ఈ పుట అచ్చుదిద్దబడ్డది
రేకు: 0376-3 సామంతం సంపుటం: 11-453
పల్లవి: ఎఱఁగ ననకుండా నీ కెఱిఁగించితిమి నేఁడు
తఱవాతిపనులకు తలఁపు నీ కెట్టిదో
చ. 1: జక్కవకుచములపై జారెటి పయ్యదతోడ
చెక్కుల జారే చెమటచిత్తడితోడ
నిక్కి నిక్కి లోలోనె నీ కెదురు చూచుకొంటా
అక్కడ నున్నది చెలి ఆనతి నీ దెట్టిదో
చ. 2: నిట్టూరుపుగములతో నివ్వెరగుపాటుతోడ
అట్టె నిన్నుఁ గూడెటి యాసలతోడ
నెట్టనఁ దనపాయము నీకే మీఁ దెత్తుకొంటా
యిట్టె వాకిటికి వచ్చె యెన్నికె నీ కెట్టిదో
చ. 3: బారపుఁదురుముతోడఁ బవళించే నీపానుపు
చేరి యం దున్నది నవ్వునెలవితోడ
ఆరయ శ్రీవెంకటేశ అంతలో నేతెంచి యాపె
నూరడించి కూడితివి వున్న దిఁక నెట్టిదో