రేకు: 0340-01 మంగళకౌశిక సం: 04-232 భక్తి
| పల్లవి : |
మమ్ముఁజూడనేల నీమహిమే చూతువుగాక
వుమ్మడిఁ బరుస మంటే దొక్కమాఁటేకాదా
|
|
| చ. 1: |
పెక్కుమారులు నిన్నుఁ బేరుకొని జపించఁగ
మక్కళించి నీకుఁ గొంత మహిమెక్కినా
వొక్కమారు జపించి నే నూరకుండినంతలోనే
తక్కక నీమహిమలోఁ దరగి పోయీనా
|
|
| చ. 2: |
తగిలి నేఁ గాలమెల్ల ధ్యానము సేయఁగ నీకు
జిగి నీమేనికిఁ గింత చేవ యెక్కీనా
అగపడి యొకవేళ నటు దలఁచి మానితే
చిగురై యంతటిలోనె చిక్కి వాడీనా
|
|
| చ. 3: |
యిన్ని యాల శ్రీవేంకటేశ మాయింటిలోననే
వున్నతి నీవారమని వుంటేఁ జాలు
సన్నము దొడ్డించనేల సరివలసీచోట
అన్నియు నిత్యమింతే యలమట కోపము
|
|
రేకు: 0340-02 మాళవి సం: 04-233 అంత్యప్రాస
| పల్లవి : |
ఇదిగో రూపై తోఁచీ యిందరియెదుట నివి
మదిఁ జేపట్టేదిలేక మానెఁగాని
|
|
| చ. 1: |
కోపమై పొడచూపుఁ గొంత పాపము
దీపమై పొడచూపు దేహ పాపము
మాపులు నిద్దురై చూపు మరికొంత పాపము
కైపుగాఁ బరుల నింద కడమ పాపము
|
|
| చ. 2: |
శాంతమే పుణ్యము సత్యదయే పుణ్యము
అంతటాను హరిభక్తి యది పుణ్యము
చింతించ వైరాగ్యమే చేతిలోని పుణ్యము
మంతనపుజ్ఞానమే మహిఁగల పుణ్యము
|
|
| చ. 3: |
హరినామమే ముక్తి యరసి కైకొంటేను
ధర నాతనిదాస్యమే తగిన ముక్తి
సొరిది శ్రీవేంకటేశుఁడే పరతత్వము
యిరవై కొలుచుటే యిహ నిత్యముక్తి
|
|
రేకు: 0340-03 పాడి సం: 04-234 కృష్ణ
| పల్లవి : |
అనుచుఁ బొగడఁ జొచ్చెరదె బ్రహ్మాదులు మింట
మొనసి యీ బాలునికే మొక్కేము నేము
|
|
| చ. 1: |
వున్నతపు లోకములు వుదరాన నున్నవాఁడు
అన్నువ నీ దేవకీ గర్భమందు పుట్టెను
మన్నించి యోగీంద్రులమదిలోనుండెడువాఁడు
పన్నిన పొత్తులలోన బాలుఁడై వున్నాఁడు
|
|
| చ. 2: |
పాలజలధిలోన పాయనిగోవిందుఁడు
పాలు వెన్న లారగించె పైఁడికోరను
వోలిఁ దన విష్ణుమాయ నోలలాడినట్టివాఁడు
చాలి మంత్రసానులచే జలకమాడీని
|
|
| చ. 3: |
ముగురువేల్పులకు మూలమైన యట్టివాఁడు
తగుబలభద్రునికి తమ్ముఁడాయను
నిగిడి వైకుంఠమున నిలిచి రేపల్లెనుండి
యెగువ శ్రీవేంకటాద్రి నిరవాయ వీఁడే
|
|
రేకు: 0340-04 శుద్ధవంతం సం: 04-235 భక్తి
| పల్లవి : |
హరిపూజే బ్రహ్మాండ మవ్వలి కవ్వల గాని
యెరవెల్లా నాసందికీసందివే
|
|
| చ. 1: |
తపములు జపములు దానధర్మములెల్ల
యెపుడును బ్రహ్మలోక మీసందివే
విపరీతభోగాలు వెలలేనిపుణ్యాలు
కపురులు స్వర్గలోకముకాడివే
|
|
| చ. 2: |
వట్టి సటరాజసాలు వర్ణాశ్రమములును
పుట్టుగులిన్నియును యీభూమిమీఁదివే
చుట్టపు సంబంధాలు జోలి వావివర్తనలు
దిట్టతనములెల్ల యీదేహముతోడివే
|
|
| చ. 3: |
పూఁటపూఁటకోరికలు పొరలేవుపాయాలు
మాఁటలుఁదేటలునెల్ల మతిలోనివే
గాఁటపు శ్రీవేంకటేశుగని కొలిచినఁజాలు
నాఁటకపు మతములు నవ్వులలోనివే
|
|
రేకు: 0340-05 హిందోళం సం: 04-236 నామ సంకీర్తన
| పల్లవి : |
ఉన్న సుద్దులేల మాకు వూర విచారములెల్ల
వెన్నునికి మొక్కుటే వేవేలు మాకు
|
|
| చ. 1: |
నగధర నందగోప నరసింహ వామన
జగదేకపతియనే జపము మాది
తగు హరిడింగరీఁడ దాసుఁడ బంటననేటి-
మిగులఁ బెద్దతనము మించేది మాకు
|
|
| చ. 2: |
హరి పుండరీకాక్ష ఆదినారాయణయనేటి-
ధర నామమంత్రములే ధనము మాకు
సరుస శంఖచక్రాలు సర్వేశుదాసుల సేవె
మరిగినదె మామతమును మనికె
|
|
| చ. 3: |
శ్రీవేంకటేశయని శేషగిరివేదాద్రి
భావించి కొలుచుటే మాబ్రదుకెల్లను
కైవల్యమిదియె కంటి మిట్టి మంచిత్రోవ
పావనమైతిమి మమ్ముఁ బాలించె నితఁడు
|
|
రేకు: 0340-06 శంకరాభరణం సం: 04-237 కృష్ణ
| పల్లవి : |
ఏఁటి బిడ్డఁ గంటివమ్మ యెశోదమ్మ
గాఁటపు దేవతలెల్లఁ గాచుకున్నా రితని
|
|
| చ. 1: |
చెక్కుమీఁటి పాలువోయి చేరి నోరు దెరచితే
పక్కుననుఁ బొడచూపె బ్రహ్మాండాలు
అక్కున నలముకొంటే సంగజతాపము మోఁచె
మక్కువకు వెరతుము మాయపు బాలునికి
|
|
| చ. 2: |
పొత్తులలో నుండఁగానె భుజాలు నాలుగుదోఁచె
యిత్తల బాలునికేవి యిటువంటివి
యెత్తుకొన్న వేకమై యెవ్వరికి వసగాఁడు
హత్తిచూడ వెరతు మీ యారడిబాలునికి
|
|
| చ. 3: |
తేఱి వీనితోడిముద్దు దేవలోకము పనులు
మీఱి యేవి చూచినాను మితిలేనివి
ఆఱడిగొల్లెతలము అట్టె కూడి యాడితిమి
వేఱు సేయ వెరతు శ్రీవేంకటాద్రిబాలుని
|
|
