అధర్వణవేదము - కాండము 20 - సూక్తములు 31 నుండి 40 వరకూ

←ముందరి అధ్యాయము

అధర్వణవేదము (అధర్వణవేదము - కాండము 20 - సూక్తములు 31 నుండి 40 వరకూ)

తరువాతి అధ్యాయము→

అధర్వణవేదము - కాండము 20 - సూక్తము 31

తా వజ్రిణం మన్దినం స్తోమ్యం మద ఇన్ద్రం రథే వహతో హర్యతా హరీ |

పురూణ్యస్మై సవనాని హర్యత ఇన్ద్రాయ సోమా హరయో దధన్విరే ||1||

అరం కామాయ హరయో దధమిరే స్థిరాయ హిన్వన్హరయో హరీ తురా |

అర్వద్భిర్యో హరిభిర్జోషమీయతే సో అస్య కామం హరివన్తమానశే ||2||

హరిశ్మశారుర్హరికేశ ఆయసస్తురస్పేయే యో హరిపా అవర్ధత |

అర్వద్భిర్యో హరిభిర్వాజినీవసురతి విశ్వా దురితా పారిషద్ధరీ ||3||

శ్రువేవ యస్య హరిణీ విపేతతుః శిప్రే వాజాయ హరిణీ దవిధ్వతః |

ప్ర యత్కృతే చమసే మర్మృజద్ధరీ పీత్వా మదస్య హర్యతస్యాన్ధసః ||4||

ఉత స్మ సద్న హర్యతస్య పస్త్యోరత్యో న వాజం హరివాఁ అచిక్రదత్ |

మహీ చిద్ధి ధిషణాహర్యదోజసా బృహద్వయో దధిషే హర్యతస్చిదా ||5||

అధర్వణవేదము - కాండము 20 - సూక్తము 32

ఆ రోదసీ హర్యమాణో మహిత్వా నవ్యంనవ్యం హర్యసి మన్మ ను ప్రియమ్ |

ప్ర పస్త్యమసుర హర్యతం గోరావిష్కృధి హరయే సూర్యాయ ||1||

ఆ త్వా హర్యన్తం ప్రయుజో జనానాం రథే వహన్తు హరిశిప్రమిన్ద్ర |

పిబా యథా ప్రతిభృతస్య మధ్వో హర్యన్యజ్ఞం సధమాదే దశోణిమ్ ||2||

అపాః పూర్వేషాం హరివః సుతానామథో ఇదం సవనం కేవలం తే |

మమద్ధి సోమం మధుమన్తమిన్ద్ర సత్రా వృషం జథర ఆ వృషస్వ ||3||

అధర్వణవేదము - కాండము 20 - సూక్తము 33

అప్సు ధూతస్య హరివః పిబేహ నృభిః సుతస్య జఠరం పృణస్వ |

మిమిక్షుర్యమద్రయ ఇన్ద్ర తుభ్యం తేభిర్వర్ధస్వ మదముక్థవాహః ||1||

ప్రోగ్రాం పీతిం వృష్ణ ఇయర్మి సత్యాం ప్రయై సుతస్య హర్యశ్వ తుభ్యమ్ |

ఇన్ద్ర ధేనాభిరిహ మాదయస్వ ధీభిర్విశ్వాభిః శచ్యా గృణానః ||2||

ఊతీ శచీవస్తవ వీర్యేణ వయో దధానా ఉశిజ ఋతజ్ఞాః |

ప్రజావదిన్ద్ర మంసో దురోణే తస్థుర్గృణన్తః సధమాద్యాసః ||3||

అధర్వణవేదము - కాండము 20 - సూక్తము 34

యో జాత ఏవ ప్రథమో మనస్వాన్దేవో దేవాన్క్రతునా పర్యమూషత్ |

యస్య శుష్మాద్రోదసీ అభ్యసేతాం నృమ్ణస్య మహ్నా స జనాస ఇన్ద్రః ||1||

యః పృథివీం వ్యథమానామదృంహద్యః పర్వతాన్ప్రకుపితాఁ అరమ్ణాత్ |

యో అన్తరిక్షం విమమే వరీయో యో ద్యామస్తభ్నాత్స జనాస ఇన్ద్రః ||2||

యో హత్వాహిమరిణాత్సప్త సిన్ధూన్యో గా ఉదాజదపధా వలస్య |

యో అశ్మనోరన్తరగ్నిం జజాన సంవృక్సమత్సు స జనాస ఇన్ద్రః ||3||

యేనేమా విశ్వా చ్యవనా కృతాని యో దాసం వర్ణమధరం గుహాకః |

శ్వఘ్నీవ యో జిగీవాం లక్షమాదదర్యః పుష్టాని స జనాస ఇన్ద్రః ||4||

యం స్మా పృఛన్తి కుహ సేతి ఘోరముతేమాహుర్నైషో అస్తీత్యేనమ్ |

సో అర్యః పుష్టీర్విజ ఇవా మినాతి శ్రదస్మై ధత్త స జనాస ఇన్ద్రః ||5||

యో రధ్రస్య చోదితా యః కృశస్య యో బ్రహ్మణో నాధమానస్య కీరేః |

యుక్తగ్రావ్ణో యో ऽవితా సుశిప్రః సుతసోమస్య స జనాస ఇన్ద్రః ||6||

యస్యాశ్వాసః ప్రదిశి యస్య గావో యస్య గ్రామా యస్య విశ్వే రథాసః |

యః సూర్యం య ఉషసం జజాన యో అపాం నేతా స జనాస ఇన్ద్రః ||7||

యం క్రన్దసీ సంయతీ విహ్వయేతే పరే ऽవరే ఉభయా అమిత్రాః |

సమానం చిద్రథమాతస్థివాంసా నానా హవేతే స జనాస ఇన్ద్రః ||8||

యస్మాన్న ఋతే విజయన్తే జనాసో యం యుధ్యమానా అవసే హవన్తే |

యో విశ్వస్య ప్రతిమానం బభూవ యో అచ్యుతచ్యుత్స జనాస ఇన్ద్రః ||9||

యః శస్వతో మహ్యేనో దధానానమన్యమానాం ఛర్వా జఘాన |

యహ్శర్ధతే నానుదదాతి శృధ్యాం యో దస్యోర్హన్తా స జనాస ఇన్ద్రః ||10||

యః శమ్భరం పర్వతేషు క్షియన్తం చత్వారింశ్యాం శరద్యన్వవిన్దత్ |

ఓజాయమానం యో అహిం జఘాన దానుం శయానం స జనాస ఇన్ద్రః ||11||

యః శమ్భరం పర్యతరత్కసీభిర్యో ऽచారుకాస్నాపిబత్సుతస్య |

అన్తర్గిరౌ యజమానం బహుం జనం యస్మిన్నామూర్ఛత్స జనాస ఇన్ద్రః ||12||

యః సప్తరశ్మిర్వృషభస్తువిష్మానవాసృజత్సర్తవే సప్త సిన్ధూన్ |

యో రౌహిణమస్పురద్వజ్రబాహుర్ద్యామారోహన్తం స జనాస ఇన్ద్రః ||13||

ద్యావా చిదస్మై పృథివీ మమేతే శుష్మాచ్చిదస్య పర్వతా భయన్తే |

యః సోమపా నిచితో వజ్రబాహుర్యో వజ్రహస్తః స జనాస ఇన్ద్రః ||14||

యః సున్వన్తమవతి యః పచన్తం యః శంసన్తం యః శశమానమూతీ |

యస్య బ్రహ్మ వర్ధనం యస్య సోమో యస్యేదం రాధః స జనాస ఇన్ద్రః ||15||

జాతో వ్యఖ్యత్పిత్రోరుపస్థే భువో న వేద జనితుః పరస్య |

స్తవిష్యమాణో నో యో అస్మద్వ్రతా దేవానాం స జనాస ఇన్ద్రః ||16||

యః సోమకామో హర్యశ్వః సూరిర్యస్మాద్రేజన్తే భువనాని విశ్వా |

యో జఘాన శమ్బరం యశ్చ శుష్ణం య ఏకవీరః స జనాస ఇన్ద్రః ||17||

యః సున్వతే పచతే దుధ్ర ఆ చిద్వాజం దర్దర్షి స కిలాసి సత్యః |

వయం త ఇన్ద్ర విశ్వహ ప్రియాసః సువీరాసో విదథమా వదేమ ||18||

అధర్వణవేదము - కాండము 20 - సూక్తము 35

అస్మా ఇదు ప్ర తవసే తురాయ ప్రయో న హర్మి స్తోమం మాహినాయ |

ఋచీషమాయాధ్రిగవ ఓహమిన్ద్రాయ బ్రహ్మాణి రాతతమా ||1||

అస్మా ఇదు ప్రయ ఇవ ప్ర యంసి భరామ్యాన్గూషం బాధే సువృక్తి |

ఇన్ద్రాయ హృదా మనసా మనీషా ప్రత్నాయ పత్యే ధియో మర్జయన్త ||2||

అస్మా ఇదు త్యముపమం స్వర్షాం భరామ్యాఙ్గూషమాస్యేన |

మంహిష్ఠమఛోక్తిభిర్మతీనాం సువృక్తిభిః సూరిం వావృధధ్యై ||3||

అస్మా ఇదు స్తోమం సం హినోమి రథం న తష్టేవ తత్సినాయ |

గిరశ్చ గిర్వాహసే సువృక్తీన్ద్రాయ విశ్వమిన్వం మేధిరాయ ||4||

అస్మా ఇదు సప్తిమివ శ్రవస్యేన్ద్రాయార్కం జుహ్వా సమఞ్జే |

వీరమ్దానౌకసం వన్దధ్యై పురాం గూర్తశ్రవసం దర్మాణమ్ ||5||

అస్మా ఇదు త్వష్టా తక్షద్వజ్రం స్వపస్తమం స్వర్యం రణాయ |

వృత్రస్య చిద్విదద్యేన మర్మ తుజన్నీశానస్తుజతా కియేధాః ||6||

అస్యేదు మాతుః సవనేషు సద్యో మహః పితుం పపివాం చార్వన్నా |

ముషాయద్విష్ణుః పచతం సహీయాన్విధ్యద్వరాహం తిరో అద్రిమస్తా ||7||

అస్మా ఇదు గ్నాశ్చిద్దేవపత్నీరిన్ద్రాయార్కమహిహత్య ఊవుః |

పరి ద్యావాపృథివీ జభ్ర ఉర్వీ నాస్య తే మహిమానం పరి ష్టః ||8||

అస్యేదేవ ప్ర రిరిచే మహిత్వం దివస్పృథివ్యాః పర్యన్తరిక్షాత్ |

స్వరాలిన్ద్రో దమ ఆ విశ్వగూర్తః స్వరిరమత్రో వవక్షే రణాయ ||9||

అస్యేదేవ శవసా శుశన్తం వి వృశ్చద్వజ్రేణ వృత్రమిన్ద్రః |

గా న వ్రాణా అవనీరముఞ్చదభి శ్రవో దావనే సచేతాః ||10||

అస్యేదు త్వేషసా రన్త సిన్ధవః పరి యద్వజ్రేణ సీమయఛత్ |

ఈశానకృద్దాశుషే దశస్యన్తుర్వీతయే గాధం తుర్వణిః కః ||11||

అస్మా ఇదు ప్ర భరా తూతుజానో వృత్రాయ వజ్రమీశానః కియేధాః |

గోర్న పర్వ వి రదా తిరశ్చేష్యన్నర్ణాంస్యపాం చరధ్యై ||12||

అస్యేదు ప్ర బ్రూహి పూర్వ్యాణి తురస్య కర్మాణి నవ్య ఉక్థైః |

యుధే యదిష్ణాన ఆయుధాన్యృఘాయమాణో నిరిణాతి శత్రూన్ ||13||

అస్యేదు భియా గిరయశ్చ దృల్హా ద్యావా చ భూమా జనుషస్తుజేతే |

ఉపో వేనస్య జోగువాన ఓణిం సద్యో భువద్వీర్యాయ నోధాః ||14||

అస్మా ఇదు త్యదను దాయ్యేషామేకో యద్వవ్నే భూరేరీశానః |

ప్రైతశం సూర్యే పస్పృధానం సౌవశ్వ్యే సుష్విమావదిన్ద్రః ||15||

ఏవా తే హారియోజనా సువృక్తీన్ద్ర బ్రహ్మాణి గోతమాసో అక్రన్ |

అैషు విశ్వపేశసం ధియం ధాః ప్రాతర్మక్షూ ధియావసుర్జగమ్యాత్ ||16||

అధర్వణవేదము - కాండము 20 - సూక్తము 36

య ఏక ఇద్ధవ్యశ్చర్షణీనామిన్ద్రం తం గీర్భిరభ్యర్చ ఆభిః |

యః పత్యతే వృషభో వృష్ణ్యావాన్త్సత్యః సత్వా పురుమాయః సహస్వాన్ ||1||

తము నః పూర్వే పితరో నవగ్వాః సప్త విప్రాసో అభి వాజయన్తః |

నక్షద్దాభం తతురిం పర్వతేష్ఠామద్రోఘవాచం మతిభిః శవిష్ఠమ్ ||2||

తమీమహే ఇన్ద్రమస్య రాయః పురువీరస్య నృవతః పురుక్షోః |

యో అష్కృధోయురజరః స్వర్వాన్తమా భర హరివో మాదయధ్యై ||3||

తన్నో వి వోచో యది తే పురా చిజ్జరితార ఆనశుః సుమ్నమిన్ద్ర |

కస్తే భాగః కిం వయో దుధ్ర ఖిదుః పురుహూత పురూవసో ऽసురఘ్నః ||4||

తం పృఛన్తీ వజ్రహస్తం రథేష్ఠామిన్ద్రం వేపీ వక్వరీ యస్య నూ గీః |

తువిగ్రాభం తువికూర్మిం రభోదాం గాతుమిషే నక్షతే తుమ్రమఛ ||5||

అయా హ త్యం మాయయా వావృధానం మనోజువా స్వతవః పర్వతేన |

అచ్యుతా చిద్వీలితా స్వోజో రుజో వి దృల్హా ధృషతా విరప్శిన్ ||6||

తమ్వో ధియా నవ్యస్యా శవిష్ఠమ్ప్రత్నం ప్రత్నవత్పరితంసయధ్యై |

స నో వక్షదనిమానః సువహ్నేన్ద్రో విశ్వాన్యతి దుర్గహాణి ||7||

ఆ జనాయ ద్రుహ్వణే పార్థివాని దివ్యాని దీపయో ऽన్తరిక్షా |

తపా వృషన్విశ్వతః శోచిషా తాన్బ్రహ్మద్విషే శోచయ క్షామపశ్చ ||8||

భువో జనస్య దివ్యస్య రాజా పార్థివస్య జగతస్త్వేషసందృక్ |

ధిష్వ వజ్రం దక్షిణ ఇన్ద్ర హస్తే విశ్వా అజుర్య దయసే వి మాయాః ||9||

ఆ సంయతమిన్ద్ర ణః స్వస్తిం శత్రుతూర్యాయ బృహతీమమృధ్రామ్ |

యయా దాసాన్యార్యాణి వృత్రా కరో వజ్రిన్త్సుతుకా నాహుషాణి ||10||

స నో నియుద్భిః పురుహూత వేధో విశ్వవారాభిరా గహి ప్రయజ్యో |

న యా అదేవో వరతే న దేవ ఆభిర్యాహి తూయమా మద్ర్యద్రిక్ ||11||

అధర్వణవేదము - కాండము 20 - సూక్తము 37

యస్తిగ్మశృఙ్గో వృషభో న భీమః ఏకః కృష్టీశ్చ్యవయతి ప్ర విశ్వాః |

యః శశ్వతో అదాశుషో గయస్య ప్రయన్తాసి సుష్వితరాయ వేదః ||1||

త్వం హ త్యదిన్ద్ర కుత్సమావః శుశ్రూషమాణస్తన్వా సమర్యే |

దాసం యచ్శుష్ణమ్కుయవం న్యస్మా అరన్ధయ ఆర్జునేయాయ శిక్షన్ ||2||

త్వం ధృష్ణో ధృషతా వీతహవ్యం ప్రావో విశ్వాభిరూతిభిః సుదాసమ్ |

ప్ర పౌరుకుత్సిం త్రసదస్యుమావః క్షేత్రసాతా వృత్రహత్యేషు పూరుమ్ ||3||

త్వం నృభిర్నృమణో దేవవీతౌ భూరీణి వృత్రా హర్యశ్వ హంసి |

త్వం ని దస్యుం చుమురిం ధునిం చాస్వాపయో దభీతయే సుహన్తు ||4||

తవ చ్యౌత్నాని వజ్రహస్త తాని నవ యత్పురో నవతిం చ సద్యః |

నివేశనే శతతమావివేషీరహం చ వృత్రం నముచిముతాహన్ ||5||

సనా తా త ఇన్ద్ర భోజనాని రాతహవ్యాయ దాశుషే సుదాసే |

వృష్ణే తే హరీ వృషణా యునజ్మి వ్యన్తు బ్రహ్మాణి పురుశాక వాజమ్ ||6||

మా తే అస్యాం సహసావన్పరిష్టావఘాయ భూమ హరివః పరాదౌ |

త్రాయస్వ నో ऽవృకేభిర్వరూథైస్తవ ప్రియాసః సూరిషు స్యామ ||7||

ప్రియాస ఇత్తే మఘవన్నభిష్టౌ నరో మదేమ శరణే సఖాయః |

ని తుర్వశం ని యాద్వం శిశీహ్యతిథిగ్వాయ శంస్యం కరిష్యన్ ||8||

సద్యశ్చిన్ను తే మఘవన్నభిష్టౌ నరః శంసన్త్యుక్థశాస ఉక్థా |

యే తే హవేభిర్వి పణీఁరదాశన్నస్మాన్వృణీష్వ యుజ్యాయ తస్మై ||9||

ఏతే స్తోమా నరాం నృతమ తుభ్యమస్మద్ర్యఞ్చో దదతో మఘాని |

తేషామిన్ద్ర వృత్రహత్యే శివో భూః సఖా చ శూరో ऽవితా చ నృణామ్ ||10||

నూ ఇన్ద్ర శూర స్తవమాన ఊతీ బ్రహ్మజూతస్తన్వా వావృధస్వ |

ఉప నో వాజాన్మిమీహ్యుప స్తీన్యుయం పాత స్వస్తిభిః సదా నః ||11||

అధర్వణవేదము - కాండము 20 - సూక్తము 38

ఆ యాహి సుషుమా హి త ఇన్ద్ర సోమం పిబా ఇమమ్ |

ఏదం బర్హిః సదో మమ ||1||

ఆ త్వా బ్రహ్మయుజా హరీ వహతామిన్ద్ర కేశినా |

ఉప బ్రహ్మాణి నః శృణు ||2||

బ్రహ్మాణస్త్వా వయం యుజా సోమపామిన్ద్ర సోమినః |

సుతావన్తో హవామహే ||3||

ఇన్ద్రమిద్గాథినో బృహదిన్ద్రమర్కేభిరర్కిణః |

ఇన్ద్రం వాణీరనూషత ||4||

ఇన్ద్ర ఇద్ధర్యోః సచా సంమిశ్ల ఆ వచోయుజా |

ఇన్ద్రో వజ్రీ హిరణ్యయః ||5||

ఇన్ద్రో దీర్ఘాయ చక్షస ఆ సూర్యం రోహయద్దివి |

వి గోభిరద్రిమైరయత్ ||6||

అధర్వణవేదము - కాండము 20 - సూక్తము 39

ఇన్ద్రం వో విశ్వతస్పరి హవామహే జనేభ్యః |

అస్మాకమస్తు కేవలః ||1||

వ్యన్తరిక్షమతిరన్మదే సోమస్య రోచనా |

ఇన్ద్రో యదభినద్వలమ్ ||2||

ఉద్గా ఆజదఙ్గిరోభ్య ఆవిష్కృణ్వన్గుహా సతీః |

అర్వాఞ్చం నునుదే వలమ్ ||3||

ఇన్ద్రేణ రోచనా దివో దృల్హాని దృంహితాని చ |

స్థిరాణి న పరాణుదే ||4||

అపామూర్మిర్మదన్నివ స్తోమ ఇన్ద్రాజిరాయతే |

వి తే మదా అరాజిషుః ||5||

అధర్వణవేదము - కాండము 20 - సూక్తము 40

ఇన్ద్రేణ సం హి దృక్షసే సంజగ్మానో అబిభ్యుషా |

మన్దూ సమానవర్చసా ||1||

అనవద్యైరభిద్యుభిర్మఖః సహస్వదర్చతి |

గణైరిన్ద్రస్య కామ్యైః ||2||

ఆదహ స్వధామను పునర్గర్భత్వమేరిరే |

దధానా నామ యజ్ఞియమ్ ||3||

←ముందరి అధ్యాయము

అధర్వణవేదము

తరువాతి అధ్యాయము→

మూస:అధర్వణవేదము