ఈ పుట అచ్చుదిద్దబడ్డది
రేకు: 0395-4 శుద్దవసంతం సంపుటం: 11-568
పల్లవి: చెల్లఁబో నామన సింక సిగ్గు వడదు
పల్లదాన నీకు నేల భ్రమసితినో
చ. 1: అడరి నీవు మొక్కఁగా నాపె నిన్నుఁ దిట్టఁ గాను
నడుమ నూరకే నాకు నవ్వు వచ్చెను
వడిఁ జనవు గలట్టివారు ని న్నేమి చేసినా
తడవి నీపై నా కేల దయ వుట్టెనో
చ. 2: చెఱఁగు నీవు ముట్టఁగ చేతు లాపె దొబ్బఁ గాను
కఱకుఁ బెంజెమటలు గారీ నాకు
గుఱి యైనవారు నీతో గొడవలు వెట్టుకుంటే
అఱిమఱి నే నేల అడ్డము వచ్చితి
చ. 3: కాని మ్మని యాపె రాఁగా కాఁగిట నీవు నించఁగా
తానక మై నావలపు తల కెక్కెను
దీనికె కా నన్నుఁ గూడితిని శ్రీవెంకటేశుఁడ
కానీ లే నీ కెంత నేను కైవస మయితినో
