ఈ పుట అచ్చుదిద్దబడ్డది
రేకు: 0396-1 లలిత సంపుటం: 11-571
పల్లవి: ఏ మయ్య రమణుఁడ యెంత సేసేవూ
భామ నిన్నుఁ దలపోసీఁ బైకొనుదాఁకాను
చ. 1: చింతలచిగురు గోసీఁ జిత్తములోనఁ
గాంతుఁడ ని న్నెదుటనుఁ గన్నదాఁకాను
పొంతఁ బ్రియములఁ జేసీ బోనాలు
సంతతపు వలపుల చవి గొనుదాఁకాను
చ. 2: వెదచల్లీఁ జీఁకటులు వేనలివెంట
అదె నీవిరహతాప మాఁపఁగ లేక
తుదుచూపులనె కట్టె దోరణాలు
వదలక నీ వింటికి వచ్చినదాఁకానూ
చ. 3: ముగ్గులు వెట్టీఁ జెమటుమత్తెములను
అగ్గ మై నీవు తనుఁ బెం డ్లాడుదాఁకాను
సిగ్గుదేరఁ గూడితివి శ్రీవెంకటేశ
అగ్గల మై నీకు మొక్కె నట్టె యిందాఁకానూ
