అధర్వణవేదము - కాండము 5 - సూక్తములు 1 నుండి 5 వరకూ
| ←ముందరి అధ్యాయము | అధర్వణవేదము (అధర్వణవేదము - కాండము 5 - సూక్తములు 1 నుండి 5 వరకూ) | తరువాతి అధ్యాయము→ |
అధర్వణవేదము - కాండము 5 - సూక్తము 1[మార్చు]
ఋధఙ్మన్త్రో యోనిం య ఆబభూవమృతాసుర్వర్ధమానః సుజన్మా |
అదబ్ధాసుర్భ్రాజమానో ऽహేవ త్రితో ధర్తా దాధార త్రీణి ||౧||
ఆ యో ధర్మాణి ప్రథమః ససాద తతో వపూంషి కృణుషే పురూణి |
ధాస్యుర్యోనిం ప్రథమ ఆ వివేశా యో వాచమనుదితాం చికేత ||౨||
యస్తే శోకాయ తన్వం రిరేచ క్షరద్ధిరణ్యం శుచయో ऽను స్వాః |
అత్రా దధేతే అమృతాని నామాస్మే వస్త్రాణి విశ ఏరయన్తామ్ ||౩||
ప్ర యదేతే ప్రతరం పూర్వ్యం గుః సదఃసద ఆతిష్ఠన్తో అజుర్యమ్ |
కవిః శుషస్య మాతరా రిహాణే జామ్యై ధుర్యం పతిమేరయేథామ్ ||౪||
తదూ షు తే మహత్పృథుజ్మన్నమః కవిః కావ్యేన కృణోమి |
యత్సమ్యఞ్చావభియన్తావభి క్షామత్రా మహీ రోధచక్రే వావృధేతే ||౫||
సప్త మర్యాదాః కవయస్తతక్షుస్తాసామిదేకామభ్యంహురో గాత్ |
ఆయోర్హ స్కమ్భ ఉపమస్య నీడే పథాం విసర్గే ధరుణేషు తస్థౌ ||౬||
ఉతామృతాసుర్వ్రత ఏమి కృన్వన్నసురాత్మా తన్వ౧స్తత్సుమద్గుః |
ఉత వా శక్రో రత్నం దధాత్యూర్జయా వా యత్సచతే హవిర్దాః ||౭||
ఉత పుత్రః పితరం క్షత్రమీడే జ్యేష్ఠం మర్యాదమహ్వయన్త్స్వస్తయే |
దర్శన్ను తా వరుణ యాస్తే విష్ఠా ఆవర్వ్రతతః కృణవో వపూంషి ||౮||
అర్ధమర్ధేన పయసా పృణక్ష్యర్ధేన శుష్మ వర్ధసే అముర |
అవిం వృధామ శగ్మియం సఖాయం వరుణం పుత్రమదిత్యా ఇషిరమ్ |
కవిశస్తాన్యస్మై వపూంష్యవోచామ రోదసీ సత్యవాచా ||౯||
అధర్వణవేదము - కాండము 5 - సూక్తము 2[మార్చు]
తదిదాస భువనేషు జ్యేష్ఠమ్యతో యజ్ఞ ఉగ్రస్త్వేషనృమ్ణః |
సద్యో జజ్ఞానో ని రిణాతి శత్రూనను యదేనం మదన్తి విశ్వ ఊమాః ||౧||
వవృధానః శవసా భూర్యోజాః శత్రుర్దాసాయ భియసం దధాతి |
అవ్యనచ్చ వ్యనచ్చ సస్ని సం తే నవన్త ప్రభృతా మదేషు ||౨||
త్వే క్రతుమపి పృఞ్చన్తి భూరి ద్విర్యదేతే త్రిర్భవన్త్యూమాః |
స్వదోః స్వాదీయః స్వాదునా సృజా సమదః సు మధు మధునాభి యోధీః ||౩||
యది చిన్ను త్వా ధనా జయన్తం రణేరణే అనుమదన్తి విప్రాః |
ఓజీయః శుష్మిన్త్స్థిరమా తనుష్వ మా త్వా దభన్దురేవాసః కశోకాః ||౪||
త్వయా వయం శాశద్మహే రణేషు ప్రపశ్యన్తో యుధేన్యాని భూరి |
చోదయామి త ఆయుధా వచోభిః సం తే శిశామి బ్రహ్మణా వయాంసి ||౫||
ని తద్దధిషే ऽవరే పరే చ యస్మిన్నావిథావసా దురోణే |
ఆ స్థాపయత మాతరం జిగత్నుమత ఇన్వత కర్వరాణి భూరి ||౬||
స్తుష్వ వర్ష్మన్పురువర్త్మానం సమృభ్వాణమినతమమాప్తమాప్త్యానామ్ |
ఆ దర్శతి శవసా భూర్యోజాః ప్ర సక్షతి ప్రతిమానం పృథివ్యాః ||౭||
ఇమా బ్రహ్మ బృహద్దివః కృణవదిన్ద్రాయ శూషమగ్రియః స్వర్షాః |
మహో గోత్రస్య క్షయతి స్వరాజా తురశ్చిద్విశ్వమర్ణవత్తపస్వాన్ ||౮||
ఏవా మహాన్బృహద్దివో అథర్వావోచత్స్వాం తన్వ౧మిన్ద్రమేవ |
స్వసారౌ మాతరిభ్వరీ అరిప్రే హిన్వన్తి చైనే శవసా వర్ధయన్తి చ ||౯||
అధర్వణవేదము - కాండము 5 - సూక్తము 3[మార్చు]
మమాగ్నే వర్చో విహవేష్వస్తు వయం త్వేన్ధానాస్తన్వమ్పుషేమ |
మహ్యం నమన్తాం ప్రదిశశ్చతస్రస్త్వయాధ్యక్షేణ పృతనా జయేమ ||౧||
అగ్నే మన్యుం ప్రతినుదన్పరేషాం త్వం నో గోపాః పరి పాహి విశ్వతః |
అపాఞ్చో యన్తు నివతా దురస్యవో ऽమైషాం చిత్తం ప్రబుధాం వి నేశత్ ||౨||
మమ దేవా విహవే సన్తు సర్వ ఇన్ద్రవన్తో మరుతో విష్ణురగ్నిః |
మమాన్తరిక్షమురులోకమస్తు మహ్యం వాతః పవతాం కామాయాస్మై ||౩||
మహ్యం యజన్తాం మమ యానీష్టాకూతిః సత్యా మనసో మే అస్తు |
ఏనో మా ని గాం కతమచ్చనాహం విశ్వే దేవా అభి రక్షన్తు మేహ ||౪||
మయి దేవా ద్రవిణమా యజన్తాం మయి ఆశీరస్తు మయి దేవహూతిః |
దైవాః హోతారః సనిషన్న ఏతదరిష్టాః స్యామ తన్వా సువీరాః ||౫||
దైవీః షడుర్వీరురు నః కృణోత విశ్వే దేవాస ఇహ మాదయధ్వమ్ |
మా నో విదదభిభా మో అశస్తిర్మా నో విదద్వృజినా ద్వేష్యా యా ||౬||
తిస్రో దేవీర్మహి నః శర్మ యఛత ప్రజాయై నస్తన్వే౩ యచ్చ పుష్టమ్ |
మా హాస్మహి ప్రజయా మా తనూభిర్మా రధామ ద్విషతే సోమ రాజన్ ||౭||
ఉరువ్యచా నో మహిషః శర్మ యఛత్వస్మిన్హవే పురుహూతః పురుక్షు |
స నః ప్రజాయై హర్యశ్వ మృడేన్ద్ర మా నో రీరిషో మా పరా దాః ||౮||
ధాతా విధాతా భువనస్య యస్పతిర్దేవః సవితాభిమాతిషాహః |
ఆదిత్యా రుద్రా అశ్వినోభా దేవాః పాన్తు యజమానం నిరృథాత్ ||౯||
యే నః సపత్నా అప తే భవన్త్విన్ద్రాగ్నిభ్యామవ బాధామహ ఏనాన్ |
ఆదిత్యా రుద్రా ఉపరిస్పృశో నో ఉగ్రం చేత్తారమధిరాజమక్రత ||౧౦||
అర్వాఞ్చమిన్ద్రమముతో హవామహే యో గోజిద్ధనజిదశ్వజిద్యః |
ఇమం నో యజ్ఞం విహవే శృణోత్వస్మాకమభూర్హర్యశ్వ మేదీ ||౧౧||
అధర్వణవేదము - కాండము 5 - సూక్తము 4[మార్చు]
యో గిరిష్వజాయథా వీరుధాం బలవత్తమః |
కుష్ఠేహి తక్మనాశన తక్మానం నాశయన్నితః ||౧||
సుపర్ణసువనే గిరౌ జాతం హిమవతస్పరి |
ధనైరభి శ్రుత్వా యన్తి విదుర్హి తక్మనాశనమ్ ||౨||
అశ్వత్థో దేవసదనస్తృతీయస్యామితో దివి |
తత్రామృతస్య చక్షణం దేవాః కుష్ఠమవన్వత ||౩||
హిరణ్యయీ నౌరచరద్ధిరణ్యబన్ధనా దివి |
తత్రామృతస్య పుష్పం దేవాః కుష్ఠమవన్వత ||౪||
హిరణ్యయాః పన్థాన ఆసన్నరిత్రాణి హిరణ్యయా |
నావో హిరణ్యయీరాసన్యాభిః కుష్ఠం నిరావహన్ ||౫||
ఇమం మే కుష్ఠ పూరుషం తమా వహ తం నిష్కురు |
తము మే అగదం కృధి ||౬||
దేవేభ్యో అధి జాతో ऽసి సోమస్యాసి సఖా హితః |
స ప్రాణాయ వ్యానాయ చక్షుషే మే అస్మై మృడ ||౭||
ఉదఙ్జాతో హిమవతః స ప్రాచ్యాం నీయసే జనమ్ |
తత్ర కుష్ఠస్య నామాన్యుత్తమాని వి భేజిరే ||౮||
ఉత్తమో నామ కుష్ఠస్యుత్తమో నామ తే పితా |
యక్ష్మం చ సర్వం నాశయ తక్మానం చారసం కృధి ||౯||
శీర్షామయం ఉపహత్యామక్ష్యోస్తన్వో౩ రపః |
కుష్ఠస్తత్సర్వం నిష్కరద్దైవం సమహ వృష్ణ్యమ్ ||౧౦||
అధర్వణవేదము - కాండము 5 - సూక్తము 5[మార్చు]
రాత్రీ మాతా నభః పితార్యమా తే పితామహః |
సిలాచీ నామ వా అసి సా దేవానామసి స్వసా ||౧||
యస్త్వా పిబతి జీవతి త్రాయసే పురుషం త్వమ్ |
భర్త్రీ హి శశ్వతామసి జనానాం చ న్యఞ్చనీ ||౨||
వృక్షంవృక్షమా రోహసి వృషణ్యన్తీవ కన్యలా |
జయన్తీ ప్రత్యాతిష్ఠన్తీ స్పరణీ నామ వా అసి ||౩||
యద్దణ్డేన యదిష్వా యద్వారుర్హరసా కృతమ్ |
తస్య త్వమసి నిష్కృతిః సేమం నిష్కృధి పూరుషమ్ ||౪||
భద్రాత్ప్లక్షాన్నిస్తిష్ఠస్యశ్వత్థాత్ఖదిరాద్ధవాత్ |
భద్రాన్న్యగ్రోధాత్పర్ణాత్సా న ఏహ్యరున్ధతి ||౫||
హిరణ్యవర్ణే సుభగే సూర్యవర్ణే వపుష్టమే |
రుతం గఛాసి నిష్కృతే నిష్కృతిర్నామ వా అసి ||౬||
హిరణ్యవర్ణే సుభగే శుష్మే లోమశవక్షనే |
అపామసి స్వసా లాక్షే వాతో హాత్మా బభూవ తే ||౭||
సిలాచీ నామ కానీనో ऽజబభ్రు పితా తవ |
అశ్వో యమస్య యః శ్యావస్తస్య హాస్నాస్యుక్షితా ||౮||
అశ్వస్యాస్నః సంపతితా సా వృక్షాఁ అభి సిష్యదే |
సరా పతత్రిణీ భూత్వా సా న ఏహ్యరున్ధతి ||౯||
| ←ముందరి అధ్యాయము | అధర్వణవేదము | తరువాతి అధ్యాయము→ |