ఈ పుట అచ్చుదిద్దబడ్డది
రేకు: 0388-3 నారణి సంపుటం: 11-525
పల్లవి: కల మీ సహజానకు కన్నుల మెచ్చుట గాక
తలపోసి మి మ్మడుగఁ దగవా యీవేళనూ
చ. 1: పడఁతి నీమోము చూచి పకపక నవ్వు నవ్వి
చిడుముడి నీచేతిపై చేయి వేసేను
అడరి మీలోని మర్మా లనవి యేమి గలవో
తడవఁగ మాకు నంత దగవా యీవేళను
చ. 2: సారె సారె సన్న సేసి చాయలు దొరల నాడి
మోరతోపుఁదనమున మొక్కు మొక్కెను
కారణ మేఁటికో కాని కందువ మీకే తెలుసు
తారుకాణించఁగ మాకుఁ దగవా యీవేళను
చ. 3: చెనకి పాదము దొక్కి చెలిలోన మాట చెప్పి
ఘనముగ నిన్ను నాపె కాఁగిలించెను
అనుగు శ్రీవెంకటేశ ఆడుకోలుమాటలేవో
తనివి నిట్టె పాగడఁ దగవా యీవేళనూ