అధర్వణవేదము - కాండము 20 - సూక్తములు 51 నుండి 60 వరకూ
| ←ముందరి అధ్యాయము | అధర్వణవేదము (అధర్వణవేదము - కాండము 20 - సూక్తములు 51 నుండి 60 వరకూ) | తరువాతి అధ్యాయము→ |
అధర్వణవేదము - కాండము 20 - సూక్తము 51
[మార్చు]అభి ప్ర వః సురాధసమిన్ద్రమర్చ యథా విదే |
యో జరితృభ్యో మఘవా పురూవసుః సహస్రేణేవ శిక్షతి ||1||
శతానీకేవ ప్ర జిగాతి ధృష్ణుయా హన్తి వృత్రాణి దాశుషే |
గిరేరివ ప్ర రసా అస్య పిన్విరే దత్రాణి పురుభోజసః ||2||
ప్ర సు శ్రుతం సురాధసమర్చా శక్రమభిష్టయే |
యః సున్వతే స్తువతే కామ్యం వసు సహస్రేణేవ మంహతే ||3||
శతానీకా హేతయో అస్య దుష్టరా ఇన్ద్రస్య సమిషో మహీః |
గిరిర్న భుజ్మా మఘత్సు పిన్వతే యదీం సుతా అమన్దిషుః ||4||
అధర్వణవేదము - కాండము 20 - సూక్తము 52
[మార్చు]వయం ఘ త్వా సుతావన్త ఆపో న వృక్తబర్హిషః |
పవిత్రస్య ప్రస్రవణేషు వృత్రహన్పరి స్తోతార ఆసతే ||1||
స్వరన్తి త్వా సుతే నరో వసో నిరేక ఉక్థినః |
కదా సుతం తృషాణ ఓక ఆ గమ ఇన్ద్ర స్వబ్దీవ వంసగః ||2||
కణ్వేభిర్ధృష్ణవా ధృసద్వాజం దర్షి సహస్రిణమ్ |
పిశఙ్గరూపం మఘవన్విచర్షణే మక్సూ గోమన్తమీమహే ||3||
అధర్వణవేదము - కాండము 20 - సూక్తము 53
[మార్చు]క ఈం వేద సుతే సచా పిబన్తం కద్వయో దధే |
అయం యః పురో విభినత్త్యోజసా మన్దానః శిప్ర్యన్ధసః ||1||
దానా మృగో న వారణః పురుత్రా చరథం దధే |
నకిష్ట్వా ని యమదా సుతే గమో మహాశ్చరస్యోజసా ||2||
య ఉగ్రః సన్ననిష్టృత స్థిరో రణాయ సంస్కృతః |
యది స్తోతుర్మఘవా శృణవద్ధవం నేన్ద్రో యోషత్యా గమత్ ||3||
అధర్వణవేదము - కాండము 20 - సూక్తము 54
[మార్చు]విశ్వాః పృతనా అభిభూతరం నరం సజూస్తతక్షురిన్ద్రం జజనుశ్చ రాజసే |
క్రత్వా వరిష్ఠం వర ఆమురిముతోగ్రమోజిష్ఠం తవసం తరస్వినమ్ ||1||
సమీం రేభాసో అస్వరన్నిన్ద్రం సోమస్య పీతయే |
స్వర్పతిం యదీం వృధే ధృతవ్రతో హ్యోజసా సమూతిభిః ||2||
నేమిం నమన్తి చక్షసా మేషం విప్రా అభిస్వరా |
సుదీతయో వో అద్రుహో ऽపి కర్ణే తరస్వినః సమృక్వభిః ||3||
అధర్వణవేదము - కాండము 20 - సూక్తము 55
[మార్చు]తమిన్ద్రం జోహవీమి మఘవానముగ్రం సత్రా దధానమప్రతిష్కుతం శవాంసి |
మంహిష్ఠో గీర్భిరా చ యజ్ఞియో వవర్తద్రాయే నో విశ్వా సుపథా కృణోతు వజ్రీ ||1||
యా ఇన్ద్ర భుజ ఆభరః స్వర్వాఁ అసురేభ్యః |
స్తోతారమిన్మఘవన్నస్య వర్ధయ యే చ త్వే వృక్తబర్హిషః ||2||
యమిన్ద్ర దధిషే త్వమశ్వం గాం భాగమవ్యయమ్ |
యజమానే సున్వతి దక్షిణావతి తస్మిన్తం ధేహి మా పణౌ ||3||
అధర్వణవేదము - కాండము 20 - సూక్తము 56
[మార్చు]ఇన్ద్రో మదాయ వావృధే శవసే వృత్రహా నృభిః |
తమిన్మహత్స్వాజిషూతేమర్భే హవామహే స వాజేషు ప్ర నో ऽవిషత్ ||1||
అసి హి వీర సేన్యో ऽసి భూరి పరాదదిః |
అసి దభ్రస్య చిద్వృధో యజమానాయ శిక్షసి సున్వతే భూరి తే వసు ||2||
యదుదీరత ఆజయో ధృష్ణవే ధీయతే ధనా |
యుక్ష్వా మదచ్యుతా హరీ కం హనః కం వసౌ దధో ऽస్మాఁ ఇన్ద్ర వసౌ దధః ||3||
మదేమదే హి నో దదిర్యూథా గవామృజుక్రతుః |
సం గృభాయ పురు శతోభయాహస్త్యా వసు శిశీహి రాయ ఆ భర ||4||
మాదయస్వ సుతే సచా శవసే శూర రాధసే |
విద్మా హి త్వా పురూవసుముప కామాన్త్ససృజ్మహే ऽథా నో ऽవితా భవ ||5||
ఏతే త ఇన్ద్ర జన్తవో విశ్వం పుష్యన్తి వార్యమ్ |
అన్తర్హి ఖ్యో జనానామర్యో వేదో అదాశుషాం తేషాం నో వేద ఆ భర ||6||
అధర్వణవేదము - కాండము 20 - సూక్తము 57
[మార్చు]సురూపకృత్నుమూతయే సుదుఘామివ గోదుహే |
జుహూమసి ద్యవిద్యవి ||1||
ఉప నః సవనా గహి సోమస్య సోమపాహ్పిబ |
గోదా ఇద్రేవతో మదః ||2||
అథా తే అన్తమానాం విద్యామ సుమతీనామ్ |
మా నో అతి ఖ్య ఆ గహి ||3||
శుష్మిన్తమం న ఊతయే ద్యుమ్నినం పాహి జాగృవిమ్ |
ఇన్ద్ర సోమం శతక్రతో ||4||
ఇన్ద్రియాణి శతక్రతో యా తే జనేషు పఞ్చసు |
ఇన్ద్ర తాని త ఆ వృణే ||5||
అగన్నిన్ద్ర శ్రవో బృహద్ద్యుమ్నం దధిష్వ దుష్టరమ్ |
ఉత్తే శుష్మం తిరామసి ||6||
అర్వావతో న ఆ గహ్యథో శక్ర పరావతః |
ఉ లోకో యస్తే అద్రివ ఇన్ద్రేహ తత ఆ గహి ||7||
ఇన్ద్రో అఙ్గ మహద్భయమభీ షదప చుచ్యవత్ |
స హి స్థిరో విచర్షనిః ||8||
ఇన్ద్రశ్చ మృలయాతి నో న నః పశ్చాదఘం నశత్ |
భద్రం భవాతి నః పురః ||9||
ఇన్ద్ర ఆశాభ్యస్పరి సర్వాభ్యో అభయం కరత్ |
జేతా శత్రూన్విచర్షణిః ||10||
క ఈం వేద సుతే సచా పిబన్తం కద్వయో దధే |
అయం యః పురో విభినత్త్యోజసా మన్దానః శిప్ర్యన్ధసః ||11||
దానా మృగో న వారణః పురుత్రా చరథం దధే |
నకిష్ట్వా ని యమదా సుతే గమో మహాంశ్చరస్యోజసా ||12||
య ఉగ్రః సన్ననిష్టృత స్థిరో రణాయ సంస్కృతః |
యది స్తోతుర్మఘవా శృణవద్ధవం నేన్ద్రో యోషత్యా గమత్ ||13||
వయం ఘ త్వా సుతావన్త ఆపో న వృక్తబర్హిషః |
పవిత్రస్య ప్రస్రవణేషు వృత్రహన్పరి స్తోతార ఆసతే ||14||
స్వరన్తి త్వా సుతే నరో వసో నిరేక ఉక్థినః |
కదా సుతం తృషాణ ఓక ఆ గమ ఇన్ద్ర స్వబ్దీవ వంసగః ||15||
కణ్వేభిర్ధృష్ణవా ధృషద్వాజం దర్షి సహస్రిణమ్ |
పిశఙ్గరూపం మఘవన్విచర్షణే మక్షూ గోమన్తమీమహే ||16||
అధర్వణవేదము - కాండము 20 - సూక్తము 58
[మార్చు]శ్రాయన్త ఇవ సూర్యం విశ్వేదిన్ద్రస్య భక్షత |
వసూని జాతే జనమాన ఓజసా ప్రతి భాగం న దీధిమ ||1||
అనర్శరాతిం వసుదాముప స్తుహి భద్రా ఇన్ద్రస్య రాతయః |
సో అస్య కామం విధతో న రోషతి మనో దానాయ చోదయన్ ||2||
బణ్మహాఁ అసి సూర్య బడాదిత్య మహాఁ అసి |
మహస్తే సతో మహిమా పనస్యతే ऽద్ధా దేవ మహాఁ అసి ||3||
బట్సూర్య శ్రవసా మహాఁ అసి సత్రా దేవ మహాఁ అసి |
మహ్నా దేవానామసుర్యః పురోహితో విభు జ్యోతిరదాభ్యమ్ ||4||
అధర్వణవేదము - కాండము 20 - సూక్తము 59
[మార్చు]ఉదు త్యే మధు మత్తమా గిర స్తోమాస ఈరతే |
సత్రాజితో ధనసా అక్షితోతయో వాజయన్తో రథా ఇవ ||1||
కణ్వా ఇవ భృగవః సూర్య ఇవ విశ్వమిద్ధీతమానశుః |
ఇన్ద్రం స్తోమేభిర్మహయన్త ఆయవః ప్రియమేధాసో అస్వరన్ ||2||
ఉదిన్న్వస్య రిచ్యతే ऽంశో ధనం న జిగ్యుసః |
య ఇన్ద్రో హరివాన్న దభన్తి తం రిపో దక్సం దధాతి సోమిని ||3||
మన్త్రమఖర్వం సుధితం సుపేశసం దధాత యజ్ఞియేష్వా |
పూర్వీశ్చన ప్రసితయస్తరన్తి తం య ఇన్ద్రే కర్మణా భువత్ ||4||
అధర్వణవేదము - కాండము 20 - సూక్తము 60
[మార్చు]ఏవా హ్యసి వీరయురేవా శూర ఉత స్థిరః |
ఏవా తే రాధ్యం మనః ||1||
ఏవా రాతిస్తువీమఘ విశ్వేభిర్ధాయి ధాతృభిః |
అఘా చిదిన్ద్ర మే సచా ||2||
మో షు బ్రహ్మేవ తన్ద్రయుర్భువో వాజానాం పతే |
మత్స్వా సుతస్య గోమతః ||3||
ఏవా హ్యస్య సూనృతా విరప్శీ గోమతీ మహీ |
పక్వా శాఖా న దాశుషే ||4||
ఏవా హి తే విభూతయ ఊతయ ఇన్ద్ర మావతే |
సద్యశ్చిత్సన్తి దాశుషే ||5||
ఏవా హ్యస్య కామ్యా స్తోమ ఉక్థం చ శంస్యా |
ఇన్ద్రాయ సోమపీతయే ||6||
| ←ముందరి అధ్యాయము | అధర్వణవేదము | తరువాతి అధ్యాయము→ |