అధర్వణవేదము - కాండము 8 - సూక్తము 7
| ←ముందరి అధ్యాయము | అధర్వణవేదము (అధర్వణవేదము - కాండము 8 - సూక్తము 7) | తరువాతి అధ్యాయము→ |
యా బభ్రవో యాశ్చ శుక్రా రోహిణీరుత పృశ్నయః |
అసిక్నీః కృష్ణా ఓషధీః సర్వా అఛావదామసి ||1||
త్రాయన్తామిమం పురుసం యక్ష్మాద్దేవేషితాదధి |
యాసామ్ద్యౌః పితా పృథివీ మాతా సముద్రో మూలం వీరుధాం బభూవ ||2||
ఆపో అగ్రం దివ్యా ఓషధయః |
తాస్తే యక్ష్మమేనస్య మఙ్గాదఙ్గాదనీనశన్ ||3||
ప్రస్తృణతీ స్తమ్బినీరేకశుఙ్గాః ప్రతన్వతీరోషధీరా వదామి |
అంశుమతీః కణ్డినీర్యా విశాఖా హ్వయామి తే వీరుధో వైశ్వదేవీరుగ్రాః పురుషజీవనీః ||4||
యద్వః సహః సహమానా వీర్యం యచ్చ వో బలమ్ |
తేనేమమస్మాద్యక్ష్మాత్పురుషం ముఞ్చతౌషధీరథో కృణోమి భేషజమ్ ||5||
జీవలాం నఘారిషాం జీవన్తీమోషధీమహమ్ |
అరున్ధతీమున్నయన్తీం పుష్పామ్మధుమతీమిహ హువే ऽస్మా అరిష్టతాతయే ||6||
ఇహా యన్తు ప్రచేతసో మేదినీర్వచసో మమ |
యథేమం పారయామసి పురుషం దురితాదధి ||7||
అగ్నేర్ఘాసో అపాం గర్భో యా రోహన్తి పునర్ణవాః |
ధ్రువాః సహస్రనామ్నీర్భేషజీః సన్త్వాభృతాః ||8||
అవకోల్బా ఉదకాత్మాన ఓషధయః |
వ్యృషన్తు దురితం తీక్ష్ణశృఙ్గ్యః ||9||
ఉన్ముఞ్చన్తీర్వివరుణా ఉగ్రా యా విషదూషనీః |
అథో బలాసనాశనీః కృత్యాదూషణీశ్చ యాస్తా ఇహా యన్త్వోషధీహ్ ||10||
అపక్రీతాః సహీయసీర్వీరుధో యా అభిష్టుతాః |
త్రాయన్తామస్మిన్గ్రామే గామశ్వం పురుషం పశుమ్ ||11||
మధుమన్మూలం మధుమదగ్రమాసామ్మధుమన్మధ్యం వీరుధాం బభూవ |
మధుమత్పర్ణం మధుమత్పుష్పమాసాం మధోః సమ్భక్తా అమృతస్య భక్షో ఘృతమన్నం దుహ్రతాం గోపురోగవమ్ ||12||
యావతీః కియతీశ్చేమాః పృథివ్యామధ్యోషధీః |
తా మా సహస్రపర్ణ్యో మృత్యోర్ముఞ్చన్త్వంహసః ||13||
వైయాఘ్రో మణిర్వీరుధాం త్రాయమానో ऽభిశస్తిపాహ్ |
అమీవాః సర్వా రక్షాంస్యప హన్త్వధి దూరమస్మత్ ||14||
సింహస్యేవ స్తనథోః సం విజన్తే ऽగ్నేరివ విజన్తే ఆభృతాభ్యః |
గవాం యక్ష్మః పురుషాణాం వీరుద్భిరతినుత్తో నావ్యా ఏతు స్రోత్యాః ||15||
ముముచానా ఓషధయో ऽగ్నేర్వైశ్వానరాదధి |
భూమిం సంతవతీరిత యాసాం రాజా వనస్పతిః ||16||
యా రోహన్త్యాఙ్గిరసీః పర్వతేషు సమేషు చ |
తా నః పయస్వతీః శివా ఓషధీః సన్తు శం హృదే ||17||
యాశ్చాహం వేద వీరుధో యాశ్చ పశ్యామి చక్షుషా |
అజ్ఞాతా జానీమశ్చ యా యాసు విద్మ చ సంభృతమ్ ||18||
సర్వాః సమగ్రా ఓషధీర్బోధన్తు వచసో మమ |
యథేమం పారయామసి పురుషమ్దురితాదధి ||19||
అశ్వత్థో దర్భో వీరుధాం సోమో రాజామృతం హవిః |
వ్రీహిర్యవశ్చ భేషజౌ దివసి పుత్రావమర్త్యౌ ||20||
ఉజ్జిహీధ్వే స్తనయత్యభిక్రన్దత్యోషధీః |
యదా వః పృశ్నిమాతరః పర్జన్యో రేతసావతి ||21||
తస్యామృతస్యేమం బలం పురుషం పయయామసి |
అథో కృణోమి భేషజం యథాసచ్ఛతహాయనః ||22||
వరాహో వేద వీరుధం నకులో వేద భేషజీమ్ |
సర్పా గన్ధర్వా యా విదుస్తా అస్మా అవసే హువే ||23||
యాః సుపర్ణా ఆఙ్గిరసీర్దివ్యా యా రఘతో విదుః |
వయాంసి హంసా యా విదుర్యాస్చ సర్వే పతత్రిణః |
మృగా యా విదురోషధీస్తా అస్మా అవసే హువే ||24||
యావతీనామోషధీనాం గావః ప్రాశ్నన్త్యఘ్న్యా యవతీనామజావయః |
తావతీస్తుభ్యమోషధీః శర్మ యఛన్త్వాభృతాః ||25||
యావతీషు మనుష్యా భేషజం భిషజో విదుః |
తావతీర్విశ్వభేషజీరా భరామి త్వామభి ||26||
పుష్పవతీహ్ప్రసూమతీః పలినీరపలా ఉత |
సంమాతర ఇవ దుహ్రామస్మా అరిష్టతాతయే ||27||
ఉత్త్వాహార్షం పఞ్చశలాదథో దశశలాదుత |
అథో యమస్య పడ్వీశాద్విశ్వస్మాద్దేవకిల్బిషాత్ ||28||
| ←ముందరి అధ్యాయము | అధర్వణవేదము | తరువాతి అధ్యాయము→ |