ఈ పుట అచ్చుదిద్దబడ్డది
రేకు: 0362-4 కన్నడగౌళ సంపుటం: 11-370
పల్లవి: నీ మన సెట్టుండునో నేనెరఁగను
కోమలపుఁ బలుకులఁ గొసరే నే నిదివో
చ. 1: తప్పక చూడగ నోప తల వంచుకొన నోప
చిప్పిలుఁ జెమటతోడి సిగ్గలే కాని
ముప్పిరి ములుగ నోప ముందటనే నగ నోప
అప్పటప్పటికి నుస్సు రనుటే కాని
చ. 2: యేమీ నడుగనోప యెవ్వరిఁ గోపించ నోప
ఆమని జాగరముల అలపే కాని
నేమపువ్రతాల కోప నిండుమాయలకు నోప
చే మంచి తమకలము చింతించుటే కాని
చ. 3: బుద్దులు చెప్పఁగ నోప బూములు దొక్కఁగ నోప
వొద్దనె పాయక నీతో నుండుటే కాని
గద్దరి శ్రీవెంకటేశ కలసితి విదె నన్ను
వద్దని తోయఁగ నోప వంచుటే కాని