పురాణాలు ఒకవర్గానికి చెందినవని ఇవి మహాపురాణాలని, ఉపపురాణాలని రెండువిధాలుగా వున్నట్లు కొంద రభిప్రాయపడ్డారు. పురాణాలు 18 సంఖ్యకు పరిమితాలన్నది సర్వవ్యాప్తమైన విషయంగా కనిపిస్తున్నా పురాణ పురాణేతర గ్రంథవ్యవస్థలగురించి సరైన అవగాహనలేనందువల్ల పురాణాలు అష్టాదశసంఖ్యను మించి వున్నాయని కొంద రభిప్రాయపడ్డారు. కొందరు బ్రహ్మాండపురాణాన్ని విడిచిపెట్టి వాయుపురాణాన్ని గ్రహించగా, మరికొందరు వాయుపురాణాన్ని విడిచిపెట్టి బ్రహ్మాండపురాణాన్ని పరిగ్రహించారు. మహాపురాణాలలో దేవీభాగవతాన్ని కొందరు పరిగ్రహించగా మహాభాగవతగ్రంథాన్ని మరికొందరు పరిగ్రహించారు. కొందరు నారదీయపురాణాన్ని మహాపురాణంగా గ్రహించగా, మరికొందరు దాని నసలు సంగ్రహించనేలేదు. మరి ఉపపురాణాలుసైతం పేరుకు 18 గా పరిమితాలే అయినా అవికూడా అష్టాదశాధికంగానే లెక్కకు వస్తున్నట్లు కొంద రభిప్రాయపడ్డారు. విష్ణుపురాణాన్నిబట్టి పరిశీలిస్తే ఈ క్రింది 18 మహాపురాణాలుగా వైష్ణవ - బ్రాహ్మ - శైవపురాణాలుగా కనిపిస్తున్నాయి.
వైష్ణవీయపురాణాలు
వైష్ణవం
నారదీయం
భాగవతం
గారుడం
పాద్మం
వారాహం
బ్రాహ్మమతపురాణాలు
బ్రహ్మాండం
బ్రహ్మకైవర్తం
మార్కండేయం
భవిష్యం
వామనం
బ్రాహ్మం
శైవమతపురాణాలు
మాత్స్యం
కౌర్మం
లైంగం
శైవం
స్కాంధం
ఆగ్నేయం
వీటిల్లో వైష్ణవీయపురాణాలు శ్రీమన్నారాయణుని సంస్తుతించేవి కాబట్టి సాత్వికాలూ మోక్షప్రదాలూ అయిన పురాణాలు అనీ - బ్రాహ్మమతపురాణాలు సరస్వతీచతుర్ముఖకుశానులను వర్ణించేవి కాబట్టి రాజసాత్మకాలూ స్వర్గప్రదాలూ అనీ - శైవమతపురాణాలు దుర్గామాహేశ్వరవిఘ్నేశకుమారస్వాములను వర్ణించేవి కాబట్టి అవి తామసాత్మకపురాణాలనీ, కాగా దుర్గతిదాయకాలనీ కొందరు ఆర్షవిజ్ఞానవిరుద్ధంగా, వాస్తవికతకు భిన్నంగా అభిప్రాయపడ్డారు. ఇంకా విచిత్రమేమంటే శైవపురాణాలను కలలోనైనాసరే చూడకూడదనీ వాటిని విన్నవారికి మతి పోతుందనీ పారాశర్య ఉపపురాణంలో శివద్వేషులు అవైజ్ఞానికంగా, అజ్ఞానపూర్వకంగా సృష్టించి పెట్టిన ఒక ప్రక్షిప్తశ్లోకాన్ని ఆధారంగా చేసుకొని కొంద రభిప్రాయపడ్డారు.
