తాళ్ళపాక పదసాహిత్యం/మొదటి సంపుటం/రేకు 2

రేకు: 0002-01 శుద్ధవసంతం సం: 01-007 అధ్యాత్మ
పల్లవి: సదా సకలము సంపదలే
తుద దెలియఁగ వలెఁ దొలఁగఁగవలయు
చ. 1: అహర్నిశమును నాపదలే
సహించిన నవి సౌఖ్యములే
యిహమున నవి యిందఱికిని
మహిమ దెలియవలె మానఁగవలెను
చ. 2: దురంతము లివి దోషములే
పరంపర లివి బంధములు
విరసములౌ నరవిభవములౌ-
సిరులే మరులౌ చిరుసుఖ మవును
చ. 3: గతి యలమేల్ మంగ నాంచారికిఁ
బతియగువేంకటపతిఁ దలఁచి
రతు లెఱుఁగగవలె రవణము వలెను
హిత మెఱుఁగఁగవలె నిదె తనకు

రేకు: 0002-02 శుద్ధవసంతం సం: 01-008 నామ సంకీర్తన
పల్లవి: ఇందిరానామ మిందరికి
కుందనపుముద్ద వో గోవింద
చ. 1: అచ్చుతనామము అనంతనామము
ఇచ్చినసంపద లిందరికి
నచ్చినసిరులు నాలుకతుదలు
కొచ్చికొచ్చీ నోగోవిందా
చ. 2: వైకుంఠనామము వరదనామము
ఈకడనాకడ నిందరికి
వాకుఁదెరపులు వన్నెలు లోకాలఁ
గూకులు వత్తులు నోగోవిందా
చ. 3: పండరినామము పరమనామము
ఎండలువాపెడి దిందరికి
నిండునిధానమై నిలచినపేరు
కొండలకోనేటివోగోవిందా

రేకు: 0002-03 బౌళి సం: 01-009 భగవద్గీత కీర్తనలు
పల్లవి: ఎవ్వరిఁ గాదన్న నిది నిన్నుఁ గాదంట
యెవ్వరిఁ గొలిచిన నిది నీకొలువు
చ. 1: అవయవములలో నదిగా దిదిగా-
దవి మే లివి మే లన నేలా
భువియుఁ బాతాళము దివియు నందలిజంతు-
నివహ మింతయునూ నీదేహమేకాన
చ. 2: నీవు లేనిచోటు నిజముగఁ దెలిసిన
ఆవల నది గా దనవచ్చును
శ్రీవేంకటగిరి శ్రీనాథ సకలము
భావింప నీవే పరిపూర్ణుఁడవుగాన

రేకు: 0002-04 సామంతం సం: 01-010 వైష్ణవ భక్తి
పల్లవి: సహజ వైష్ణవాచార వర్తనుల-
సహవాసమె మాసంధ్య
చ. 1: అతిశయమగు శ్రీహరిసంకీర్తన
సతతంబును మాసంధ్య
మతి రామానుజమతమే మాకును
చతురతమెఱసిన సంధ్య
చ. 2: పరమభాగవతపదసేవనమే
సరవి నెన్న మాసంధ్య
సిరివరుమహిమలు చెలువొందఁగ వే-
సరక వినుటె మాసంధ్య
చ. 3: మంతుకెక్క తిరుమంత్రపఠనమే
సంతతమును మాసంధ్య
కంతుగురుఁడు వేంకటగిరిరాయని-
సంతర్పణమే మాసంధ్య

రేకు: 0002-05 మాళవిశ్రీ సం: 01-011 భక్తి
పల్లవి: ఇందుకొరకె యిందరును నిట్లయిరి
కిందుపడి మఱికాని గెలుపెఱఁగరాదు
చ. 1: అటమటపువేడుకల నలయించి మఱికదా
ఘటియించుఁ బరము తటుకన దైవము
ఇటు సేయ నీశ్వరున కీసు గలదా? లేదు.
కుటిలమతిఁ గని కాని గుణిఁ గానరాదు
చ. 2: బెండుపడ నవగతులఁ బెనఁగించి మఱికదా
కొండనుచుఁ బర మొసంగును దైవము
బండుసేయఁగ హరికి బంతమా? యటుగాదు.
యెండదాఁకక నీడహిత వెఱఁగరాదు
చ. 3: మునుప వేల్పులకెల్ల మ్రొక్కించి మఱికదా
తనభ క్తి యొసఁగు నంతట దైవము
ఘనవేంకటేశునకు గపటమా? అటుగాదు.
తినక చేఁదునుఁ దీపు తెలియనేరాదు.

రేకు: 0002-06 ధన్నాసి సం: 01-012 వేంకటగానం
పల్లవి: సందడి విడువుము సాసముఖా
మంధరధరునకు మజ్జనవేళా
చ. 1: అమరాధిపు లిడుఁ డాలవట్టములు
కమలజ పట్టుము కాళాంజి
జమలిచామరలు చంద్రుఁడ సూర్యుఁడ
అమర నిడుఁడు పరమాత్మునకు
చ. 2: అణిమాదిసిరులనలరెడు శేషుఁడ
మణిపాదుక లిడు మతి చెలఁగా
ప్రణుతింపు కదిసి భారతీరమణ
గుణాధిపు మరుగురు బలుమరును
చ. 3: వేదఘోషణము విడువక సేయుఁడు
ఆదిమునులు నిత్యాధికులు
శ్రీదేవుండగు శ్రీవేంకటపతి
ఆదరమున సిరు లందీ వాఁడె

రేకు: 0002-07 శంకరాభరణం సం: 01-013 నృసింహ
పల్లవి: మలసీఁ జూడరో మగ సింహము
అలని మీఱిన మాయల సింహము
చ. 1: అదివో చూడరో ఆదిమపురుషుని
పెదయౌభళము మీఁది పెనుసింహము
వెదకి బ్రహ్మాదులు వేదాంతతతులు
కదిసి కానఁగలేని ఘనసింహము
చ. 2: మెచ్చిమెచ్చి చూడరో మితిమీఱినయట్టి-
చిచ్చిఱకంటితోడి జిగిసింహము
తచ్చినవారిధిలోన తరుణిఁ గౌఁగిటఁ జేర్చి
నచ్చినగోళ్ళ శ్రీనరసింహము
చ. 3: బింకమునఁ జూడరో పిరితియ్యక నేఁడు
అంకపుదనుజసంహారసింహము
వేంకటనగముపై వేదాచలముపై
కింక లేక వడిఁ బెరిగినసింహము