ఈ పుట అచ్చుదిద్దబడ్డది
రేకు: 0367-6 రీతిగౌళ సంపుటం: 11-402
పల్లవి: గుబ్బతిల్లె తమలోని గుద్దిరా లింతే కాక
గొబ్బున నీడకు వచ్చి కొంగు వట్టఁ గలదా
చ. 1: ఆతఁడే నాయింట నున్నాఁ డందరు సతులుఁ గూడి
యేతులకుఁ గోపగించి యేమి సేసేరే
చూతమువో వొక్క తైనా సోరిదిఁ గాంతునిఁ దమ
చేతికి లోనుగాఁ జేసి చిక్కించుకోఁ గలదా
చ. 2: చనవు నా కిచ్చినాఁడు సవతు లెందరు గల్లా
యెనయక నామీఁద నేమి సేసెరే
ననుపున నొక తైనా నన్నుఁ గూడినట్టిపతిఁ
బెనఁగి వేరె వలపించుకొనఁ గలదా
చ. 3: బాసతోడ నన్నుఁ గూడెఁ బైకొని శ్రీవెంకటేశుఁ
డీసులవా రిందరును యేమి సేసేరే
ఆస లింతే కాక వచ్చి అందులో నొకతె యైనా
నాసరి నుండి పతితో నవ్వి చూడఁ గలదా