ఉవిద పొదలె నోహో యెలమావులు
రవలి చేసె వలిరాయనిమావులు
పంత మటవె చెలిపజ్జన మెదలకు
నింత జళుకఁదగునే తుమ్మెదలకుఁ
గ్రొవ్వున నాలతకుం బో నేటికి
జవ్వని యలరులు చాలు న్నేటికి
మానిని యేమిఁక మదిలోఁ గుందము
తో నీచేతికి దొరకెం గందము
వలదు తేనియలవానల నానకు
కలికి యేల యుల్కవే మరునానకు
క్రమ్మెఁ దెమ్మెరలు కమ్మనితావుల
మ మ్మిఁక విడువకుమా యీతావులఁ
గలిగెను రంభల కపురపుఁబలుకులు
వెలసె గండుఁగోవెల గమిపలుకులు
తరుణి పొగడగాఁదగియె వనాంతము
ధరఁ గడుఁ బొగడఁదగియె వసంతము
కినుకలేక చొక్కితివె వరాళికి
నెనసె నసమనుతి యీజవరాలికి
అరిది చిగురు చాయలు దగుఁ బొదలకు
గుఱుచనడలనిక్కులచేఁ బొదలకు
వెలసెను జెవి సుమవిరచితహారము
కలిగెనె చెలువకుఁ గలితవిహారము
సొం పొదవెన్ నీసొమ్ములకెంపుల
గుండగుమోదుగు క్రొవ్విరికెంపుల
బాగమరెన్ సతి పతకము పచ్చల
సోగతీగెగమి చొప్పుడు పచ్చల
కలితేందిందిరకచ యౌరా యని
తెలివి నుతింపఁగదే వలరాయని
