పుట:పద్మపురాణము (మడికి సింగన).pdf/213

పద్మపురాణము

ఉత్తరఖండము - పంచమాశ్వాసము

క.⁠

శ్రీమత్కృపార్ద్రహృదయో ద్దామ గుణాభరణ దానధర్మాచరణా ధీమహిత సరసమానన తామరసదినేశ కందదండాధీశా.

⁠ 1

వ.⁠

పరమయోగవిద్యాగరిష్ఠుం డగు వసిష్ఠుండు దిలీపున కిట్లనియె నీయడిగిన యర్థంబులన్నియు నితిహాసరూపంబున [1]వినిపించితి నింక నేకథ విననిష్టంబు వేఁడుమనినఁ గరకమలంబులు మొగిడ్చి యారాజకుంజరుండు మునివరాగ్రణి కిట్లనియె.

⁠ 2

సీ.⁠

అనఘాత్మ! మీదయ నఖిలధర్మంబులు          విని మీరు [2]వినుపంగ విశదమైన [3]జాతిధర్మములు నాశ్రమధర్మములు నిత్య          నైమిత్తకములు జన్నములు రాజ ధర్మంబులును దీర్థదానవ్రతంబులు         మొదలుగా స్వర్భోగముల నొనర్చు నట్టికృత్యములు పె క్కాచరించితి నింక         [4]నవ్యయంబగు మోక్షమందు నట్టి

⁠

ఆ.⁠

మార్గ మెఱుఁగ వేఁడి మద్భాగ్యవశమున నీదు దివ్యచరణనీరజములు గంటి వినఁగ నాకుఁ గౌతుకం బయ్యెడిఁ దెలియఁ జెప్పు మిపుడు దివ్యచరిత.

⁠ 3

1. విన్నవించితి (ము)
2. పనుపంగ (తి-హై)
3. జాతిధర్మంబులు సర్వంబులును నిత్య (హై)
4. నతిశయంబగు (ము)