అధర్వణవేదము - కాండము 20 - సూక్తములు 41 నుండి 50 వరకూ
| ←ముందరి అధ్యాయము | అధర్వణవేదము (అధర్వణవేదము - కాండము 20 - సూక్తములు 41 నుండి 50 వరకూ) | తరువాతి అధ్యాయము→ |
అధర్వణవేదము - కాండము 20 - సూక్తము 41
[మార్చు]ఇన్ద్రో దధీచో అస్థభిర్వృత్రాణ్యప్రతిష్కుతః |
జఘాన నవతీర్నవ ||1||
ఇఛనశ్వస్య యచ్ఛిరః పర్వతేష్వపశ్రితమ్ |
తద్విదచ్ఛర్యణావతి ||2||
అత్రాహ గోరమన్వత నామ త్వష్టురపీచ్యమ్ |
ఇత్థా చన్ద్రమసో గృహే ||3||
అధర్వణవేదము - కాండము 20 - సూక్తము 42
[మార్చు]వాచమష్టాపదీమహం నవస్రక్తిమృతస్పృశమ్ |
ఇన్ద్రాత్పరి తన్వమ్మమే ||1||
అను త్వా రోదసీ ఉభే క్రక్షమాణమకృపేతామ్ |
ఇన్ద్ర యద్దస్యుహాభవః ||2||
ఉత్తిష్ఠన్నోజసా సహ పీత్వీ శిప్రే అవేపయః |
సోమమిన్ద్ర చమూ సుతమ్ ||3||
అధర్వణవేదము - కాండము 20 - సూక్తము 43
[మార్చు]భిన్ధి విశ్వా అప ద్విషః బాధో జహీ మృధః |
వసు స్పార్హం తదా భర ||1||
యద్వీలావిన్ద్ర యత్స్థిరే యత్పర్శానే పరాభృతమ్ |
వసు స్పార్హం తదా భర ||2||
యస్య తే విశ్వమానుషో భూరేర్దత్తస్య వేదతి |
వసు స్పార్హం తదా భర ||3||
అధర్వణవేదము - కాండము 20 - సూక్తము 44
[మార్చు]ప్ర సమ్రాజం చర్షణీనామిన్ద్రం స్తోతా నవ్యం గీర్భిః |
నరం నృషాహం మంహిష్ఠమ్ ||1||
యస్మిన్నుక్థాని రణ్యన్తి విశ్వాని చ శ్రవస్య |
అపామవో న సముద్రే ||2||
తం సుష్టుత్యా వివాసే జ్యేష్ఠరాజం భరే కృత్నుమ్ |
మహో వాజినం సనిభ్యః ||3||
అధర్వణవేదము - కాండము 20 - సూక్తము 45
[మార్చు]అయము తే సమతసి కపోత ఇవ గర్భధిమ్ |
వచస్తచ్చిన్న ఓహసే ||1||
స్తోత్రం రాధానాం పతే గిర్వాహో వీర యస్య తే |
విభూతిరస్తు సూనృతా ||2||
ఊర్ధ్వస్తిష్ఠా న ఊతయే ऽస్మిన్వాజే శతక్రతో |
సమన్యేషు బ్రవావహై ||3||
అధర్వణవేదము - కాండము 20 - సూక్తము 46
[మార్చు]ప్రణేతారమ్వస్యో అఛా కర్తారం జ్యోతిః సమత్సు |
సాసహ్వాంసమ్యుధామిత్రాన్ ||1||
స నః పప్రిః పారయాతి స్వస్తి నావా పురుహూతః |
ఇన్ద్రో విశ్వా అతి ద్విషః ||2||
స త్వం న ఇన్ద్ర వాజోభిర్దశస్యా చ గాతుయా చ |
అఛా చ నః సుమ్నం నేషి ||3||
అధర్వణవేదము - కాండము 20 - సూక్తము 47
[మార్చు]తమిన్ద్రం వాజయామసి మహే వృత్రాయ హన్తవే |
స వృషా వృషభో భువత్ ||1||
ఇన్ద్రః స దామనే కృత ఓజిష్ఠః స మదే హితః |
ద్యుమ్నీ శ్లోకీ స సోమ్యః ||2||
గిరా వజ్రో న సంభృతః సబలో అనపచ్యుతః |
వవక్ష ఋష్వో అస్తృతః ||3||
ఇన్ద్రమిద్గాథినో బృహదిన్ద్రమర్కేభిరర్కిణః |
ఇన్ద్రం వాణీరనూషత ||4||
ఇన్ద్ర ఇద్ధర్యోః సచా సంమిశ్ల ఆ వచోయుజా |
ఇన్ద్రో వజ్రీ హిరణ్యయః ||5||
ఇన్ద్రో దీర్ఘాయ చక్షస ఆ సూర్యం రోహయద్దివి |
వి గోభిరద్రిమైరయత్ ||6||
ఆ యాహి సుషుమా హి త ఇన్ద్ర సోమం పిబా ఇమమ్ |
ఏదం బర్హిః సదో మమ ||7||
ఆ త్వా బ్రహ్మయుజా హరీ వహతామిన్ద్ర కేశినా |
ఉప బ్రహ్మాణి నః శృణు ||8||
బ్రహ్మాణస్త్వా వయం యుజా సోమపామిన్ద్ర సోమినః |
సుతావన్తో హవామహే ||9||
యుఞ్జన్తి బ్రధ్నమరుషం చరన్తం పరి తస్థుషః |
రోచన్తే రోచనా దివి ||10||
యుఞ్జన్త్యస్య కామ్యా హరీ విపక్షసా రథే |
శోణా ధృష్ణూ నృవాహసా ||11||
కేతుం కృణ్వన్నకేతవే పేశో మర్యా అపేశసే |
సముషద్భిరజాయథాః ||12||
ఉదు త్యం జాతవేదసం దేవం వహన్తి కేతవః |
దృశే విశ్వాయ సూర్యమ్ ||13||
అప త్యే తాయవో యథా నక్షత్రా యన్త్యక్తుభిః |
సూరాయ విశ్వచక్షసే ||14||
అదృశ్రన్నస్య కేతవో వి రశ్మయో జనాఁ అను |
భ్రాజన్తో అగ్నయో యథా ||15||
తరణిర్విశ్వదర్శతో జ్యోతిష్కృదసి సూర్య |
విశ్వమా భాసి రోచన ||16||
ప్రత్యఙ్దేవానాం విశః ప్రత్యఙ్ఙుదేషి మానుషీః |
ప్రత్యఙ్విశ్వం స్వర్దృశే ||17||
యేనా పావక చక్షసా భురణ్యన్తం జనాఁ అను |
త్వం వరుణ పశ్యసి ||18||
వి ద్యామేషి రజస్పృథ్వహర్మిమానో అక్తుభిః |
పశ్యం జన్మాని సూర్య ||19||
సప్త త్వా హరితో రథే వహన్తి దేవ సూర్య |
శోచిష్కేశమ్విచక్షణమ్ ||20||
అయుక్త సప్త శున్ధ్యువః సూరో రథస్య నప్త్యః |
తాభిర్యాతి స్వయుక్తిభిః ||21||
అధర్వణవేదము - కాండము 20 - సూక్తము 48
[మార్చు]అభి త్వా వర్చసా గిరః సిఞ్చన్త్యా చరణ్యువః |
అభి వత్సం న ధేనవః ||1||
తా అర్షన్తి శుభ్రియః పృఞ్చతీర్వర్చసా పయః |
జాతం జనిర్యథా హృదా ||2||
వజ్రాపవసాధ్యః కీర్తిర్మ్రియమాణమావహన్ |
మహ్యమాయుర్ఘృతం పయః ||3||
ఆయం గౌః పృశ్నిరక్రమీదసదన్మాతరం పురః |
పితరం చ ప్రయన్త్స్వః ||4||
అన్తశ్చరతి రోచనా అస్య ప్రాణాదపానతః |
వ్యఖ్యన్మహిషః స్వః ||5||
త్రింశద్ధామా వి రాజతి వాక్పతఙ్గో అశిశ్రియత్ |
ప్రతి వస్తోరహర్ద్యుభిః ||6||
అధర్వణవేదము - కాండము 20 - సూక్తము 49
[మార్చు]యచ్ఛక్రా వాచమారుహన్నన్తరిక్షం సిషాసథః |
సం దేవా అమదన్వృషా ||1||
శక్రో వాచమధృష్టాయోరువాచో అధృష్ణుహి |
మంహిష్ఠ ఆ మదర్దివి ||2||
శక్రో వాచమధృష్ణుహి ధామధర్మన్వి రాజతి |
విమదన్బర్హిరాసరన్ ||3||
తం వో దస్మమృతీషహం వసోర్మన్దానమన్ధసః |
అభి వత్సం న స్వసరేషు ధేనవ ఇన్ద్రం గీర్భిర్నవామహే ||4||
ద్యుక్షం సుదానుం తవిషీభిరావృతమ్గిరిం న పురుభోజసమ్ |
క్షుమన్తం వాజం శతినం సహస్రిణం మక్షూ గోమన్తమీమహే ||5||
తత్త్వా యామి సువీర్యం తద్బ్రహ్మ పూర్వచిత్తయే |
యేనా యతిభ్యో భృగవే ధనే హితే యేన ప్రస్కణ్వమావిథ ||6||
యేనా సముద్రమసృజో మహీరపస్తదిన్ద్ర వృష్ణి తే శవః |
సద్యః సో అస్య మహిమా న సంనశే యం క్షోణీరనుచక్రదే ||7||
అధర్వణవేదము - కాండము 20 - సూక్తము 50
[మార్చు]కన్నవ్యో అతసీనాం తురో గృణీత మర్త్యః |
నహీ న్వస్య మహిమానమిన్ద్రియం స్వర్గృణన్త ఆనశుః ||1||
కదు స్తువన్త ఋతయన్త దేవత ఋషిః కో విప్ర ఓహతే |
కదా హవం మఘవన్నిన్ద్ర సున్వతః కదు స్తువత ఆ గమః ||2||
| ←ముందరి అధ్యాయము | అధర్వణవేదము | తరువాతి అధ్యాయము→ |