అధర్వణవేదము - కాండము 18 - సూక్తము 3

వికీసోర్స్ నుండి
Jump to navigation Jump to search
అధర్వణవేదము (అధర్వణవేదము - కాండము 18 - సూక్తము 3)



ఇయం నారీ పతిలోకం వృణానా ని పద్యత ఉప త్వా మర్త్య ప్రేతమ్ |

ధర్మం పురాణమనుపాలయన్తీ తస్యై ప్రజాం ద్రవిణం చేహ ధేహి ||1||


ఉదీర్ష్వ నార్యభి జీవలోకం గతాసుమేతముప శేష ఏహి |

హస్తగ్రాభస్య దధిషోస్తవేదం పత్యుర్జనిత్వమభి సం బభూథ ||2||


అపశ్యం యువతిం నీయమానాం జీవాం మృతేభ్యః పరిణీయమానామ్ |

అన్ధేన యత్తమసా ప్రావృతాసీత్ప్రాక్తో అపాచీమనయం తదేనామ్ ||3||


ప్రజానత్యఘ్న్యే జీవలోకం దేవానాం పన్థామనుసంచరన్తీ |

అయం తే గోపతిస్తం జుషస్వ స్వర్గం లోకమధి రోహయైనమ్ ||4||


ఉప ద్యాముప వేతసమవత్తరో నదీనామ్ |

అగ్నే పిత్తమపామసి ||5||


యం త్వమగ్నే సమదహస్తము నిర్వాపయ పునః |

క్యామ్బూరత్ర రోహతు శాణ్డదూర్వా వ్యల్కశా ||6||


ఇదం త ఏకమ్పుర ఊ త ఏకం తృతీయేన జ్యోతిషా సం విశస్వ |

సంవేశనే తన్వాచారురేధి ప్రియో దేవానాం పరమే సధస్థే ||7||


ఉత్తిష్ఠ ప్రేహి ప్ర ద్రవౌకః కృణుష్వ సలిలే సధస్థే |

తత్ర త్వం పితృభిః సంవిదానః సం సోమేన మదస్వ సం స్వధాభిః ||8||


ప్ర చ్యవస్వ తన్వ1ం సం భరస్వ మా తే గాత్రా వి హాయి మో శరీరమ్ |

మనో నివిష్టమనుసంవిశస్వ యత్ర భూమేర్జుషసే తత్ర గఛ ||9||


వర్చసా మాం పితరః సోమ్యాసో అఞ్జన్తు దేవా మధునా ఘృతేన |

చక్షుషే మా ప్రతరం తారయన్తో జరసే మా జరదష్టిం వర్ధన్తు ||10||


వర్చసా మాం సమనక్త్వగ్నిర్మేధాం మే విష్ణుర్న్యనక్త్వాసన్ |

రయిం మే విశ్వే ని యఛన్తు దేవాః స్యోనా మాపః పవనైః పునన్తు ||11||


మిత్రావరుణా పరి మామధాతామాదిత్యా మా స్వరవో వర్ధయన్తు |

వర్చో మ ఇన్ద్రో న్యనక్తు హస్తయోర్జరదష్టిం మా సవితా కృణోతు ||12||


యో మమార ప్రథమో మర్త్యానాం యః ప్రేయాయ ప్రథమో లోకమేతమ్ |

వైవస్వతం సంగమనం జనానాం యమం రాజానం హవిషా సపర్యత ||13||


పరా యాత పితర ఆ చ యాతాయం వో యజ్ఞో మధునా సమక్తః |

దత్తో అస్మభ్యం ద్రవిణేహ భద్రం రయిం చ నః సర్వవీరం దధాత ||14||


కణ్వః కక్షీవాన్పురుమీఢో అగస్త్యః శ్యావాశ్వః సోభర్యర్చనానాః |

విశ్వామిత్రో ऽయం జమదగ్నిరత్రిరవన్తు నః కశ్యపో వామదేవః ||15||


విశ్వామిత్ర జమదగ్నే వసిష్ఠ భరద్వాజ గోతమ వామదేవ |

శర్దిర్నో అత్రిరగ్రభీన్నమోభిః సుసంశాసః పితరో మృడతా నః ||16||


కస్యే మృజానా అతి యన్తి రిప్రమాయుర్దధానాః ప్రతరం నవీయః |

ఆప్యాయమానాః ప్రజయా ధనేనాధ స్యామ సురభయో గృహేషు ||17||


అఞ్జతే వ్యఞ్జతే సమఞ్జతే క్రతుం రిహన్తి మధునాభ్యఞ్జతే |

సిన్ధోరుచ్ఛ్వాసే పతయన్తముక్షణం హిరణ్యపావాః పశుమాసు గృహ్నతే ||18||


యద్వో ముద్రం పితరః సోమ్యం చ తేనో సచధ్వం స్వయశసో హి భూత |

తే అర్వాణః కవయ ఆ శృణోత సువిదత్రా విదథే హుయమానాః ||19||


యే అత్రయో అఙ్గిరసో నవగ్వా ఇష్టావన్తో రాతిషాచో దధానాః |

దక్షిణావన్తః సుకృతో య ఉ స్థాసద్యాస్మిన్బర్హిషి మాదయధ్వమ్ ||20||


అధా యథా నః పితరః పరాసః ప్రత్నాసో అగ్న ఋతమాశశానాః |

శుచీదయన్దీధ్యత ఉక్థశసః క్షామా భిన్దన్తో అరుణీరప వ్రన్ ||21||


సుకర్మానః సురుచో దేవయన్తో అయో న దేవా జనిమా ధమన్తః |

శుచన్తో అగ్నిం వావృధన్త ఇన్ద్రముర్వీమ్గవ్యాం పరిషదం నో అక్రన్ ||22||


ఆ యూథేవ క్షుమతి పశ్వో అఖ్యద్దేవానాం జనిమాన్త్యుగ్రః |

మర్తాసశ్చిదుర్వశీరకృప్రన్వృధే చిదర్య ఉపరస్యాయోః ||23||


అకర్మ తే స్వపసో అభూమ ఋతమవస్రన్నుషసో విభాతీః |

విశ్వం తద్భద్రం యదవన్తి దేవా బృహద్వదేమ విదథే సువీరాః ||24||


ఇన్ద్రో మా మరుత్వాన్ప్రాచ్యా దిశః పాతు బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||25||


ధాతా మా నిరృత్యా దక్షిణాయా దిశః పాతు బాహుచ్యుతా పృథివీ ద్యాం ఇవోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||26||


అదితిర్మాదిత్యైః ప్రతీచ్యా దిశః పాతు బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||27||


సోమో మా విశ్వైర్దేవైరుదీచ్యా దిశః పాతు బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||28||


ధర్తా హ త్వా ధరుణో ధారయాతా ఊర్ధ్వం భానుం సవితా ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||29||


ప్రాచ్యాం త్వా దిశి పురా సమ్వృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||30||


దక్షిణాయాం త్వా దిశి పురా సమ్వృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||31||


ప్రతీచ్యాం త్వా దిశి పురా సంవృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||32||


ఉదీచ్యాం త్వా దిశి పురా సమ్వృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||33||


ధ్రువాయాం త్వా దిశి పురా సంవృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||34||


ఊర్ధ్వాయాం త్వా దిశి పురా సమ్వృతః స్వధాయామా దధామి బాహుచ్యుతా పృథివీ ద్యామివోపరి |

లోకకృతః పథికృతో యజామహే యే దేవానాం హుతభాగా ఇహ స్థ ||35||


ధర్తాసి ధరునో ऽసి వంసగో ऽసి ||36||


ఉదపూరసి మధుపూరసి వాతపూరసి ||37||


ఇతశ్చ మాముతశ్చావతాం యమే ఇవ యతమానే యదైతమ్ |

ప్ర వాం భరన్మానుషా దేవయన్తో ఆ సీదతాం స్వము లోకం విదానే ||38||


స్వాసస్థే భవతమిన్దవే నో యుజే వాం బ్రహ్మ పూర్వ్యం నమోభిః |

వి శ్లోక ఏతి పథ్యేవ సూరిః శృణ్వన్తు విశ్వే అమృతాస ఏతత్ ||39||


త్రీణి పదాని రుపో అన్వరోహచ్చతుష్పదీమన్వేతద్వ్రతేన |

అక్షరేణ ప్రతి మిమీతే అర్కమృతస్య నాభావభి సం పునాతి ||40||


దేవేభ్యః కమవృణీత మృత్యుం ప్రజాయై కిమమృతం నావృణీత |

బృహస్పతిర్యజ్ఞమతనుత ఋషిః ప్రియాం యమస్తన్వమా రిరేచ ||41||


త్వమగ్న ఈడితో జాతవేదో ऽవాడ్ఢవ్యాని సురభీణి కృత్వా |

ప్రాదాః పితృభ్యః స్వధయా తే అక్షన్నద్ధి త్వం దేవ ప్రయతా హవీంషి ||42||


ఆసీనాసో అరుణీనాముపస్థే రయిం ధత్త దాశుషే మర్త్యాయ |

పుత్రేభ్యః పితరస్తస్య వస్వః ప్ర యఛత త ఇహోర్జం దధాత ||43||


అగ్నిష్వాత్తాః పితర ఏహ గఛత సదఃసదః సదత సుప్రణీతయః |

అత్తో హవీంషి ప్రయతాని బర్హిషి రయిం చ నః సర్వవీరం దధాత ||44||


ఉపహూతా నః పితరః సోమ్యాసో బర్హిష్యేషు నిధిషు ప్రియేషు |

త ఆ గమన్తు త ఇహ శ్రువన్త్వధి బ్రువన్తు తే ऽవన్త్వస్మాన్ ||45||


యే నః పితుః పితరో యే పితామహా అనూజహిరే సోమపీథం వసిష్ఠాః |

తేభిర్యమః సమ్రరాణో హవీంష్యుశన్నుశద్భిః ప్రతికామమత్తు ||46||


యే తాతృషుర్దేవత్రా జేహమానా హోత్రావిదః స్తోమతష్టాసో అర్కైః |

ఆగ్నే యాహి సహస్రం దేవవన్దైః సత్యైః కవిభిరృషిభిర్ఘర్మసద్భిః ||47||


యే సత్యాసో హవిరదో హవిష్పా ఇన్ద్రేణ దేవైః సరథం తురేణ |

ఆగ్నే యాహి సువిదత్రేభిరర్వాఙ్పరైః పూర్వైరృషిభిర్ఘర్మసద్భిః ||48||


ఉప సర్ప మాతరం భూమిమేతామురువ్యచసం పృథివీం సుశేవామ్ |

ఊర్ణమ్రదాః పృథివీ దక్షిణావత ఏషా త్వా పాతు ప్రపథే పురస్తాత్ ||49||


ఉచ్ఛ్వఞ్చస్వ పృథివి మా ని బాధథాః సూపాయనాస్మై భవ సూపసర్పణా |

మాతా పుత్రం యథా సిచాభ్యేనం భూమ ఊర్ణుహి ||50||


ఉచ్ఛ్వఞ్చమానా పృథివీ సు తిష్ఠతు సహస్రం మిత ఉప హి శ్రయన్తామ్ |

తే గృహాసో ఘృతశ్చుతః స్యోనా విశ్వాహాస్మై శరణాః సన్త్వత్ర ||51||


ఉత్తే స్తభ్నామి పృథివీం త్వత్పరీమం లోగం నిదధన్మో అహమ్రిషమ్ |

ఏతాం స్థూణాం పితరో ధారయన్తి తే తత్ర యమః సాదనా తే కృణోతు ||52||


ఇమమగ్నే చమసం మా వి జిహ్వరః ప్రియో దేవానాముత సోమ్యానామ్ |

అయం యశ్చమసో దేవపానస్తస్మిన్దేవా అమృతా మాదయన్తామ్ ||53||


అథర్వా పూర్ణమ్చమసమ్యమిన్ద్రాయాబిభర్వాజినీవతే |

తస్మిన్కృణోతి సుకృతస్య భక్షం తస్మినిన్దుః పవతే విశ్వదానిమ్ ||54||


యత్తే కృష్ణః శకున ఆతుతోద పిపీలః సర్ప ఉత వా శ్వాపదః |

అగ్నిష్టద్విశ్వాదగదం కృణోతు సోమశ్చ యో బ్రాహ్మణాఁ ఆవివేశ ||55||


పయస్వతీరోషధయః పయస్వన్మామకం పయః |

అపాం పయసో యత్పయస్తేన మా సహ శుమ్భతు ||56||


ఇమా నారీరవిధవాః సుపత్నీరాఞ్జనేన సర్పిషా సం స్పృశన్తామ్ |

అనశ్రవో అనమీవాః సురత్నా ఆ రోహన్తు జనయో యోనిమగ్రే ||57||


సం గఛస్వ పితృభిః సం యమేనేష్టాపూర్తేన పరమే వ్యోమన్ |

హిత్వావద్యం పునరస్తమేహి సం గఛతాం తన్వా సువర్చాః ||58||


యే నః పితుః పితరో యే పితామహా య ఆవివిశురుర్వన్తరిక్షమ్ |

తేభ్యః స్వరాదసునీతిర్నో అద్య వథావశం తన్వః కల్పయాతి ||59||


శం తే నీహారో భవతు శం తే ప్రుష్వావ శీయతామ్ |

శీతికే శీతికావతి హ్లాదికే హ్లాదికావతి |

మణ్డూక్యప్సు శం భువ ఇమం స్వగ్నిం శమయ ||60||


వివస్వాన్నో అభయం కృణోతు యః సుత్రామా జీరదానుః సుదానుః |

ఇహేమే వీరా బహవో భవన్తు గోమదశ్వవన్మయ్యస్తు పుష్టమ్ ||61||


వివస్వాన్నో అమృతత్వే దధాతు పరైతు మృత్యురమృతం న అैతు |

ఇమాన్రక్షతు పురుషానా జరిమ్ణో మో స్వేషామసవో యమం గుః ||62||


యో దధ్రే అన్తరిక్షే న మహ్నా పితౄణాం కవిః ప్రమతిర్మతీనామ్ |

తమర్చత విశ్వమిత్రా హవిర్భిః స నో యమః ప్రతరం జీవసే ధాత్ ||63||


ఆ రోహత దివముత్తమామృషయో మా బిభీతన |

సోమపాః సోమపాయిన ఇదం వః క్రియతే హవిరగన్మ జ్వోతిరుత్తమమ్ ||64||


ప్ర కేతునా బృహతా భాత్యగ్నిరా రోదసీ వృషభో రోరవీతి |

దివశ్చిదన్తాదుపమాముదానడపాముపస్థే మహిషో వవర్ధ ||65||


నాకే సుపర్ణముప యత్పతన్తం హ్ర్దా వేనన్తో అభ్యచక్షత త్వా |

హిరణ్యపక్షం వరుణస్య దూతం యమస్య యోనౌ శకునం భురన్యుమ్ ||66||


ఇన్ద్ర క్రతుం న ఆ భర పితా పుత్రేభ్యో యథా |

శిక్షా ణో అస్మిన్పురుహూత యామని జీవా జ్యోతిరశీమహి ||67||


అపూపాపిహితాన్కుమ్భాన్యాంస్తే దేవా అధారయన్ |

తే తే సన్తు స్వధావన్తో మధుమన్తో ఘృతశ్చుతః ||68||


యాస్తే ధానా అనుకిరామి తిలమిశ్రా స్వధావతీః |

తాస్తే సన్తు విభ్వీః ప్రభ్వీస్తాస్తే యమో రాజాను మన్యతామ్ ||69||


పునర్దేహి వనస్పతే య ఏష నిహితస్త్వయి |

యథా యమస్య సాదన ఆసాతౌ విదథా వదన్ ||70||


ఆ రభస్వ జాతవేదస్తేజస్వద్ధరో అస్తు తే |

శరీరమస్య సం దహాథైనం దేహి సుకృతాము లోకే ||71||


యే తే పూర్వే పరాగతా అపరే పితరశ్చ యే |

తేభ్యో ఘృతస్య కుల్యైతు శతధారా వ్యున్దతీ ||72||


ఏతదా రోహ వయ ఉన్మృజానః స్వా ఇహ బృహదు దీదయన్తే |

అభి ప్రేహి మధ్యతో మాప హాస్థాః పితౄనాం లోకం ప్రథమో యో అత్ర ||73||


అధర్వణవేదము


మూస:అధర్వణవేదము