రేకు: 0339-01 మాళవశ్రీ సం: 04-226 విష్ణు కీర్తనం
| పల్లవి : |
వేగిరించనేల విష్ణుఁడే యింతకుఁ గర్త
బాగుగా నాతనియిచ్చఁ బరగుటేకాక
|
|
| చ. 1: |
తలపోఁతలేల దైవము గలుగఁగాను
చెలఁగి యాతఁడే యిన్నీఁ జేసీఁగాక
యిల నేఁడె పుట్టెనా యింకాఁ గలది గాదా
పలులోకాలు నడప భారము దేవునిదే
|
|
| చ. 2: |
చింత లిఁకనేలా శ్రీపతి గలుగఁగాను
మంతుకుఁ బుట్టించి తానే మనుపుఁగాక
వింతా యీ దేహము వేరా యీ యింద్రియాలు
యింతట బ్రహ్మాండనాథుఁ డిందరికి నొకఁడే
|
|
| చ. 3: |
సిలుఁగు గోరికలేల శ్రీవేంకటేశ్వరుఁడు
కలఁ డాతఁడే మనలఁ గాచీఁగాక
వెలసి యాతనిమాయే విశ్వమింతా నిండినది
తెలిపి రక్షించుటకు దిక్కు దెస యితఁడే
|
|
రేకు:0339-02 వరాళి సం: 04-227 వైరాగ్య చింత
| పల్లవి : |
అటు గొన్నాళ్లందాఁక యిటు గొన్నాళ్లిందాఁక
కటకటా శునకపు గతి యాయఁ గావవే
|
|
| చ. 1: |
పసిమిఁ బాపమనేటి బందెలు మేసితిని
కసరి దేహపు కట్టుగాడి నుంటిని
కొసరి కర్మపుమెడగుదియ మోఁచితిని
పసురమువంటివాఁడఁ బాలించవే
|
|
| చ. 1: |
పంచేంద్రియములనే బాడిగె మోఁచితిని
అంచపు సంసారమనే లాడిఁబడితి
పంచల వాసలచేత బందమ పెట్టించుకొంటి
ముంచినగుఱ్ఱమువంటి మూఢుఁడఁ గావవే
|
|
| చ. 1: |
మరిగి 'యజ్ఞాన'మనేమద మెత్తి తిరిగితి
'మరుఁ'డనే మావటీని మాయఁ జిక్కితి
గరిమ శ్రీవేంకటేశ కరిఁ గాచితివిగాన
కరి నైతి నన్ను నీవు కరుణించవే
|
|
రేకు: 0339-03 దేసి సం: 04-228 మనసా
| పల్లవి : |
లోకమంతా నిండె లోచూపు వెలిచూపు
శ్రీకాంతుఁడై తోఁచె చిక్కినవి యాలా
|
|
| చ. 1: |
సకలజీవులలోన సర్వేశ్వరుఁడు వాఁడె
వొకరి నౌఁగాదన నోపను నేను
అకట యాతనిచేఁతే అందరునుఁ జేసేవారే
వికటాలెందుకు నాడ వెరపయ్యీ నాకు
|
|
| చ. 2: |
భువియందు దీని యందు పురుషోత్తముఁడు వాఁడె
వివరించ మేలు గీడు వెదక నే నోప
చెవి విన్న మాటలెల్ల శ్రీపతియై తోఁచీని
ఇవల కల్లనిజాలు యెంచఁజాల నేను
|
|
| చ. 3: |
పగటందు రేయందు పరమాత్ముఁడు వీఁడె
తగిలి పాసే నన్న తలఁపునోప
జగి మించ నాలోన శ్రీవేంకటేశుఁడే
బగివాయఁ డెన్నఁడును బదుకవో మనసా
|
|
రేకు: 0339-04 లలిత సం: 04-229 నామ సంకీర్తన
| పల్లవి : |
వర్ణాశ్రమములాల వడిఁ జిత్రగుప్తులాల
వర్ణించి మమ్మిఁకఁ దడవకురో మీరు
|
|
| చ. 1: |
చదువులు దెచ్చినట్టి సర్వేశుఁ గొలిచితి
చదువు నామారతఁడు చదివీఁ బోరో
అదన యోగీంద్రవంద్యుఁడైన కృష్ణుఁ గొలిచితి
చదల నాయోగములు సాధించు నతఁడే
|
|
| చ. 2: |
కూరిమి యజ్ఞకర్తైనగోవిందుఁ దలఁచితి
చేరి నామారతఁ డవి సేసీఁ బోరో
ఆరయ విజ్ఞానమూర్తియైన హరి శరణంటి
వూరకే నాకాతఁడవి వుత్తరువిచ్చీని
|
|
| చ. 3: |
దేవతాశిఖామణియైన దేవునిఁ బూజించితిని
దేవఋషి ఋణములు తీరిచీఁబోరో
శ్రీవేంకటేశ్వరుఁడు చిత్తములో నున్నవాఁడు
చేవఁ బాపాలెల్లఁ బాసె సెలవిచ్చెఁ జేతలు
|
|
రేకు: 0339-05 దేశాక్షి సం: 04-230 నామ సంకీర్తన
| పల్లవి : |
ఊరకే నోరుమూసుక వొంటి నీకు మొక్కేమయ్య
చేరి నారాయణ నీవు చేసినట్టు సేయవే
|
|
| చ. 1: |
హరినామముఁ దలఁచి అణఁచేనంటేనయ్య
సరి నా పాతకములు చాల వందుకు
నరహరినామ మెంచి నాకుఁ గూడపెట్టేనంటే
అరుదైన పుణ్యములు అన్నిలేవు భూమిని
|
|
| చ. 2: |
రామనామము నొడిగి రవ్వల బోఁజోఁపే నంటే
తామసపునరకాలు దగ్గరవందు
వామననామమెంచి వరస్వర్గ మెక్కేనంటే
యేమిటా నాకడ వారికెడచా దదియు
|
|
| చ. 3: |
గోవిందనామముచేతఁ గుదించే భవములంటే
పావనమాయను నీభక్తివల్లను
శ్రీవేంకటేశ నేను చేకొని నీశరణంటి
యేవిధులు నెరఁగను యిదివో నీచిత్తము
|
|
రేకు: 0339-06 బౌళి రామక్రియ సం: 04-231 వైష్ణవ భక్తి
| పల్లవి : |
జ్ఞానంబొకటే జగమున కధికం మరి
నానావిధములు నటనలు
|
|
| చ. 1: |
బహుదానఫలము పడయుటకంటే
యిహమున వైరాగ్య మెక్కుడు
సహజకర్మములు శతములకంటే
అహిశయనుని భక్తధికము
|
|
| చ. 2: |
ధరఁ దపములనంతంబులకంటే
గరిమల శాంతము ఘనము
విరసాచారము వేవేలకంటే
హరినామపఠన మధికము
|
|
| చ. 3: |
ఆవల వ్రతములు అన్నిటికంటే
శ్రీవైష్ణవమే శేఖరము
శ్రీవేంకటేశ్వరుచేఁతలె యివిగన
సేవ యిదొకటే చింతింప ఘనము
|
|
