ఈ పుట అచ్చుదిద్దబడ్డది
రేకు: 0386-2 శంకారాభరణం సంపుటం: 11-512
పల్లవి: మేలే నీభాగ్య మలమేలుమంగా అదె
ఆలరి నీపతి మెచ్చె నలమేలుమంగా
చ. 1: యెంచ రాక పతితోడ నిచ్చకము లాడి నేర్పు
మించితివి గదే యలమేలుమంగా
వంచనఁ బ్రియాలు సేసి వడి నాతనిచిత్తము
అంచెల దక్కఁ గొంటివే అలమేలుమంగా
చ. 2: తఱితోడ మంచిజాణతనపుమాటల నెల్ల
మెఱసితి గదే యలమేలుమంగా
తెఱఁగుల నీపతికి తెల్లనినవ్వులు చల్లి
అఱచేతిమణి వైతి వలమేలుమంగా
చ. 3: వొక్కటై శ్రీవేంకటేశవుర మెక్కి యేపొద్దు
మిక్కుట మైతివే యలమేలుమంగా
యెక్కువఁ బదారుమేలుయింతుల మతనికి మ
మ్మక్కర దీర మన్నించి తలమేలుమంగా