ఈ పుట అచ్చుదిద్దబడ్డది
రేకు: 0398-5 కొండమలహరి సంపుటం: 11-587
పల్లవి: మఱచినవారి నేల మఱవ నియ్యవు మమ్ము
వెఱచినవారి నేల వెఱపించ నేఁటికే
చ. 1: నీకుఁ గట్టినట్టితాళి నీమారు సేసుకొని
యేకచిత్తమున నే నింట నుండఁగా
పైకొని పిలిపించేవు పడఁతుల నంపి నన్ను
దీకొని మమ్మింత సేసి దిమ్ము రేఁచ వలనా
చ. 2: సేస వెట్టిన నీరూపె చిత్తములో నించుకొని
పోసరించి పొద్దు గడపుచు నుండఁగా
ఆస చూపి నీవు నాకు నప్పటి సన్న సేసేవు
వాసితో నుండినవారి వలఁ బెట్ట వలెనా
చ. 3: తప్పక చూడఁగ నీకు దగ్గరనె నిలుచుండి
దప్పులనుఁ బెడఁబాసి తని వొందఁగా
అప్పుడె శ్రీవెంకటేశ అలమేల్‌‌మంగను నన్ను
ముప్పిరిగా నిట్టె కూడి మోహించ వలెనా
