అధర్వణవేదము - కాండము 10 - సూక్తము 10
| ←ముందరి అధ్యాయము | అధర్వణవేదము (అధర్వణవేదము - కాండము 10 - సూక్తము 10) | తరువాతి అధ్యాయము→ |
నమస్తే జాయమానాయై జాతాయా ఉత తే నమః |
బాలేభ్యః శపేభ్యో రూపాయాఘ్న్యే తే నమః ||1||
యో విద్యాత్సప్త ప్రవతః సప్త విద్యాత్పరావతః |
శిరో యజ్ఞస్య యో విద్యాత్స వశాం ప్రతి గృహ్ణీయాత్ ||2||
వేదాహం సప్త ప్రవతః సప్త వేద పరావతః |
శిరో యజ్ఞస్యాహం వేద సోమం చాస్యాం విచక్షణమ్ ||3||
యయా ద్యౌర్యయా పృథివీ యయాపో గుపితా ఇమాః |
వశాం సహస్రధారాం బ్రహ్మణాఛావదామసి ||4||
శతం కంసాః శతం దోగ్ధారః శతం గోప్తారో అధి పృష్ఠే అస్యాః |
యే దేవాస్తస్యాం ప్రాణన్తి తే వశాం విదురేకధా ||5||
యజ్ఞపదీరాక్షీరా స్వధాప్రాణా మహీలుకా |
వశా పర్జన్యపత్నీ దేవాఁ అప్యేతి బ్రహ్మణా ||6||
అను త్వాగ్నిః ప్రావిశదను సోమో వశే త్వా |
ఊధస్తే భద్రే పర్జన్యో విద్యుతస్తే స్తనా వశే ||7||
అపస్త్వం ధుక్షే ప్రథమా ఉర్వరా అపరా వశే |
తృతీయం రాష్ట్రం ధుక్షే ऽన్నం క్షీరం వశే త్వమ్ ||8||
యదాదిత్యైర్హూయమానోపాతిష్ఠ ఋతవరి |
ఇన్ద్రః సహస్రం పాత్రాన్త్సోమం త్వాపాయయద్వశే ||9||
యదనూచీన్ద్రమైరాత్త్వా ఋషభో ऽహ్వయత్ |
తస్మాత్తే వృత్రహా పయః క్షీరం క్రుద్ధో ऽహరద్వశే ||10||
యత్తే క్రుద్ధో ధనపతిరా క్షీరమహరద్వశే |
ఇదం తదద్య నాకస్త్రిషు పాత్రేషు రక్షతి ||11||
త్రిషు పాత్రేషు తం సోమమా దేవ్యహరద్వశా |
అథర్వా యత్ర దీక్షితో బర్హిష్యాస్త హిరణ్యయే ||12||
సం హి సోమేనాగత సము సర్వేణ పద్వతా |
వశా సముద్రమధ్యష్ఠద్గన్ధర్వైః కలిభిః సహ ||13||
సం హి వాతేనాగత సము సర్వైః పతత్రిభిః |
వశా సముద్రే ప్రానృత్యదృచః సామాని బిభ్రతీ ||14||
సం హి సూర్యేణాగత సము సర్వేణ చక్షుషా |
వశా సముద్రమత్యఖ్యద్భద్రా జ్యోతీంషి బిభ్రతీ ||15||
అభీవృతా హిరణ్యేన యదతిష్ఠ ఋతావరి |
అశ్వః సముద్రో భూత్వాధ్యస్కన్దద్వశే త్వా ||16||
తద్భద్రాః సమగఛన్త వశా దేష్ట్ర్యథో స్వధా |
అథర్వా యత్ర దీక్షితో బర్హిష్యాస్త హిరణ్యయే ||17||
వశా మాతా రాజన్యస్య వశా మాతా స్వధే తవ |
వశాయా యజ్ఞ ఆయుధం తతశ్చిత్తమజాయత ||18||
ఊర్ధ్వో బిన్దురుదచరద్బ్రహ్మణః కకుదాదధి |
తతస్త్వం జజ్ఞిషే వశే తతో హోతాజాయత ||19||
ఆస్నస్తే గాథా అభవన్నుష్ణిహాభ్యో బలం వశే |
పాజస్యాజ్జజ్ఞే యజ్ఞ స్తనేభ్యో రశ్మయస్తవ ||20||
ఈర్మాభ్యామయనం జాతం సక్థిభ్యాం చ వశే తవ |
ఆన్త్రేభ్యో జజ్ఞిరే అత్రా ఉదరాదధి వీరుధః ||21||
యదుదరం వరుణస్యానుప్రావిశథా వశే |
తతస్త్వా బ్రహ్మోదహ్వయత్స హి నేత్రమవేత్తవ ||22||
సర్వే గర్భాదవేపన్త జాయమానాదసూస్వః |
ససూవ హి తామాహు వశేతి బ్రహ్మభిః క్ళృప్తః స హ్యస్యా బన్ధుః ||23||
యుధ ఏకః సం సృజతి యో అస్యా ఏక ఇద్వశీ |
తరాంసి యజ్ఞా అభవన్తరసాం చక్షురభవద్వశా ||24||
వశా యజ్ఞం ప్రత్యగృహ్ణాద్వశా సూర్యమధారయత్ |
వశాయామన్తరవిశదోదనో బ్రహ్మణా సహ ||25||
వశామేవామృతమాహుర్వశాం మృత్యుముపాసతే |
వశేదం సర్వమభవద్దేవా మనుష్యా అసురాః పితర ఋషయః ||26||
య ఏవం విద్యాత్స వశాం ప్రతి గృహ్ణీయాత్ |
తథా హి యజ్ఞః సర్వపాద్దుహే దాత్రే ऽనపస్పురన్ ||27||
తిస్రో జిహ్వా వరుణస్యాన్తర్దీద్యత్యాసని |
తాసాం యా మధ్యే రాజతి సా వశా దుష్ప్రతిగ్రహా ||28||
చతుర్ధా రేతో అభవద్వశాయాః |
ఆపస్తురీయమమృతం తురీయం యజ్ఞస్తురీయం పశవస్తురీయమ్ ||29||
వశా ద్యౌర్వశా పృథివీ వశా విష్ణుః ప్రజాపతిః |
వశాయా దుగ్ధమపిబన్త్సాధ్యా వసవశ్చ యే ||30||
వశాయా దుగ్ధం పీత్వా సాధ్యా వసవశ్చ యే |
తే వై బ్రధ్నస్య విష్టపి పయో అస్యా ఉపాసతే ||31||
సోమమేనామేకే దుహ్రే ఘృతమేక ఉపాసతే |
య ఏవం విదుషే వశాం దదుస్తే గతాస్త్రిదివం దివః ||32||
బ్రాహ్మణేభ్యో వశాం దత్త్వా సర్వాంల్లోకాన్త్సమశ్నుతే |
ఋతం హ్యస్యామార్పితమపి బ్రహ్మాథో తపః ||33||
వశాం దేవా ఉప జీవన్తి వశాం మనుష్యా ఉత |
వశేదం సర్వమభవద్యావత్సూర్యో విపశ్యతి ||34||
| ←ముందరి అధ్యాయము | అధర్వణవేదము | తరువాతి అధ్యాయము→ |