అధర్వణవేదము - కాండము 18 - సూక్తము 2
| ←ముందరి అధ్యాయము | అధర్వణవేదము (అధర్వణవేదము - కాండము 18 - సూక్తము 2) | తరువాతి అధ్యాయము→ |
యమాయ సోమః పవతే యమాయ క్రియతే హవిః |
యమం హ యజ్ఞో గఛత్యగ్నిదూతో అరంకృతః ||1||
యమాయ మధుమత్తమం జుహోతా ప్ర చ తిష్ఠత |
ఇదం నమ ఋషిభ్యః పూర్వజేభ్యః పూర్వేభ్యః పథికృద్భ్యః ||2||
యమాయ ఘృతవత్పయో రాజ్ఞే హవిర్జుహోతన |
స నో జీవేష్వా యమేద్దీర్ఘమాయుః ప్ర జీవసే ||3||
మైనమగ్నే వి దహో మాభి శూశుచో మాస్య త్వచం చిక్షిపో మా శరీరమ్ |
శృతం యదా కరసి జాతవేదో ऽథేమేనం ప్ర హిణుతాత్పితౄఁరుప ||4||
యదా శృతం కృణవో జాతవేదో ऽథేమమేనం పరి దత్తాత్పితృభ్యః |
యదో గఛాత్యసునీతిమేతామథ దేవానాం వశనీర్భవాతి ||5||
త్రికద్రుకేభిః పవతే షడుర్వీరేకమిద్బృహత్ |
త్రిష్టుబ్గాయత్రీ ఛన్దాంసి సర్వా తా యమ ఆర్పితా ||6||
సూర్యం చక్షుషా గఛ వాతమాత్మనా దివం చ గఛ పృథివీం చ ధర్మభిః |
అపో వా గఛ యది తత్ర తే హితమోషధీషు ప్రతి తిష్ఠా శరీరైః ||7||
అజో భాగస్తపసస్తం తపస్వ తం తే శోచిస్తపతు తం తే అర్చిః |
యాస్తే శివాస్తన్వో జాతవేదస్తాభిర్వహైనం సుకృతాము లోకమ్ ||8||
యాస్తే శోచయో రంహయో జాతవేదో యాభిరాపృణాసి దివమన్తరిక్షమ్ |
అజం యన్తమను తాః సమృణ్వతామథేతరాభిః శివతమాభిః శృతం కృధి ||9||
అవ సృజ పునరగ్నే పితృభ్యో యస్త ఆహుతశ్చరతి స్వధావాన్ |
ఆయుర్వసాన ఉప యాతు శేషః సం గఛతాం తన్వా సువర్చాః ||10||
అతి ద్రవ శ్వానౌ సారమేయౌ చతురక్షౌ శబలౌ సాధునా పథా |
అధా పితౄన్త్సువిదత్రాఁ అపీహి యమేన యే సధమాదం మదన్తి ||11||
యౌ తే శ్వానౌ యమ రక్షితారౌ చతురక్షౌ పథిషదీ నృచక్షసా |
తాభ్యాం రాజన్పరి ధేహ్యేనం స్వస్త్యస్మా అనమీవం చ ధేహి ||12||
ఉరూణసావసుతృపావుదుమ్బలౌ యమస్య దూతౌ చరతో జనాఁ అను |
తావస్మభ్యం దృశయే సూర్యాయ పునర్దాతామసుమద్యేహ భద్రమ్ ||13||
సోమ ఏకేభ్యః పవతే ఘృతమేక ఉపాసతే |
యేభ్యో మధు ప్రధావతి తాంశ్చిదేవాపి గఛతాత్ ||14||
యే చిత్పూర్వ ఋతసాతా ఋతజాతా ఋతావృధః |
ఋషీన్తపస్వతో యమ తపోజాఁ అపి గఛతాత్ ||15||
తపసా యే అనాధృష్యాస్తపసా యే స్వర్యయుః |
తపో యే చక్రిరే మహస్తాంశ్చిదేవాపి గఛతాత్ ||16||
యే యుధ్యన్తే ప్రధనేషు శూరాసో యే స్వర్తనూత్యజః |
యే వా సహస్రదక్షిణాస్తాం చిదేవాపి గఛతాత్ ||17||
సహస్రణీథాః కవయో యే గోపాయన్తి సూర్యమ్ |
ఋషీన్తపస్వతో యమ తపోజాఁ అపి గఛతాత్ ||18||
స్యోనాస్మై భవ పృథివ్యనృక్షరా నివేశనీ |
యఛాస్మై శర్మ సప్రథాః ||19||
అసంబాధే పృథివ్యా ఉరౌ లోకే ని ధీయస్వ |
స్వధా యాశ్చకృషే జీవన్తాస్తే సన్తు మధుశ్చుతః ||20||
హ్వయామి తే మనసా మన ఇహేమాన్గృహాముప జుజుషాణ ఏహి |
సం గఛస్వ పితృభిః సం యమేన స్యోనాస్త్వా వాతా ఉప వాన్తు శగ్మాః ||21||
ఉత్త్వా వహన్తు మరుత ఉదవాహా ఉదప్రుతః |
అజేన కృణ్వన్తః శీతం వర్షేణోక్షన్తు బాలితి ||22||
ఉదహ్వమాయురాయుషే క్రత్వే దక్షాయ జీవసే |
స్వాన్గఛతు తే మనో అధా పితౄఁరుప ద్రవ ||23||
మా తే మనో మాసోర్మాఙ్గానాం మా రసస్య తే |
మా తే హాస్త తన్వః కిం చనేహ ||24||
మా త్వా వృక్షః సం బాధిష్ట మా దేవీ పృథివీ మహీ |
లోకం పితృషు విత్త్వైధస్వ యమరాజసు ||25||
యత్తే అఙ్గమతిహితం పరాచైరపానః ప్రాణో య ఉ వా తే పరేతః |
తత్తే సంగత్య పితరః సనీడా ఘాసాద్ఘాసం పునరా వేశయన్తు ||26||
అపేమం జీవా అరుధన్గృహేభ్యస్తం నిర్వహత పరి గ్రామాదితః |
మృత్యుర్యమస్యాసీద్దూతః ప్రచేతా అసూన్పితృభ్యో గమయాం చకార ||27||
యే దస్యవః పితృషు ప్రవిష్టా జ్ఞాతిముఖా అహుతాదశ్చరన్తి |
పరాపురో నిపురో యే భరన్త్యగ్నిష్టానస్మాత్ప్ర ధమాతి యజ్ఞాత్ ||28||
సం విశన్త్విహ పితరః స్వా నః స్యోనం కృణ్వన్తహ్ప్రతిరన్త ఆయుః |
తేభ్యః శకేమ హవిషా నక్షమాణా జ్యోగ్జీవన్తః శరదః పురూచీః ||29||
యాం తే ధేనుం నిపృణామి యము క్షీర ఓదనమ్ |
తేనా జనస్యాసో భర్తా యో ऽత్రాసదజీవనః ||30||
అశ్వావతీం ప్ర తర యా సుశేవా ర్క్షాకం వా ప్రతరం నవీయః |
యస్త్వా జఘాన వధ్యః సో అస్తు మా సో అన్యద్విదత భాగధేయమ్ ||31||
యమః పరో ऽవరో వివస్వాన్తతః పరం నాతి పశ్యామి కిం చన |
యమే అధ్వరో అధి మే నివిష్టో భువో వివస్వానన్వాతతాన ||32||
అపాగూహన్నమృతాం మర్త్యేభ్యః కృత్వా సవర్ణామదధుర్వివస్వతే |
ఉతాశ్వినావభరద్యత్తదాసీదజహాదు ద్వా మిథునా సరణ్యూః ||33||
యే నిఖాతా యే పరోప్తా యే దగ్ధా యే చోద్ధితాః |
సర్వాంస్తానగ్న ఆ వహ పితౄన్హవిషే అత్తవే ||34||
యే అగ్నిదగ్ధా యే అనగ్నిదగ్ధా మధ్యే దివః స్వధయా మాదయన్తే |
త్వం తాన్వేత్థ యది తే జాతవేదః స్వధయా యజ్ఞం స్వధితిం జుషన్తామ్ ||35||
శం తప మాతి తపో అగ్నే మా తన్వం తపః |
వణేషు శుష్మో అస్తు తే పృథివ్యామస్తు యద్ధరః ||36||
దదామ్యస్మా అవసానమేతద్య ఏష ఆగన్మమ చేదభూదిహ |
యమశ్చికిత్వాన్ప్రత్యేతదాహ మమైష రాయ ఉప తిష్ఠతామిహ ||37||
ఇమాం మాత్రాం మిమీమహే యథాపరం న మాసాతై |
శతే శరత్సు నో పురా ||38||
ప్రేమాం మాత్రాం మిమీమహే యథాపరం న మాసాతై |
శతే శరత్సు నో పురా ||39||
అపేమాం మాత్రాం మిమీమహే యథాపరం న మాసాతై |
శతే శరత్సు నో పురా ||40||
వీమాం మాత్రాం మిమీమహే యథాపరం న మాసాతై |
శతే శరత్సు నో పురా ||41||
నిరిమాం మాత్రాం మిమీమహే యథాపరం న మాసాతై |
శతే శరత్సు నో పురా ||42||
ఉదిమాం మాత్రాం మిమీమహే యథాపరం న మాసాతై |
శతే శరత్సు నో పురా ||43||
సమిమాం మాత్రాం మిమీమహే యథాపరం న మాసాతై |
శతే శరత్సు నో పురా ||44||
అమాసి మాత్రాం స్వరగామాయుష్మాన్భూయాసమ్ |
యథాపరం న మాసాతై శతే శరత్సు నో పురా ||45||
ప్రాణో అపానో వ్యాన ఆయుశ్చక్షుర్దృశయే సూర్యాయ |
అపరిపరేణ పథా యమరాజ్ఞః పితౄన్గఛ ||46||
యే అగ్రవః శశమానాహ్పరేయుర్హిత్వా ద్వేషాంస్యనపత్యవన్తః |
తే ద్యాముదిత్యావిదన్త లోకం నాకస్య పృష్ఠే అధి దీధ్యానాః ||47||
ఉదన్వతీ ద్యౌరవమా పీలుమతీతి మధ్యమా |
తృతీయా హ ప్రద్యౌరితి యస్యాం పితర ఆసతే ||48||
యే న పితుః పితరో యే పితామహా య ఆవివిశురుర్వన్తరిక్షమ్ |
య ఆక్షియన్తి పృథివీముత ద్యాం తేభ్యః పితృభ్యో నమసా విధేమ ||49||
ఇదమిద్వా ఉ నాపరం దివి పశ్యసి సూర్యమ్ |
మాతా పుత్రం యథా సిచాభ్యేనం భూమ ఊర్ణుహి ||50||
ఇదమిద్వా ఉ నాపరం జరస్యన్యదితో ऽపరమ్ |
జాయా పతిమివ వాససాభ్యేనం భూమ ఊర్ణుహి ||51||
అభి త్వోర్ణోమి పృథివ్యా మాతుర్వస్త్రేణ భద్రయా |
జీవేషు భద్రం తన్మయి స్వధా పితృషు సా త్వయి ||52||
అగ్నీషోమా పథికృతా స్యోనం దేవేభ్యో రత్నం దధథుర్వి లోకమ్ |
ఉప ప్రేష్యన్తం పూషణం యో వహాత్యఞ్జోయానైః పథిభిస్తత్ర గఛతమ్ ||53||
పూషా త్వేతశ్చ్యావయతు ప్ర విద్వాననష్టపశుర్భువనస్య గోపాః |
స త్వైతేభ్యః పరి దదత్పితృభ్యో ऽగ్నిర్దేవేభ్యః సువిదత్రియేభ్యః ||54||
ఆయుర్విశ్వాయుః పరి పాతు త్వా పూషా త్వా పాతు ప్రపథే పురస్తాత్ |
యత్రాసతే సుకృతో యత్ర త ఈయుస్తత్ర త్వా దేవః సవితా దధాతు ||55||
ఇమౌ యునజ్మి తే వహ్నీ అసునీతాయ వోఢవే |
తాభ్యాం యమస్య సాదనం సమితిశ్చావ గఛతాత్ ||56||
ఏతత్త్వా వాసః ప్రథమం న్వాగన్నపైతదూహ యదిహాబిభః పురా |
ఇష్టాపూర్తమనుసంక్రామ విద్వాన్యత్ర తే దత్తం బహుధా విబన్ధుషు ||57||
అగ్నేర్వర్మ పరి గోభిర్వ్యయస్వ సం ప్రోర్ణుష్వ మేదసా పీవసా చ |
నేత్త్వా ధృష్ణుర్హరసా జర్హృషాణో దధృగ్విధక్షన్పరీఙ్ఖయాతై ||58||
దణ్డం హస్తాదాదదానో గతాసోః సహ శ్రోత్రేణ వర్చసా బలేన |
అత్రైవ త్వమిహ వయం సువీరా విశ్వా మృధో అభిమాతీర్జయేమ ||59||
ధనుర్హస్తాదాదదానో మృతస్య సహ క్షత్రేణ వర్చసా బలేన |
సమాగృభాయ వసు భూరి పుష్టమర్వాఙ్త్వమేహ్యుప జీవలోకమ్ ||60||
| ←ముందరి అధ్యాయము | అధర్వణవేదము | తరువాతి అధ్యాయము→ |