పుట:పద్మపురాణము (మడికి సింగన).pdf/255

ఉత్తరఖండము-షష్ఠా శ్వాసము

223

తే.⁠

పంకజోదర! బలరామ! పద్మనాభ! వాసుదేవ! సంకర్షణ! వారిజాక్ష! యాదిమధ్యాంతరహిత! యనాదిపురుష! [1]నిర్గుణాత్మక! భవ! యపవర్గఫలద!

⁠ 4

క.⁠

సుజ్ఞానరూప! నిరుపమ యజ్ఞపురుష! యజ్ఞభోక్త! యజ్ఞాంగ! మహా ప్రజ్ఞానురక్త! జయస ర్వజ్ఞ! జగన్నాథ! విబుధవంద్య! మురారీ!

⁠ 5

తే.⁠

నీకు మ్రొక్కెద హరి! కృష్ణ! నీలవర్ణ! నీకు మ్రొక్కెద నత్యంతనిర్గుణాత్మ! నీకు మ్రొక్కెద భువనైకనిబిడరూప! నీకు మ్రొక్కెద లోకేంద్ర! నీరజాక్ష!

⁠ 6

క.⁠

పంచనవవ్యూహంబులు సంచితవేదములు నీవ! యనిశము నిను సే వించెద! నన్నుఁ బ్రసన్నో దంచితమతిఁ జూడు మురుదయారసమూర్తీ!

⁠ 7

వ.⁠

దేవా! సర్వలోకోపకారార్థంబుగా నావిన్నపం బవధరింపుము.

⁠ 8

శా.⁠

నాయందున్న సమస్తజంతుతతి దైన్యంబొంది[2]పెంపేది తా నాయుశ్శ్రీవిముఖాత్మమై విగతకర్మారంభమై శూన్యమై యేయాధారము లేకయున్నయది దా నివ్వేళ నాకై తగన్ నీయారూఢదయార్ద్రదృష్టి యిచటన్ నెక్కొల్పవే కేశవా!

⁠ 9

వ.⁠

[3]ఈ ప్రకారంబున నాభువనంబు సృజియించి స్థావరజంగమం బులకుఁ జేతనంబు గలిగింపుము. ధర్మాధర్మంబులును సుఖక్లేశం బులును నీకటాక్షంబునన సంభూతంబు లగు నట్లగుటం జేసి నా యందుఁ బొంది యింతయు నుద్దరింపుము.

⁠ 10

1. నిర్గుణాకార (మ-తి-హై)
2. పెంపొంది (ము)
3. పూర్వప్రకారంబు భువనంబు లన్నియు (తి-హై)