అధర్వణవేదము - కాండము 10 - సూక్తము 5
| ←ముందరి అధ్యాయము | అధర్వణవేదము (అధర్వణవేదము - కాండము 10 - సూక్తము 5) | తరువాతి అధ్యాయము→ |
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయ బ్రహ్మయోగైర్వో యునజ్మి ||1||
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయ క్షత్రయోగైర్వో యునజ్మి ||2||
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయేన్ద్రయోగైర్వో యునజ్మి ||3||
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయ సోమయోగైర్వో యునజ్మి ||4||
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయాప్సుయోగైర్వో యునజ్మి ||5||
ఇన్ద్రస్యౌజ స్థేన్ద్రస్య సహ స్థేన్ద్రస్య బలం స్థేన్ద్రస్య వీర్యం స్థేన్ద్రస్య నృమ్ణం స్థ |
జిష్ణవే యోగాయ విశ్వాని మా భూతాన్యుప తిష్ఠన్తు యుక్తా మ ఆప స్థ ||6||
అగ్నేర్భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||7||
ఇన్ద్రస్య భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||8||
సోమస్య భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||9||
వరుణస్య భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||10||
మిత్రావరుణయోర్భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||11||
యమస్య భాగ స్థ అపామ్శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||12||
పితౄణాం భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||13||
దేవస్య సవితుర్భాగ స్థ అపాం శుక్రమాపో దేవీర్వర్చో అస్మాసు ధత్త |
ప్రజాపతేర్వో ధామ్నాస్మై లోకాయ సాదయే ||14||
యో వ ఆపో ऽపాం భాగో ऽప్స్వన్తర్యజుష్యో దేవయజనః |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృషీయానేన బ్రహ్మణానేన కర్మణానయా మేన్యా ||15||
యో వ ఆపో ऽపామూర్మిరప్స్వన్తర్యజుష్యో దేవయజనః |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృషీయానేన బ్రహ్మణానేన కర్మణానయా మేన్యా ||16||
యో వ ఆపో ऽపామ్వత్సో ऽప్స్వన్తర్యజుష్యో దేవయజనః |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృషీయానేన బ్రహ్మణానేన కర్మణానయా మేన్యా ||17||
యో వ ఆపో ऽపాం వృషభో ऽప్స్వన్తర్యజుష్యో దేవయజనహ్ ||
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః ||
తం వధేయం తం స్తృషీయానేన బ్రహ్మణానేన కర్మణానయా మేన్యా ||18||
యో వ ఆపో ऽపాం హిరణ్యగర్భో ऽప్స్వన్తర్యజుష్యో దేవయజనహ్ |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృసీయానేన బ్రహ్మణానేన కర్మణానయా మేన్యా ||19||
యో వ ఆపో ऽపాం అశ్మా పృశ్నిర్దివ్యో ऽప్స్వన్తర్యజుష్యో దేవయజనః |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృషీయానేన బ్రహ్మణానేన కర్మణానయా మేన్యా ||20||
యో వ ఆపో ऽపాం అగ్నయో ऽప్స్వన్తర్యజుష్యో దేవయజనః |
ఇదం తమతి సృజామి తం మాభ్యవనిక్షి |
తేన తమభ్యతిసృజామో యో ऽస్మాన్ద్వేష్టి యం వయం ద్విష్మః |
తం వధేయం తం స్తృషీయానేన బ్రహ్మణానేన కర్మణానయా మేన్యా ||21||
యదర్వాచీనం త్రైహాయణాదనృతం కిం చోదిమ |
ఆపో మా తస్మాత్సర్వస్మాద్దురితాత్పాన్త్వంహసః ||22||
సముద్రం వః ప్ర హిణోమి స్వాం యోనిమపీతన |
అరిష్టాః సర్వహాయసో మా చ నః కిం చనామమత్ ||23||
అరిప్రా ఆపో అప రిప్రమస్మత్ |
ప్రాస్మదేనో దురితం సుప్రతీకాః ప్ర దుష్వప్న్యమ్ప్ర మలం వహన్తు ||24||
విష్ణోః క్రమో ऽసి సపత్నహా పృథివీసంశితో ऽగ్నితేజాహ్ |
పృథివీమను వి క్రమే ऽహం పృథివ్యాస్తం నిర్భజామో యో3 ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||25||
విష్ణోః క్రమో ऽసి సపత్నహాన్తరిక్షసంశితో వాయుతేజాః |
అన్తరిక్షమను వి క్రమే ऽహం అన్తరిక్షాత్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||26||
విష్ణోః క్రమో ऽసి సపత్నహా ద్యౌసంశితః సూర్యతేజాః |
దివమను వి క్రమే ऽహం దివస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జివీత్తం ప్రానో జహాతు ||27||
విష్ణోః క్రమో ऽసి సపత్నహా దిక్సంశితో మనస్తేజాః |
దిశో అను వి క్రమే ऽహం దిగ్భ్యస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||28||
విష్ణోః క్రమో ऽసి సపత్నహాశాసంశితో వాతతేజాః |
ఆశా అను వి క్రమే ऽహం ఆశాభ్యస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||29||
విష్ణోః క్రమో ऽసి సపత్నహా ఋక్సంశితో సామతేజాః |
ఋచో ऽను వి క్రమే ऽహం ఋగ్భ్యస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||30||
విష్ణోః క్రమో ऽసి సపత్నహా యజ్ఞసంశితో బ్రహ్మతేజాః |
యజ్ఞమను వి క్రమే ऽహం యజ్ఞాత్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||31||
విష్ణోః క్రమో ऽసి సపత్నహౌషధీసంశితో సోమతేజాః |
ఓషధీరను వి క్రమే ऽహం ఓషధీభ్యస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||32||
విష్ణోః క్రమో ऽసి సపత్నహాప్సుసంశితో వరుణతేజాః |
అపో ऽను వి క్రమే ऽహం అద్భ్యస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||33||
విష్ణోః క్రమో ऽసి సపత్నహా కృషిసంశితో ऽన్నతేజాః |
కృషిమను వి క్రమే ऽహం కృష్యాస్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||34||
విస్ణోః క్రమో ऽసి సపత్నహా ప్రాణసంశితః పురుషతేజాః |
ప్రాణమను వి క్రమే ऽహం ప్రాణాత్తం నిర్భజామో యో ऽస్మాన్ద్వేష్టి యం వయం ద్విష్మః |
స మా జీవీత్తం ప్రానో జహాతు ||35||
జితమస్మాకముద్భిన్నమస్మాకమభ్యష్ఠాం విశ్వాః పృతనా అరాతీః |
ఇదమహమాముష్యాయణస్యాముష్యాః పుత్రస్య వర్చస్తేజః ప్రాణమాయుర్ని వేష్టయామీదమేనమధరాఞ్చం పాదయామి ||36||
సూర్యస్యావృతమన్వావర్తే దక్షిణామన్వావృతమ్ |
సా మే ద్రవిణం యఛతు సా మే బ్రాహ్మణవర్చసమ్ ||37||
దిశో జ్యోతిష్మతీరభ్యావర్తే |
తా మే ద్రవిణం యఛన్తు తా మే బ్రాహ్మణవర్చసమ్ ||38||
సప్తఋషీనభ్యావర్తే |
తే మే ద్రవిణం యఛన్తు తే మే బ్రాహ్మణవర్చసమ్ ||39||
బ్రహ్మాభ్యావర్తే |
తన్మే ద్రవిణం యఛన్తు తన్మే బ్రాహ్మణవర్చసమ్ ||40||
బ్రాహ్మణాఁ అభ్యావర్తే |
తే మే ద్రవిణం యఛన్తు తే మే బ్రాహ్మణవర్చసమ్ ||41||
యమ్వయం మృగయామహే తం వధై స్తృణవామహై |
వ్యాత్తే పరమేష్ఠినో బ్రహ్మణాపీపదామ తమ్ ||42||
వైశ్వానరస్య దంష్ట్రాభ్యాం హేతిస్తం సమధాతభి |
ఇయం తం ప్సాత్వాహుతిః సమిద్దేవీ సహీయసీ ||43||
రాజ్ఞో వరుణస్య బన్ధో ऽసి |
సో ऽముమాముష్యాయణమముష్యాః పుత్రమన్నే ప్రాణే బధాన ||44||
యత్తే అన్నం భువస్పత ఆక్షియతి పృథివీమను |
తస్య నస్త్వం భువస్పతే సంప్రయఛ ప్రజాపతే ||45||
అపో దివ్యా అచాయిషం రసేన సమపృక్ష్మహి |
పయస్వానగ్న ఆగమం తం మా సం సృజ వర్చసా ||46||
సం మాగ్నే వర్చసా సృజ సం ప్రజయా సమాయుషా |
విద్యుర్మే అస్య దేవా ఇన్ద్రో విద్యాత్సహ ఋషిభిః ||47||
యదగ్నే అద్య మిథునా శపతో యద్వాచస్తృష్టం జనయన్త రేభాః |
మన్యోర్మనసః శరవ్యా జాయతే యా తయా విధ్య హృదయే యాతుధానాన్ ||48||
పరా శృణీహి తపసా యాతుధానాన్పరాగ్నే రక్షో హరసా శృణీహి |
పరార్చిషా మూరదేవాం ఛృణీహి పరాసుతృపః శోశుచతః శృణీహి ||49||
అపామస్మై వజ్రం ప్ర హరామి చతుర్భృష్టిం శీర్షభిద్యాయ విద్వాన్ |
సో అస్యాఙ్గాని ప్ర శృణాతు సర్వా తన్మే దేవా అను జానన్తు విశ్వే ||50||
| ←ముందరి అధ్యాయము | అధర్వణవేదము | తరువాతి అధ్యాయము→ |