ఈ పుట అచ్చుదిద్దబడ్డది
రేకు: 0376-2 సాళంగనాట సంపుటం: 11-452
పల్లవి: ఇంత యెరఁగనియట్టి యెడ్డనా నేను
కాంతుఁడ నీ వంతేసి గరిసించ నేఁటికి
చ. 1: సిగ్గు వడి వొకమాఁట చింతతోడ నొకమాఁట
వెగ్గళించి నిన్ను నాడ వెఱ్ఱిదాననా
అగ్గలపుమోహ మైతే అన్నియు నమరుఁ గాక
దగ్గరి నప్పుడె నీతోఁ దమకించఁ దగునా
చ. 2: కన్నప్పుడే మొక్కులూను కాన కున్నఁ దక్కులును
పన్ని యింత నేయ నీకుఁ బగదానవా
మన్నించినవారితోడ మందెమేళ మింపు గాక
నిన్న నేటిలోనకే నిన్ను దూరఁ జెల్లునా
చ. 3: మూల నుండి వొకవాని ముంగిట నొకవావియు
గోల నై చెప్పుక రాను కూళదాననా
యీలాగుల శ్రీవెంకటేశ నన్నుఁ గూడితివి
వేళగా కిందాఁక నిన్ను వేసరించ వచ్చునా
