణిని
శ్రీయుతుఁ దలఁచుఁడీ నరులు మాయఁబడి చెడక
చ.1:చిత్తము చేకూరుచుకొని చిత్తైకాగ్రతను
చిత్తజగురునిఁ దలఁచుఁడీ చిత్తజుఁ జొరనీక
చ.2:బూరుగుమాఁకునఁ జెందినకీరముచందమున
ఆరయ నిష్పలమగు మరి యన్యులఁ జేరినను
చ.3:కూరిమి మాతిరువేంకటగిరి గురుశ్రీ పాదములు
చేరినవారికి భవములు చెంద వెపుడు నటుగాన