పుట:నారదీయపురాణము (అల్లాడు నృసింహకవి).pdf/461

చ.⁠

పనిచిన వచ్చి రత్నగృహపాలిక బాలిక లూఁచ డోలికాం చనమున మోహినీ[1]లకుచచారుకుచస్థలవర్తియై యశో ధనుఁడగు ధర్మశోధనునుదారకళాపరిపూర్ణ చంద్రునిన్ గనుఁగొని వామభాగమున గ్రక్కున నిల్చె వరాంజలిక్రియన్.

⁠ 15

వ.⁠

నిల్చి యిట్లనియె.

⁠ 16

మ.⁠

ననుఁ బిల్పించితి వేమి నాథ! సకలానందంబులం దావకో క్తిని దేశంబుల నున్నదానను సపత్నీదుఃఖలేశంబు లే దనఘా! మోహిని నాశరీరము తదీయంబైన భోగంబు మ ద్ఘనభోగం బిఁక సంశయంబు గలదే కారుణ్యరత్నాకరా!

⁠ 17

తే. గీ.⁠

పతిసుఖం బాత్మసుఖమని భక్తిఁబూని తలఁచని యసాధ్వి శ్యేనియై ధరణిఁ బుట్టు నయిదు మూఁడునునైన జన్మాంతరములఁ గాన [2]నానతి యొసఁగు మే కార్యమైన.

⁠ 18

వ.⁠

అనినఁ గులశీలజన్మాద్యభిమానంబులు గలదానవని బహూకరించి కార్తికమాసవ్రతంబు లెన్నేనియుం గడచె నీమోహినితో రమింపఁగ మదాంధుఁడనై యుంటి. ఇంకనేనియు నీవ్రతంబుఁ జేనెదనన్న మోహిని వారింపుచున్నది యనఁ దా నొనర్చెదనని యంగీకరించి వర కృఛ్రసంజ్ఞంబైన వ్రతంబుఁ బూనె. రుక్మాంగదుండు నంత కుశ కేశిపుత్రిం జూచి యిట్లనియె.

⁠ 19

తే. గీ.⁠

ఇంతి నీమాట చేసితి నింతనుండి సకలభోగానుభవమహైశ్వర్యధుర్య పూర్ణకామత నుండు మే పొలఁతిమీఁద నైన నీమీఁదఁగల ప్రేమ పూనఁ[3]గలనే?

⁠ 20

వ.⁠

అనిన మోహిని యిట్లనియె.

⁠ 21

1. "వికుచశాలి కుశస్తవివర్తియై" అని వ్రాతప్రతి పాఠము.
2. "యానతి". అని వ్రాతప్రతిలో దిద్దుబాటు.
3. "గలదే” వాతప్రతి