ఈ పుట అచ్చుదిద్దబడ్డది
రేకు: 0368-5 సాళంగం సంపుటం: 11-407
పల్లవి: చాలుఁ జాలు నంత మాతో సత్యా లేల
పోలించి వింటేఁ గల్లలు పుట్టెఁడేసి రాలవా
చ. 1: యెగ్గు పట్టే వని నిన్ను యేమి యనఁ జాలఁ గాక
సిగ్గుపడే వని నీపైఁ జే చాఁచఁ గాక
నిగ్గుల నీతోఁ గనక నే నేపాటి నవ్వినాను
బగ్గన నీయచారాలు బయిటనే పడవా
చ. 2: తల వంచే వని నిన్నుఁ దారుకాణఁ బెట్టఁ గాక
కలఁగే వని పయ్యెదఁ గప్పితిఁ గాక
వొలిసి నేఁ గనక నిన్నొత్తి మాట లాడితేను
యెలమి నీదొరతన మిట్టే యేరుపడదా
చ. 3: పై పైఁ దమకించే వని పచ్చి సేయఁ జాలఁ గాక
కోపగించే వని నిన్నుఁ గూడితిఁ గాక
యేపున శ్రీవెంకటేశ యిట్టె నిన్ను నొరసితే
తీపులనీమోవి తప్పు దీరుచుకోఁ బడదా