ఈ పుట అచ్చుదిద్దబడ్డది
రేకు: 0374-5 భవుళి సంపుటం: 11-443
పల్లవి: తఱవాతిమాఁట లెల్ల దయ్య మెఱుఁగు
యెఱఁగనిదాన నేను యే మందు నేనూ
చ. 1: మంతనము లాడుకొంటా మంచముపైఁ గేరుకొంటా
నింతదడవు నుండరా యిద్దరు మీరు
యింతలో నే రాఁగాను యెవ్వ రాపె యీ పెంటా
యెంత కెంత నన్నడిగే వే మందు నేను
చ. 2: అంగము లొరసుకొంటా నాకు మడి చిచ్చుకొంటా
యెంగిలి పొత్తందుకోరా యిద్దరు మీరు
సంగడి నేఁ గూచుండఁగా సతి నా చెలి యనుచు
యింగితానఁ బే రడిగే వే మందు నేను
చ. 3: కమ్మి కాఁగించుకోంటా కాయాలు మరచుకొంటా
యిమ్ములఁ గూడి యుండరా యిద్దరు మీరు
పమ్మి నే దగ్గరఁ గాను పైకొని నన్నుఁ గూడితి
వెమ్మెల శ్రీవెంకటేశ యే మందు నేను