| |
అన్నియు నీమంత్రంబునకే యనుకూలంబులగు. వ్యాపకంబులైన
మంత్రంబులు మూఁడింటిలో నిది యుత్కృష్టంబు. దీనియందు వ్యాప్య
వ్యాపకవిశేషావబోధంబు గలుగుం గాన విష్ణుగాయత్రియం దాద్యం
బీమంత్రంబు.
| 18
|
| క. |
ఈమంత్రశక్తి సద్గురుఁ
డేముఖ్యుఁడు తెలుప నన్యుఁ డెఱుఁగునె తెలుపన్?
భూమిన్ జాత్యంధుఁడు దా
నేమేనియుఁ జూప నెఱుఁగునే యంధునకున్.
| 19
|
| క. |
[1]విమలమగు శ్రీనివాస
త్వ మసాధారణము నాకుఁ దగునట్ల త్రయీ
సముదితనారాయణపద
మమిత మసాధారణంబు నయ్యె న్నాకున్.
| 20
|
| క. |
నారాయణనామము జి
హ్వారంగమునందు నిలుపు నతనికి నపవ
ర్గోరుఫలము తన్మంతకు
నారయ మంత్రాంతరంబు లవి యేమిటికిన్.
| 21
|
| క. |
నియతాత్ముఁ డగుచు భోజన
శయనాసనయానకర్మసమయముల మనః
ప్రియముగ నారాయణ యను
శ్రియఃపతిసమాఖ్య వినుతి సేయఁగవలయున్.
| 22
|
| క. |
ఏతన్మంత్రరహస్యము
స్వాతి సృజించెదవు సకలజగదంతరముల్
ఖ్యాతిగ నధికారాంతం
బేతెంచిన నన్ను నాశ్రయించెదు మీఁదన్.
| 23
|
బ్రహ్మదేవుఁడు అష్ఠాక్షరమంత్రావృత్తిప్రభావముచే హరపురందరాదులగు దేవతలను సృష్టించుట
| క. |
సారతరపరమమంత్రస
మారబ్ధావృత్తి పూని యబ్జభవుఁడు స
ర్వారంభోన్ముఖుఁడై తా
నారూఢస్థితిఁ బ్రపంచ మంత సృజించెన్.
| 24
|
- ↑ విమల యగు
