అధర్వణవేదము - కాండము 11 - సూక్తము 9

వికీసోర్స్ నుండి
Jump to navigation Jump to search
అధర్వణవేదము (అధర్వణవేదము - కాండము 11 - సూక్తము 9)



యే బాహవో యా ఇషవో ధన్వనాం వీర్యాణి చ |

అసీన్పరశూనాయుధం చిత్తాకూతం చ యద్ధృది |

సర్వం తదర్బుదే త్వమమిత్రేభ్యో దృశే కురూదారాంశ్చ ప్ర దర్శయ ||


ఉత్తిష్ఠత సం నహ్యధ్వం మిత్రా దేవజనా యూయమ్ |

సందృష్టా గుప్తా వః సన్తు యా నో మిత్రాణ్యర్బుదే ||


ఉత్తిష్ఠతమా రభేతామాదానసందానాభ్యామ్ |

అమిత్రాణాం సేనా అభి ధత్తమర్బుదే ||


అర్బుదిర్నామ యో దేవ ఈశానశ్చ న్యర్బుదిః |

యాభ్యామన్తరిక్షమావృతమియం చ పృథివీ మహీ |

తాభ్యామిన్ద్రమేదిభ్యామహం జితమన్వేమి సేనయా ||


ఉత్తిష్ఠ త్వం దేవజనార్బుదే సేనయా సహ |

భఞ్జన్నమిత్రాణాం సేనామ్భోగేభిః పరి వారయ ||


సప్త జాతాన్న్యర్బుద ఉదారాణాం సమీక్షయన్ |

తేభిష్ట్వమాజ్యే హుతే సర్వైరుత్తిష్ఠ సేనయా ||


ప్రతిఘ్నానాశ్రుముఖీ కృధుకర్ణీ చ క్రోశతు |

వికేశీ పురుషే హతే రదితే అర్బుదే తవ ||


సంకర్షన్తీ కరూకరం మనసా పుత్రమిఛన్తీ |

పతిం భ్రాతరమాత్స్వాన్రదితే అర్బుదే తవ ||


అలిక్లవా జాష్కమదా గృధ్రాః శ్యేనాః పతత్రిణః |

ధ్వాఙ్క్షాః శకునయస్తృప్యన్త్వమిత్రేషు సమీక్షయన్రదితే అర్బుదే తవ ||


అథో సర్వం శ్వాపదం మక్షికా తృప్యతు క్రిమిః |

పౌరుషేయే ऽధి కుణపే రదితే అర్బుదే తవ ||


ఆ గృహ్ణీతం సం బృహతం ప్రానాపానాన్న్యర్బుదే |

నివాశా ఘోషాః సం యన్త్వమిత్రేషు సమీక్షయన్రదితే అర్బుదే తవ ||


ఉద్వేపయ సం విజన్తాం భియామిత్రాన్త్సం సృజ |

ఉరుగ్రాహైర్బాహ్వఙ్కైర్విధ్యామిత్రాన్న్యర్బుదే ||


ముహ్యన్త్వేషాం బాహవశ్చిత్తాకూతం చ యద్ధృది |

మైషాముచ్ఛేషి కిం చన రదితే అర్బుదే తవ ||


ప్రతిఘ్నానాః సం ధావన్తూరః పటూరావాఘ్నానాః |

అఘారిణీర్వికేశ్యో రుదత్యః పురుషే హతే రదితే అర్బుదే తవ ||


శ్వన్వతీరప్సరసో రూపకా ఉతార్బుదే |

అన్తఃపాత్రే రేరిహతీం రిశాం దుర్ణిహితైషిణీమ్ |

సర్వాస్తా అర్బుదే త్వమమిత్రేభ్యో దృశే కురూదారాంశ్చ ప్ర దర్శయ ||


ఖదూరే ऽధిచఙ్క్రమాం ఖర్వికాం ఖర్వవాసినీమ్ |

య ఉదారా అన్తర్హితా గన్ధర్వాప్సరసశ్చ యే సర్పా ఇతరజనా రక్షాంసి ||


చతుర్దమ్ష్ట్రాం ఛ్యావదతః కుమ్భముష్కాఁ అసృఙ్ముఖాన్ |

స్వభ్యసా యే చోద్భ్యసాః ||


ఉద్వేపయ త్వమర్బుదే ऽమిత్రాణామమూః సిచః |

జయాంశ్చ జిష్ణుశ్చామిత్రాఁ జయతామిన్ద్రమేదినౌ ||


ప్రబ్లీనో మృదితః శయాం హతో ऽమిత్రో న్యర్బుదే |

అగ్నిజిహ్వా ధూమశిఖా జయన్తీర్యన్తు సేనయా ||


తయార్బుదే ప్రణుత్తానామిన్ద్రో హన్తు వరంవరమ్ |

అమిత్రాణాం శచీపతిర్మామీషాం మోచి కశ్చన ||


ఉత్కసన్తు హృదయాన్యూర్ధ్వః ప్రాణ ఉదీషతు |

శౌష్కాస్యమను వర్తతామమిత్రాన్మోత మిత్రిణః ||


యే చ ధీరా యే చాధీరాః పరాఞ్చో బధిరాశ్చ యే |

తమసా యే చ తూపరా అథో బస్తాభివాసినః |

సర్వాంస్తామర్బుదే త్వమమిత్రేభ్యో దృశే కురూదారాంశ్చ ప్ర దర్శయ ||


అర్బుదిశ్చ త్రిషన్ధిశ్చామిత్రాన్నో వి విధ్యతామ్ |

యథైషామిన్ద్ర వృత్రహన్హనామ శచీపతే ऽమిత్రాణాం సహస్రశః ||


వనస్పతీన్వానస్పత్యానోషధీరుత వీరుధః |

గన్ధర్వాప్సరసః సర్పాన్దేవాన్పుణ్యజనాన్పితౄన్ |

సర్వాంస్తాఁ అర్బుదే త్వమమిత్రేభ్యో దృశే కురూదారాంశ్చ ప్ర దర్శయ ||


ఈశాం వో మరుతో దేవ ఆదిత్యో బ్రహ్మణస్పతిః |

ఈశాం వ ఇన్ద్రశ్చాగ్నిశ్చ ధాతా మిత్రః ప్రజాపతిః |

ఈశాం వ ఋషయశ్చక్రురమిత్రేషు సమీక్షయన్రదితే అర్బుదే తవ ||


తేషాం సర్వేషామీశానా ఉత్తిష్ఠత సం నహ్యధ్వం మిత్రా దేవజనా యూయమ్ |

ఇమం సంగ్రామం సంజిత్య యథాలోకం వి తిష్ఠధ్వమ్ ||


అధర్వణవేదము



మూస:అధర్వణవేదము