ఈ పుట అచ్చుదిద్దబడ్డది
రేకు: 0397-6 రామక్రియ సంపుటం: 11-582
పల్లవి: ఆతని మంచితనము అట్టె నా మంకుఁదనము
ఘాతల నే నెంచుకొంటేఁ గరఁగీ నామనసు
చ. 1: యింటివాకిటఁ దా నుండి యిట్టె నన్నుఁ బిలువఁగ
అంటఁ గాక వున్నదాన ననిపించితి
బంటువలెఁ దా వాకిటఁ బవళించి వుండఁగాను
మంటమారితనమున మాటలాడ నైతిని
చ. 2: పానుపుమీఁదికి వచ్చి పైఁ జేయి వేసితేను
ఆన వెట్టి నిద్ర వచ్చీ నని తోసితి
దానికిఁ గోపించుకోక తతి గాచు కుండఁగాను
లేనగవుతోఁ గొంత లేచి మొక్క నైతిని
చ. 3: బలిమి శ్రీవెంకటాద్రిపతి నన్నుఁ గూడఁ గాను
మెలుపున నాచేయి మీఁదు సేసితి
అలమేలుమంగ నేను ఆతఁడే నన్ను మెచ్చఁగా
కిలకిల నవ్వుకొంటా కిన్నెర మీఁటితిని