తాళ్ళపాక పదసాహిత్యం/మూడవ సంపుటం/రేకు 299
రేకు: 0299-01 శంకరాభరణం సం: 03-572 శరణాగతి
పల్లవి:
తన చిత్తము కొలఁది తమకించ నిఁకనేల
మనసు వచ్చినప్పుడే మన్నించీఁ గాక
చ. 1:
కొండలందు నదులందుఁ గోరి యాకసాన భువి
నిండియున్నాఁడు తొలుతే నీలవర్ణుఁడు
అండనే నాయందు లోకులందు నుండుటరుదా
గండికాఁడై తన మాయ గాననీఁడుఁ గాక
చ. 2:
గాలియై పంచమ(?) వాద్యగతులై శబ్దములై
ఆలకించి పలికీని యాదిమూరితి
నాలుక కొననే వుండి నానాభాష లాడీని
కాలముతో నెదిరికిఁ గాననీఁడుఁ గాక
చ. 3:
వేదమందు శాస్త్రమందు వేవేలు వాదములందు
పాదుకొని బోధించీఁ బరమాత్ముఁడు
యీదెసనే శ్రీవేంకటేశుఁడై పొడచూపె
గాదిలి తన దాసులఁ గరుణించీఁ గాక
రేకు: 0299-02 లలిత సం: 03-573 శరణాగతి
పల్లవి:
శ్రీపతి యొకఁడే శరణము మాకును
తేప యితఁడె మఱి తెరఁగేది
చ. 1:
ఆసలు మిగులా నాతుమ నున్నవి
యీసు లేని సుఖ మెక్కడిది
చేసిన పాపము చేతుల నున్నది
మోసపోని గతి ముందర నేది
చ. 2:
కోపము గొందుల గుణముల నున్నది
యేపున నిజసుఖ మిఁక నేది
దీపనాగ్నితోఁ దిరిగెటి దేహము
పైపై విరతికిఁ బట్టేది
చ. 3:
పంచేంద్రియముల పాలిటి బదు కిది
యించుక నిలుకడ కెడ యేది
యెంచఁగ శ్రీవేంకటేశ్వరుఁ డొకడే
పంచిన విధులను పాలించుఁ గాక
రేకు: 0299-03 మాళవిగౌళ సం: 03-574 నామ సంకీర్తన
పల్లవి:
నారాయణ నీ నామమహిమలకు
గోరఁ బోవుటకు గొడ్డలి దగునా
చ. 1:
హరియని నొడిగిన నణఁగేటి పాపము
సిరుల నేను నుతిసేయఁగఁగలనా
పరగిన పిచ్చుకపై బ్రహ్మాస్త్రము
దొరకొని వూరకె తొడిగినయట్లు
చ. 2:
అచ్చుత యనఁగా నందెటి సంపద
యిచ్చల నెంచిన నిలఁగలవా
కొచ్చికొచ్చి యొక కొండంత కనకము
వెచ్చపుఁ బోఁకకు వెల యిడినట్లు
చ. 3:
యెదుటనే శ్రీవేంకటేశ్వర యనఁగాఁ
బొదిగెటి తపముల పుణ్యము గలదా
కదిసి సముద్రము గడచి వోడలోఁ
జిదిసి యినుము దెచ్చినయట్లు
రేకు: 0299-04 లలిత సం: 03-575 శరణాగతి
పల్లవి:
నీవెటు దలఁచిన నిఖిలము నట్టౌ
యేవల స్వతంత్ర మింతా నీది
చ. 1:
యేఁటి పురాకృత మెక్కడి కర్మము
దాఁటక హరి నీ దయ గలిగితే
నీటున నిన్నియు నీ కల్పితములు
పాటించి నీవే పాపఁగలేవా
చ. 2:
యెక్కడి జన్మము లెక్కడి మరణము-
లొక్కఁడవె నీవు వొద్దంటే
యెక్కువ నిందరి నేలెటివాఁడవు
యిక్కడఁ గొలిచితి మితరము లేలా
చ. 3:
యేది పాపము యేది పుణ్యము
పోదిగ నీవే పొమ్మంటే
చేదో డిందుకు శ్రీవేంకటేశ్వర
ఆదె నిను శరణంటిమి గొంత
రేకు: 0299-05 ముఖారి సం: 03-576 వైరాగ్య చింత
పల్లవి:
నానాఁటి బదుకు నాఁటకము
కానక కన్నది కైవల్యము
చ. 1:
పుట్టుటయు నిజము పోవుటయు నిజము
నట్టనడిమి పని నాఁటకము
యెట్టనెదుటఁ గలదీ ప్రపంచమును
కట్టఁగడపటిది కైవల్యము
చ. 2:
కుడిచే దన్నము కోక చుట్టెడిది
నడుమంత్రపు పని నాఁటకము
వొడిఁ గట్టుకొనిన వుభయకర్మములు
గడి దాఁటినపుడే కైవల్యము
చ. 3:
తెగదు పాపమును తీరదు పుణ్యము
నగినగి కాలము నాఁటకము
యెగువనె శ్రీవేంకటేశ్వరుఁ డేలిక
గగనము మీఁదిది కైవల్యము
రేకు: 0299-06 సాళంగనాట సం: 03-577 కృష్ణ
పల్లవి:
ముద్దుగారే యశోద ముంగిటి ముత్యము వీఁడు
తిద్దరాని మహిమల దేవకిసుతుఁడు
చ. 1:
అంతనింత గొల్లెతల అరచేతి మాణికము
పంతమాడే కంసుని పాలి వజ్రము
కాంతుల మూఁడులోకాల గరుడపచ్చఁబూస
చెంతల మాలోనున్న చిన్నికృష్ణుఁడు
చ. 2:
రతికేలి రుక్మిణికి రంగు మోవి పగడము
మితి గోవర్ధనపు గోమేధికము
సతమై శంఖచక్రాల సందుల వైడూర్యము
గతియై మమ్ముఁ గాచేటి కమలాక్షుఁడు
చ. 3:
కాళింగుని తలల పైఁ గప్పిన పుష్యరాగము
యేలేటి శ్రీవేంకటాద్రి యింద్రనీలము
పాలజలనిధిలోనఁ బాయని దివ్యరత్నము
బాలుని వలెఁ దిరిగీఁ బద్మనాభుఁడు