ఈ పుట అచ్చుదిద్దబడ్డది
రేకు: 0395-1 శుద్దవసంతం సంపుటం: 11-565
పల్లవి: ఎంతవాఁడ వైన నిన్ను నింత సేసితి
యింతిని నాయపరాదా లెట్టోరిచే వయ్యా
చ. 1: చేర రమ్మంటే రా నైతి చెక్కులు చేత గిల్లితి
గారవించఁగా నిన్ను గసరితిని
కూరిమి గొసరఁగాను కోపాన జంకించితిని
యీరీతి నాయపరాధా లె ట్టోరిచే వయ్యా
చ. 2: మనసు నొప్పించితిని మాట లెల్లా నాడితిని
చెనకఁగా వద్దని పైఁ జేయి వేసితి
పెనఁగితి నీతోడఁ బ్రేమము రెట్టించఁగాను
యెనసి నాయపరాదా లె ట్టోరిచే వయ్యా
చ. 3: కందువులు నీ వంటఁగా గాఁగిలించితి సిగ్గున
విందుల నీరతులకు వేసరుకొంటి
అందుకొని శ్రీవెంకటాధిప నిన్నుఁ గూడితి
నిందు నాయపరాదా లె ట్టోరిచే వయ్యా
